الخميس، ديسمبر 26، 2013

لن يضّيع الله حبي ..


كنت أتمتم بتلك الكلمات حين قرر هو الفراق أبتسم قليلاً, أبكي كثيراً و أردد والدموع تختلج نبضات قلبي " لن يضّيع الله حبي " لن يضّيع ربي قلباً أحب في الله بصدق صدقت نواياه فصدق عمله ,, ستمر السنين وستصبح تلك الكلمات التي أكتبها ذكرى وسأظل أردد لن يضّيع الله حبي , سيبدأ عام جديد بعد أيام قليلة , عام أخر من الغياب , مازال القلب يحتفظ ... !, مازالت أماكنكم في القلب تنشد البقاء لكل من أحببت أنتي يا صديقتي يا صاحبة القلب الطيب , و أنت أبي رحمك الله تشغل في قلبي الحيز الذي يتسع للسنوات القليلة من عمري التي صاحبتني فيها , أمي يا جنة الدنيا متي اللقاء يا غاليتي أستوحشك قلبي الصغير مازالتي يا أمي بعد رحيلك صاحبة النصيب الآكبر في قلبي وحدك تتربعين فيه , أما أنت يا صاح الغياب ترانا سنلتقي .. !!

الاثنين، ديسمبر 23، 2013

عمرو



لما قالت صعب تبعد وانت روحك فيا انا. غصب عني لقتني بعند قولت هبعد 100 سنة

الأحد، ديسمبر 22، 2013

لسان حال الرجل للقطة " بتفهميني أكثر من البشر "
ونظرة القطة للرجل تقول " عشان بحبك "

إذن الفهم والحب علاقة طرديا 

الثلاثاء، ديسمبر 17، 2013

الناس الطيبة هدية من الرحمن ....


 عن الناس الموجودين في محيط حياتك من معارف و أحباب و إنت شايف وجودهم في حياتك بشكل عادي إتعودت عليه مع الوقت من غير ما تسأل نفسك أد ايه و جودهم بيسعدك و فجاءة الناس دى تموت و ترحل من حياتك و من الدنيا دى..و تبتدى تفتكر أد ايه الناس دي كانوا طيبيين و مسمعتش منهم غير كل كلام طيب و كان وجودهم مش مجرد تعود و خلاص ده كان حب و جزء كبير من السعادة اللي بتشكل حياتك ..اللهم أرحم كل
عزيز غالي فارقنا

الخميس، ديسمبر 05، 2013

الشيخ محمد


هو من الناس اللي بتعدي مرة واحدة في الحياة تدينا شوية سعادة مع كام احساس لذيذ كالطمئنينه وبعدين يختفي للابد . متشفهوش تاني هو الشخص اللي يحبك من غير مقابل ينصحك بخوف وقلق و يسأل عليك, الشخص ده معطاء دايما لكل اللي يعرفهم وحنين وطيب ومحبوب من كل الناس الشخص ده في وجهه سماحة لا توصف رضا الرحمن عليه  واضح ,هتلاقيه دايما بيضحك وسباق في الخير الشخص ده حافظ كتاب الله وعنده علم الدين الشخص ده متواضع وبسيط وهادي في كلامه مع الناس الشخص ده كل اللي يشوفه من قبل ما يكلمه يحبه هو شخص لا يغيب عن البال وتمر صورته أمامي دائما لا تفارقني الشخص ده اتعلمت منه ما ينفعني في ديني ودنيتي الشخص ده عابر ولكنه حاضر الشخص ده اسمه الشيخ محمد ..  لو تمنيت ما تمنيت إلا رؤيتك .. اللهم فرج كربه وأزال همه وحزنه وبارك الله في علمه وأنفع به الناس .

الأربعاء، نوفمبر 27، 2013

محبوس يا طير الحق



والتهمة بتظاهر ضد اللي قتل الناس .. !! 

11 سنة حكم بالسجن علي أنبل ما فينا حرائر مصر عار علي كل من يحمل صفة الرجولة في مصر وينام مستراح الضمير قرير العين وتلك الفتيات خلف القضبان تنتظر عقوبة 11 سنة من عمرهم ظلم ,
الإنقلابين لن يراعو فيكم إلا ولا ذمة ولن تجدي سلميتكم أمام رصاصهم أنقذوا ما تبقي من رجولتكم أنصروا الإسلام والحرائر في مصر التي صار حال مسلميها كالأقلية المضطهدة 
تعس عبد الدرهم ,,تعس عبد الدينار .,,البعض في مصر إن أراد العيش فكر في مأكله و ملبسه و صارت الكرامة له و العيش بشرف من الكماليات التى لا لزوم لها طالما توافر الطعام ,,التواكل بمعناه الحرفي الله رازقهم و يسألون العباد الرزق و العفو ..رحماك يا ربي فإن قومي ضاع الحق فيهم أي مضاع..!
اللى عايز ياكل ميسألش على كرامته و كرامة بنات مصر
حبسوا البنات لا تحلموا بغد أفضل ضاعت رجولتكم
وامعتصماه
لا بارك الله في السيسي وأعوانه اللهم أحبط أعمالهم وأرنا فيهم عجائب قدرتك اللهم شتت شملهم وفرق جمعهم
إلي الله المشتكي

محبوس ياطير الحق 

قفصك حزين ولعين 

قضبانه لا بتنطق 

ولا تفهم المساجين 

قضبانه لا بتعرف 

ولا تفهم الانسان 

ولا الحديد ينزف 

لو تنزف الاوطان 

بين العتمة هنا 

وبين النور هناك 

حبسانى ويا الغنا 

قضبان على شباك 

زنزانتى لو أضيق 

انا من ورا السجان 

فى العتمة بتشعلق 

حتى على الدخان 

وأغنى بدموعى لضحكة الاوطان 

وأغنى بدموعى لضحكة الأوطان
,,,,,

الجمعة، نوفمبر 22، 2013

دنيتي اللي بحبها .. ♥



عارف ياللي إسمك إيه انت مهما تبعد عني هفضل أقرب ليك مهما تبعد عني ناس وأهتماهم ليا يقل جايز أخد موقف منهم لكن أنت مقدرش أصل أنت مش عارف سيادتك بالنسبالي إيه أنت الحياة اللي من غيرها مقدرش أعيش أنت عارف كم الآقنعة المزيفة اللي ظهرت لي الايام اللي فاتت ورغم كده لسه متمسكه بحضرتك أصل أنت اللي باقيلي لو الكل راح وسابني أنا مقدرش أتخيل إنك تعمل زيهم حتي لو هما خدعوك في يوم أصل أنت جميل وبتسامح وده أحلي ما فيك أنت عارفني بقي جايز أزعل وأتعصب وأقسي عليك لكن من جوايا بقول هيسامحني هيقدر حالتي وهيقف معايا وهيستناني بــ وردة بنفسج يصالحني بيها أنت أجمل حنيه ممكن تطبطب علي قلبي عارف يا اسمك إيه أنت, إن كل البشر يحبوك بس للاسف بيجرحوك كتير بس أنت بتستحمل أصل أنت نقي وبرئ ... 

الأربعاء، نوفمبر 13، 2013

مــســافــة بــيــن الــقــلــب..


زالت كل الإعتراضات وسقطت الحواجز وتحول الرفض إلي قبول , والفتور إلي محبة وأعتزاز , إنها قصة الامس واليوم والغد,, قصة إعلاء العاطفة الصادقة و الأخلاق والدين علي ما سواها من الإعتبارات الأخري التي لا تحقق السعادة وإن عظم شأنها والإستعداد للتضحية ببعض متاع الحياة في سبيل إنتصار الحب علي الصعاب,,,!

الأربعاء، نوفمبر 06، 2013

شــــــتــــا ,,,!


شتا وسقعه وشوية دفا مستخبين وعنيها بتلمع زي فرحة أول كلمة حب, صوته في ودنها كإنها بتسمعه لسه, ضحكته بترن جواها ..
 هي مش فاكرة فات قد إيه من الوقت كل إللي فاكراه.. فات شتا وده تاني شتا, مش عارفة تبتسم تاني ..
لسه بتسأل كان ليه كل اللي كان , كان ليه تظلمه إزاي مقدرتش تحافظ عليه ,  إزاي وهي بعيدة عنه لسه بتفتكر كل أيام السعادة اللحظات اللي جمعت ضحكتهم .. إسمه إللي رسمته علي السما والبحر ,,,!
 أما هو  وفي نفس ليل الشتا لسه بيفتكر كلام صاحبه لما قاله 
"سبها للزمن هو اللي هيعلمها وهيديها درس قاسي أوي  الحياة أصلها قصيرة وأما الخريف بيجي ورق الشجر بيدبل علي أغصانه وبيبقي قدامه حلم واحد بس إنه يفضل يحلم بذكريات الربيع "...!
 محدش فيهم لقي السعادة إللي كان بيدور عليها , عقارب الساعة اللي بتلف مع الآيام والسنين خدتهم في طريقها,, تروس بتلف و أختفت الآحلام ,,,
 لم يشفع ندمها علي ظلمها له  في أن الحياة تسامحها وتمنحها السعادة  , مازلت تتذكر أخر كلماته وهو بيعاتبها كان بيتمنى تقوله كلمة أنا أسفه,,, وقتها المكابرة جواها كانت أكبر من الأسف , محستش إنه كان بيتألم ,الأنانية جواها كانت شايفة السعادة في ماديات الحياة إللي بنزهدها أول ما بنمتلكها ,,,
لما الشتا فات وبعديه شتا كانت أبتديت  تحس إنها ودعت السعادة وإنها مابقتش تملك منها غير شوية الذكريات إللي كانت معاه , أما هو كان هناك كان بيستنى اللحظة دي كان عارف إنها حتندم مبقاش الشتا زي زمان بيفكره بلحظات الإفتقاد لها , لسه بيسمع أغاني الحب

الأحد، أكتوبر 27، 2013

الأربعاء، أكتوبر 09، 2013

آنا زي الفل ...


ولو تفهم في دمع العين كنت عرفت ان البكا مايجرحنيش
ده بيقويني تعيش روحي تروح أنت وروحي تعيش
وعمري ما أتوه في وسط قلوب بعرفها وعرفاني

ومهما تضيق مساحة قلبي قد الكون
آنا الخطوة إللي تبعدني متبعدنيش تقربني
آنا في خير وزي الفل والريحان

الأحد، أكتوبر 06، 2013

النصر أتِ


 يا آلة القتل البغيض دم ولادي مش رخيص 
دم ولادي بيحيّ شعب .. يحيّ أمة من جديد
راح تقتلني وتعتقلني هقوم وأناضل من جديد
بتقولي جيشك هرم يادي الهّرم اللي أتهدم اللي أتنكس
أحنا شبعنا كلام ياما من الورق شبعنا من فيلم أتحرق من كتر ما بتكرره
أبني البريء واقف هنا هتقتله وتحرقه يجي الوليد من بعده ثابت يهزمك
Aya

الثلاثاء، أكتوبر 01، 2013

فرح ...


 زي نصيبي ما يوديني هغمض عيني..
 و اللي ما يقدرش يطول حاجة يقدر يحلم♥ ,,,
 أدي اللي إتمناه القلب تم يا قلبي شايف الفرحة شايف الحب في كل حبايبي 

السبت، سبتمبر 28، 2013

الأربعاء، سبتمبر 18، 2013

دايماً في بالي ...



عارف مافيش يوم بيعدي وأنت مش ع البال . بدعيلك دايما في سجودي لله
بحس لما بكون قريبة من ربنا وبدعي عن كل شيء جوايا,وما بنساش ابداً أدعي ربنا
" يخليك ليا " وإننا نكون قريبين من بعض , بحس إن كل مسافة بتقربني ليك هي مسافة بنُصدق فيها أنا وأنت لله , لما كنت بسمع صوتك في القرءان كنت بقول صوت من الجنة لما كنت بشوف وجهك البشوش الضاحك كنت بقول هي دي راحة البال , لما كنت بسمعك بتقول إن طاعة ربنا هي المفازة , كان كل يوم بيعدي عليا بيقربني لله. لما كنت بسمعك تتكلم عن الرحمة والحب والوفاء قولت لنفسي إني كنت غلطانه لما تخيلت بعد ألمي إن مافيش وفاء وحب ورحمة , لكن جيت أنت عشان تصحي فيا نفسي اللي تاهت في أيام ظننتها هي أيام الخير , عارف أنت إيه ؟ أنت الحياة اللي بتمناها وياما أتمنيتها .. أنت الأيام اللي فيها الخير ليا ..

الأربعاء، سبتمبر 11، 2013

فصل : 3 / أول .. عام : 2005







Samsam Ahmed
ازيك يا بت يا ايوش شوفتى لقيت ايه
وكمان جوابات إيمان الصوفي وحبيبة والله كانت ايام حلوة انا قولت ابعتهالك واخليكى تفتكرى انتى كمان.. ابقى كلمينى بقى
Aya 
ياااااااااااه
عارفه اني بضحك جامد دلوقتي

Aya 
انا كنت لساني طويل كده ازاي ههههههه
هههههههههههههههههههه

Samsam Ahmed
افتكرتى.. طيب ايه رايك؟ هههههههههه وبعدين انتى طول عمرك لسانك طويل على شادية ولا نسيتى ايام ما كنا بنطرد بره الفصل

Aya
منستش عندك حاجات من دى تانى ليا
ههههههههههههه حاجات من ايام الزمن الجميل

Samsam Ahmed
والله يا بنتى مش عارفة انا لقيت الحاجات دى في علبة موجودة في كارتونة
مش عارفة الكرتونة دى لسه عايشة ازاى لحد دلوقتى

Aya
هههههههه عمرها طويل لسه .. ويا تري عايشة بتاكليها وتشربيها ولا  خلي بالك الظلم حرام هههههه

Samsam Ahmed
على رايك
بس والله انا لحد دلوقتى مستغربة

Aya
ليه بس يا سمسمتي

Samsam Ahmed
علشان اول ما فتحتها وافتكرت حاجات كتير

Aya
زعلتي ولا فرحتي وقتها
انا كمان افتكرت اليوم كله من اول طابور المدرسة لحد ما روحت كان يوم مضحك

Samsam Ahmed
والله فرحت ماكنش في حاجة تزعلنى
هههههههههه كانت سنة ثالثة كلها حلوة
يمكن علشان اخر سنة

Aya
طبعا ههههههه يا بنتي انا فاكرة اني كنت شقية أوي 
الكلام ده صحيح ولا أوشاعة ههههههههه

Samsam Ahmed
طول عمرك

Aya Mohamed Omar
طبعا أوشاعة لاني كنت بنوتة جميلة بتحب ترسم وهادية ومبضربش حد هههههههههههههه

Samsam Ahmed
ههههههههههه
وسعت منك ديه
انتى كنتى هادية امتى
والعيال اللى كنتى مطلعة على كل واحدة اسم
ها

Aya
ايه ده انا  ماكنتش هادية ورقيقه؟ هههههههههههههههه
 ينهار ضحك انا كده من زمان لحد دلوقتي بحب أطلع علي اللي أعرفهم أسامي وفي الغالب بتكون أسامي مضحكه ههههههههههه
طيب فكريني كده انا كنت مسمياكي ايه هههههه

Samsam Ahmed
هههههههههههه
 كنتى تعرفى
الا انا طبعا
Aya
اشمعني بقي
طيب فاكرة رسمتي المفضلة اللي كنت برسمها في اي مكان في المدرسة

Samsam Ahmed
اها انا اساسا كنت تحفة فنية لواحدى
صورة البهلوان ده تقريبا
صح

Aya
تؤ تؤ

Samsam Ahmed
امال
Aya 
لو دورتي في ذكرياتك القديمة  جايز تلاقيني كنت رسماه عندك ههههههههه
الرجل الاقرع يا بنتي  مش فاكرة ولا ايه   ههاي

Samsam Ahmed
ههههههههههههه
يا بنتى ما هو ده اللى بقولك عليه

Aya 
هو كان اقرع بس علي شكل بهلوان ههههههههه
انا نسيت شكلي.. اصلا انا اكبر نسايه ههههههههههه
طيب فاكرة لما كنا بنغني في المدرسة

samsam Ahmed
 طبعا هى دى حاجة تتنسى
.......
بعيداً عن خطي اللي كان مش ولابد والمكتوب في الرسالة اللي عمرها 8 سنين دلوقتي .. أنا فرحت أوي إن لسه في حد من صحاب ثانوي فاكرني كده أنا مش بتواصل مع أسماء بشكل دائم بنتكلم كل فين وفين ,
لكن فكرة إنك تصحي الصبح تلاقي رسالة من حد بيفكرك بنفسك بضحكك بعفويتك وبساطتك بالمريلة  والكتب والكراريس والمذاكرة وريحة أيام ثانوي , دي لوحدها كافية انها تسعدك لآيام كتير أوي ..
وأنا بقرا الرسالة اللي كنت  كتبتها  لآسماء وأنا " بنت في الثانوية "  أفتكرت كل حاجة حصلت في اليوم ده وأفتكرت برائتنا وحبنا للحياة ..
كنت شقية فعلا جدا بس كنت محبوبه من كل الناس 

الأربعاء، أغسطس 21، 2013

نـفـــس الــمــكـــان ..... !


" كان ياما كان يا سادة يا كرام , و ما يطيب الكلام إلا بذكر النبى قولو عليه الصلاة والسلام يا ولاد" ... أقول عليه الصلاة والسلام وأنا على مقعدى بجوار الراديو فى بيتنا الصغير أسمع الحكاية وأطلق لخيالى العنان....

"كان ياما كان, كان فى رجل شقيان عنده من البنات أثنين بنت إسمها شمس الشموس تحب تلعب فى البستان تحن على الحيوان وتسقى غصن الورد وتسمع الكلام وبنت إسمها ........" قبل ما تكمل الحكاية كنت صغيرة أقفز من مقعدى أردد "أريد أن أكون شمس الشموس وألعب فى البستان " ....كبرت ولم تكبر بداخلى الحكاية ظل عالم الحواديت وحده هو البستان وكنت أنا فيه شمس الشموس هنا أسرح بخيالى كما أشاء وفى عالم الحواديت يكون النور نبيلا فى إنتصاره لا ينتقم من الظلام ,لا يدس عليه بالآقدام... فى عالم الحواديت الحب براءة و البراءة طفولة و الطفولة عهدها بنا أيام قليله وتنقضى فى مدونتها كتبت مراراً وتكراراً عن قصص الحب كانت ترى فى كل قصة تخطها أناملها بإن النهايات دائما لا تأتى بقدر وجمال البدايات خيالها ككاتبة قصص كان يرى إن اللحظة الآدبيه تولد من الآلم.. وحده الآلم كان الباعث الآساسى فى تحريك أبطال قصصها 
قال أبى ذات يوم "هذة هى الحياة يوم نزاع ويوم وداع" أطلبى لمن تفارقين الرحمة لا حزن مثل حزن الصغار حزن نقى يدركونه بالغريزة كنت أنا كذلك فى نهاية القصة نفحت قلبى المثقل نفحة من الشوق إلى كل الحواديت التى أمطرت طفولتى بالحب أودعتها سلام عزيز من قلب فتاة أدركت الآن أن كل قصص الحب التى كتبتها وتخيلتها لم تكن إلا خيال لا يمت للواقع بصلة وإن الواقع تتحكم فيه الناس كل على قدر ما يريد
" عمرى اللى فات و الذكريات كانوا هنا..و انت بعيد قلبى غريب و أنا مش أنا .... "
من فضلك يا اسطى أخفض صوت الردايو الطريق إلى المطار طويل ونريد ألا ننزعج , قاطعتهم مخاطبه سائق التاكسى لا من فضلك لو سمحت أترك هذة الآغنيه أود سماعها تسللت بعيناها خارج نافذة التاكسى أبت ألا تسجل أى مشاهد فى ذاكرتها للطريق الموصل إلى المطار كانت كلمات أغنية عمرو دياب تخترق مسامعها لتنفذ إلى قلبها موقظة كل ما قد سلف من أحداث سبقت لحظة الرحيل من الوطن 
بقلمي : aya
27 إبريل 2013
دي تدوينة قديمة كتبتها من شهور .. 


الأربعاء، أغسطس 14، 2013

فدي بلادي تروح الروح ولا أشوفها بتتعسكر ...


 ستين سنة وكلاب العسكر بتنهش فينا وبتصبغ الآرض دم وفساد ستين سنة والجلادين بيخرسوا الآفواه ستين سنة إعتقالات وتعذيب في سجونهم ستين سنة طوارئ .. فوقوا بقي يا ناس أخوك اللي بيهتف في الشارع لا هو أخوان ولا سلفي ده مصري مسلم زيك بيدافع عن كرامتك وحقي وحقك اللي أغتصبوا العسكر .. دم أهلنا و أنبل ما فينا اللي غرق شوارع مصر النهاردة هيفضل معلق في أعناقنا لحد ما نثأر لهم .. وشرفك يا بلدي سحابه وتعدي

الأربعاء، يوليو 31، 2013

ضــحِــك الــقــمــر


النهاردة شوفت القمر جميل اوي اه والله كان جميل أوي ودعيت دعوات كتير وحسيت بسلام نفسي , بعدها أخدت نفس عميق وغمضت عيوني ونسيت الآرض واللي فيها وشوفت نفسي هناك عند القمر اه والله عند القمر ..البال مرتاح . القلب كله حياة . مفيش مشاكل . مفيش فراق . لكن في حب, و حياة.. و, روح بتضحك تملي الكون فرح وسعادة ..

الخميس، يوليو 11، 2013

الناس الحلوة اللى بجد ..


 أحلى حاجه لما تشوف وجوه تشعرك بسلام نفسى
 و راحه كدا بتبقى من جواك بتقولهم خليكم معايا لاخر العمر..

 انتم مبتجوش كل يوم ليه ؟

الأحد، يونيو 30، 2013

قلوب لربها خاشعة ...


 مسكين من يقضي حياته يلمّع صورته أمام الناس ويزينها،

وينسى قلبه الذي لا يطلع على مكنونه غير الله !


عجبتنى أوى الجملة دى فى منتدى
أحلى حياة فى طاعة الله .. 
 اللهم أجعل قلبى ملك ربى

Aya

الجمعة، يونيو 28، 2013

عن تمرد 30 يونيو , وبلطجة المعارضة



إن ما يحدث فى مصر الآن هى معركة الفصل الآخير بين فريقى الحق والباطل .. الحق الذى جاء وفق إنتخابات و شرعية اعطاها له الشعب والباطل الذى يريد أن يتسلق كل الطرق لفرض أيدولوجيتهم ومصالحهم فوق إرادة الشعب متبعين فى ذلك كل السبل الممكنه لمهاجمة كل ما هو إسلامى فى ذلك الوطن .. صدقاً حتى لو أختلفنا مع المكون الآيدلوجى للإخوان لن نختلف عن توصيف ما يريده رعاع 30 يونيو من تخريب وهدم كل ما تبنيه معاول الصالحين فى هذا الوطن.....
الفكرة فى توصيفى ليهم كونهم رعاع هو التوصيف الاقرب لكل المتسلقين الذين ارتضوا من الاساس بشرعية القوانين الوضعيه " التى خالفت شرع الله ودا منحى اخر للنقاش " وبعد ما هما ارتضوا بالقوانين دى ووفقها انتخبوا مرسى وخاض الانتخابات افراد منهم لم يوفقوا فأعلنوا من وقتها الحرب الشعواء ضد كل ما يمثل المخالف الايدلوجى لهم المجسد فى صورة الإسلاميين الذين اعتلوا سدة الحكم وما تعلمناه هو احترام القوانين والدستور .. فما توصيفكم لمن يعترض على امراً وافق عليه فى بدئة ولما اختلف مع ما تهواه نفسه قرر ان يعترض ويخرب ويهاجم كل ما هو إسلامى " رعاع " توصيف رحيم لآمثال هؤلاء المعارضة ليست بتلك الصورة .. ولا تأتى بالدم ومحاصرة مساجد الله هل اتاكم خبر ما حدث بمسجد الشرعيه بالمنصورة الذى حوصر اكثر من 12 ساعة وقتل فيه ثلاثة اشخاص ؟؟ وعن الملتحين الذين يتم سحلهم فى الشوارع
... اللهم أحفظ مصر و رد كيدهم فى نحرهم

الأربعاء، يونيو 26، 2013

خير اللهم اجعله خير .. :)



ليه لما بكون مضايقة مابقتش احب اقول لاى حد انى مضايقة عكس زمان ماكنش قلبى بيقدر يزعل ثانية وكنت بحب احكى على اللى جوايا علطول .. ليه دلوقتى بقيت اشعر انى لو قولت لاى حد على اى شئ بيضايقنى او ضايقنى هيقولى الكلام المعتاد زى انسى كبرى هى دى الحياة طيب معلش اصبرى شوية ..... إلخ وهكذا يطول الحديث :) ........

هو انا اللى ما بقتش اشوف حد يفهمنى عشان كدا مابقتش بحكى وافضفض زى زمان ولا الناس هى اللى مستمرة تعيش دور الناس الروتينية اللى كلامهم شبه كلام الموظفين ولا ايه !!

ولا هو ملل ولا ايييييه ؟

الأربعاء، يونيو 19، 2013

العــيــلــة ودوشــتــهــا ...


لما تشتاق للمة العيلة كلها فى بيت واحد وتبص تلاقى نفسك لوحدك متضايقش لما تشتاق للمة العيلة على سفرة واحدة وكلام مابيخلصش ومابيحلاش إلا على الآكل برضة متضايقش , بس خليك محتفظ بالحاجات الجميلة دى فى صندوق صغير جوه الذاكرة عشان من وقت لوقت الحاجات دى هتسعدك كل ما تفتكرها فى غياب آصحابها ..

الثلاثاء، يونيو 11، 2013

ألـف حـكايـة وحـكايـة ...


على وقع كلمات أغنية وردة أيام وبنعدها اللى سمعتها مؤخراً بدأت أستدعى مشاهد من الذاكرة ألف حكاية وحكاية عدت ونسيت أكتب عنها كلمات وردة كانت ملهمة ليا فى كتابتى للتدوينة دي ..

(1)
"حتى كل دمعة بكيناها كنا بالضحك محيناها,حرام نضيع أيام تمر ما فينا نردها"....أكتر من ألف حكاية و حكاية  كتبتهم عنها,عن حبي ليها,عمرى ما كنت أتخيل إنى ممكن أحب الكتابه عشانها,,,منين ما بتيجي فى بالي كنت بكتب عنها...الحتة اللى إتسرسبت غصباً عني من روحي خليتها معاها,,كل ما تقرب منى الحتة الناقصة من روحي بتكمل لوحدها...دى إنتي يا اسكندرية,,,كل مرة كنت بكتب عن اسكندرية كنت بحس إن اللى كتبته حتة من روحي علشان كده قررت أحتفظ بكل اللي كتبته في شنطتي اللي كانت معايا فى كل الأوقات...الغريب إن شنطتي كانت بتساع كل ده,,,شنطة شالت حبايبي وصحابي اللى سمعوا حكاويه عنها,,شنطة شالت ورق صغير و جدران و أسوار ,,شنطتي شالت السما و السحاب و البحر....

كنا ردينا أوقات صارت هلا ذكريات ,كنا رجعنا أحباب فارقناهم,كنا صالحنا أصحاب زعلناهم....من المنشية لبحري حيث مكاني المفضل بقلعة قايتباي و جيلاتي عزة اللذيذ,,, الحنطور و التمشية ع الكورنيش من المنشية لبحري و عيني ع البحر و الناس و الوقت الجميل اللى بيمر بسرعة البرق ,,,و فرح نوبي يستقطع طريقي فى ممشى القلعة أنزل من الحنطور و مكملش التوصيلة و أتفرج ع الزفة النوبية و العروسة الجميلة هى و عريسها و هما بيرقصوا على نغمات الدفوف النوبية و كل الناس حواليهم فرحانين ,,أبص لعيون العروسة و الفرح و السعادة اللى بتنطق بالحب و العريس اللى ضحكته منورة وجهه..أنسى إنى معرفهومش و أبتدى أسقف مع الناس الواقفين فى الزفة و أنا كلي فرح ,,,, لناس متربطنيش بيهم أي معرفة.. بعيدة عن كل الناس اللى عرفتهم و أتمنيت إني أشاركهم أفراحهم,,,و فى قلبي كل الأوقات الجميلة اللى بقت ذكريات  ,,,الناس اللى رحلت و الناس اللى ضحكت معاهم أيام و مرت و الناس اللى لسه كلامهم و صوتهم جوايا... "أيام و بنعدها لو فينا نردها"...
Aya

الجمعة، مايو 31، 2013

بنوتة أسمها آية :)


مفيش أجمل من البنت اللى تحس إنها زى الطفلة فى معاملتها ولما تيجى تسألها فى حاجة تلاقى بنت دماغها كبيرة وفاهمة ..

الجمعة، مايو 03، 2013

رسالة إلى السيد بحر . من الرسائل القديمة جدا التى لم تنشر فى المدونة . لم اعتاد أن أكتب خواطر لكنها كانت تجربة حلوة .. تاريخ هذة الخاطرة 2010


رســــــالة إلى الســـيد بحـــــــر.....
العــزيز الغــالــى......
أشواقى وتحــــياتي.....
أوحشنى غيـــابك...
أشتقــــت إلـى أمواجــــك.......وتلهفــــت عـلى لقائــــك....
أكــــتب لك من القـــــاهرة العامـــرة الســــــــــاهرة......أكـــــتب لك وأنـــــا حـزينة يـــــا بحـــر....
حزيــــــنة أنـــا يـا بحــــر....
الــــيوم كــــان الفــــــراق....الــــــيوم كان الــــوداع....
أتــــــدري من أقـــــــصد؟....أتـــــدري من فـــــــارقني يــا بحـــر؟.....
نـــــعم أنــه هو يـــــا بـــحر......ألازلت تتـــذكره؟.....
أنـــــه من ســـــطرت عـــــــلى رمالك حــــروف أســــمه الشهر الماضى حينما ألتقـــــيتك يا رفــــــيقي....
أعلـــــم أن أمـــــواجك قـــد خطفـــــت حــــــروف أســـمه مـــــني......
كم هـــى أنــــانيــة تلك الأمـــــــواج .....فـــى أنـــــانيتها حروف أســــــمه...
أنــــــا حـــــزينة يــــا بحـــــر.....
ضــــــاعت أحــــــلامي......تــبــددت شــــــمس أيـــــامــي..
لا تـــــسلنــي يـــا صـــديقـــي...كـــيف ضــــاع الحــــب منــــي
كـــبف تــاهـــــت الأمـــــاني.....والهــــوى رغــــم عــــني...
لا تـــسلنـــي فـــلن أجـــب......لم يــبق شئ في بـــعادك غـــير حـــزن واّلامــ
أشــــتاق إلى جــوارك كــالطفل ألـــتمس الاّمـــان....
كالعــاشق الولـــهان .... وشــوقه لأن يضمه سكنـــات المــــكان...
أتــــرى ستـــجمعنا الليــــــــالي ....وأشــــكو لك مــــا كـــان....
أخــــشى صـــديقى على الأمــل الصغير.....أخشــــى يضيع ويــندثر ويـــطويه مـــرور الأيــام.....
أخشــــى مـــن الـــجرح العمـــيق....أخشـــى من طـــعنة الــــحبيب....
بـــــريئــــة أنـــا يا بــــحر...لم أقتـــرف ذنبــــاً ولا اّثــــام....
مـــا كنــــت لأظلـــمه...إلا رغـــم عنــي يا بـــحر...
مــــا بيـــدي ...كيـــف يــدري؟؟....
كـــيف يـــدري بيــن صـــمتي؟؟.....
لـــن أدافــع ...لـــن أبـــرر...لــن أواجه ...
ســـأبعث لـــه لحـــنى القـــديم....بيـــت صغيــر على البـــحر ضــمته أمـــانينــا.....
ســأبعث لــه أغــانينا الــقــديمــة تداعـــبه ...تـــواســيه..
فـــإن غــاب الهـــوى عنــا غـــداً فــى الـــذكــرى تـــلاقــينا....
لـــن أنــــسى أننــا كـــنا شـــعاع أضــاء يـــومــــاَ وأحــــترق.
لــــن أنـــسى  يــومـــاً ....أستـــاذى عـــصفور من غــادر عشـــه وأفـــترق.....
إعَــلم يــا بحــر أن قـــصتي الأولى ســيذكرهــا هو ويشــتاق...
وســــأبعث لـــه هـــمســاتي.....تـــسأله عن الـــماضي...
تـــحدثه عــن البــسمة....عن الفـــرحة.....
عـــن حـــلم طـــفلةٍ صغيــرة ضـــاعت أحـــلامــها وتــبددت...
عصفــورها قــد غــرق
Aya

الخميس، أبريل 25، 2013

ضحكة مريم ...


دى مريم ناصر بنت أخويا أحدث مولود فى العائلة اتولدت فى شهر نوفمبر اللى فات انا اللى اخترت لها اسمها بحبها جدااااا اجمل حاجه بتميزها ضحكتها الجميلة دى مش زى كل الاطفال اللى فى سنها اللى دايما بيعيطوا مريم دايما بتضحك وهادية المشكلة انى خايفة تطلع لادغة كمان زى حبيبة اختها مريم أمل جديد فى الحياة ربنا يخليها ليا وبعدين لاهلها :)

طموح

أنا بحس إن أنت غنى على قد أحلامك 

الأحد، أبريل 21، 2013

رســـالة من صاحبتى


وصلتنى رسالة من صديقتى العزيزة على قلبى من يومين قررت أحتفظ بيها هنا وأكتبها هنا فى المدونة أصلها مش مجرد رسالة دى كلمات بتتنفس ود وحب من إنسانة عزيزة على قلبى,, وحشتنى و وحشنى أيامى وضحكنا مع بعض ..
 السلام عليكم ورحمة الله ,,,
" أيوش وحشتينى جدا يعنى وحشتينى دى بعدد سكان مصر بلدنا بعدد حروف كلمة وحشتينى بعدد كل ضحكة ضحكناها مع بعض وكل صورة أترسمت فى ذكرى أيامنا اللى فاتت وحشانى يا أية .."

الجمعة، أبريل 19، 2013

مدونة ولا كل المدونات :)


قعدت اقرأ التدوينات اللى فاتت كلها واقرا تعليقات لى ولآصحابي المدونين وردودي عليهم حسيت اني كنت بنى ادمه مختلفة عن البني ادمه اللي بتقرا دلوقتي وقت ما كتبت كل تدوينه فى مدونتى حبيبتى كنت بكتب بأحساس توقيت اللى اتكتبت فيها التدوينه لكن لما برجع دلوقتى اقراها بحس بشعور مختلف تماما عن اللى كان موجود, وقتها بكتشف انى تغيرت يمكن حاجات كتير اتغيرت هى كمان واسباب كتبتى للتدوينه كمان مبقتش موجودة لكن التدوينه  لسه موجودة ؟ واصبحت مجرد ذكرى فى مدونة اسمها حواديت بنوته مصرية, وهكذا هى المدونات " ذكريات" انا فاكرة اول تدوينه كتبتها ومن احب التدوينات لى على الرغم ان اسلوبها كان بسيط لا يقارن بأسلوبى فى الكتابه دلوقتى ...
"التاكسى..والسائق.. العجوز.. وأغنية .. ام كلثوم  .". كتير بدخل مدونات اللاقى اصحابها  اخر تدوينه ليهم من سنه او سنتين او  ثلاث او اربع سنين , افضل اقرا فيها بلاقيهم تركو لينا حاجات جميلة اوى رغم انهم انقطعوا عن الكتابه خلاص  تركو مدوناتهم ذكرى  لينا احنا .. انا عارفه ان احلى حاجة  بحبها فى الانترنت هى مدونتى انا سجلت هنا حاجات كتير بحبها   انقطعت فترة من التدوين وبعدين رجعت اكتب تانى بس برضة مش بنفس درجة احساسى بحب الكتابه والتدوين بتاع زمان فى حاجات اتغيرت وغيرتنى معرفش ليه .. بحب اوى حواديت بنوتة مصرية  لكن يا ترى ممكن تتحول لمجرد ذكرى زى باقى المدونات اللى اصحابها انقطعوا عن الكتابه  فيها ؟  .

الثلاثاء، أبريل 16، 2013

أبو كف رقيق و صغير


أهو أنا البنت اللى لسه بتتفرج على بكار حلقة حلقة كل يوم و مش بمل خالص بالعكس لذيذ جدا إنك تستمتع بكل الحاجات اللى بتسعدك مع إن غيرك لما يعرف إنك كده و لسه بتحب الحاجات دى يتريق بقى و يقولك ايه الطفولة دى ..ماشى أنا طفلة و بحب بكار ..حتى أسألوه..أصل أنا و هو زى بعض ده حتى بيحب الرسم زى...ولمض كمان زى ..
بكار...بكار ..بكار ..يا بو كف رقيق و صغير و عيون فنان محتار..من قلبه و روحه مصرى و النيل جواه بيسرى ...أصحابه كتير كتير أده و قدهم و موسيقى نشيد بلادى بتجرى فى دمهم...

الثلاثاء، أبريل 09، 2013

البحر بيخطفنى من تانى بتوحشنى


البحر بيخطفنى يحكيلى ويغنى ينهار يا ولاد...! إيه اللى حصل إزاى يمر سنه مسمعش الآغنيه دى !!!! إية يا أيوش ولا حتى بقيتى تكتبى عن إسكندرية, إيه اللى حصل بقى .. فاكرة والله فاكرة دا أنا عملت المدونة عشان أكتب عن الآيام اللى بزور فيها إسكندرية كل سنه .. التمشيه على البحر وقت الصبحيه وغزل البنات والشمس وهى بدوب فى المية وقت الغروب وصوت حنان ماضى وهى بتقول حبيبى قالى اتمنى انا قولت بيت ع البحر, الله ريحة اليود وحشتنى, يا سلام اهى اسكندرية دى أحلى بلد فى الدنيا وحشتنى أوووى,

السبت، أبريل 06، 2013

و كــان و كــان و كـــان...

المرة دى مش هكتب حواديت مش علشان الحواديت خلصت ولا إنى مابقتش بعرف أكتب قصص زى الآول .. المرة دى هكتب قصة حقيقية بطلتها أنا 
" أية" صاحبة المدونة اللى بتألف أفكار الحواديت اللى بتتكتب هنا .. من سنة بالتمام بالتحديد فى بداية 2012 من يناير كدا وقت ما كتبت  تدوينةعادى" الوقت دا كانت فى حاجات غريبه بتجد على حياتى البسيطة الهادية اللى كلها مرح إختصرت كل اللى كان بيحصل وقتها وبيغير فيا فى تدوينة عادى" .... كنت وقتها بذاكر لإمتحانات الترم, الشتا اللذيذ والمذاكرة والنسكافيه والمطر اللى نزل عليا فى أول يوم ليا فى الإمتحانات وعشانه كتبت التدوينه دى افتقاد" كانت الحياة جميلة وهاديه فكرة إنك تكون متسامح مع الحياة بتتعامل معاها ومع الآشخاص اللى فيها ببراءة وطيبة وانت مش متخيل ان اللون الرمادى موجود وان فى ناس ممكن تخدعك أو تكدب عليك أنا ماكنتش بفكر كدا, أنا كنت أية اللى دايما بتضحك بقلبها الرقيق اللى بيشوف كل الناس ملايكه مع ان الملايكة مش بتعيش على الآرض,بعدها بفترة تطورت فيها الظروف المحيطه والمتغيرات ووجود بعض الآشخاص شكلو حياتى اليومية بداية من صديقتى يمنى اللى معايا فى كلية الإعلام وصديقاتى البنات على الفيس بوك سارة وياسمين وأسماء والرغى وحكاوى البنات, لما سافرت يمنى للسعودية تركت فراغ كبير, أنا ماليش أصحاب كتير من وقت ما أصحاب ثانوى كل حد أختار طريق دراسى مختلف عن التانى وبقيت لوحدى أتعودت على كدا من 2005 أنا كمان كل أخواتى أكبر منى يعنى مفيش نقطة تواصل ممكن تجمعنا ,2012 بقى كانت سنه عجيبه فى حياتى فى وسط كل اللى حكيته دا انا شوفت نور جميل كان بيحيط بيا بيوعدنى بكل الفرح والآمنيات الجميلة اللى ممكن تتمناها بنت فى سنى " الحب , الفرح,السعادة, الآهتمام" كنت حاسه كأنى فى حلم بيتهيائلى إنها دنيا محال كان طبيعى وقتها ان تدويناتى هنا فى المدونة تكون كلها بتضحك كانت كلها للنور دا , دونت لحظات جميلة  أو زى ما تقولوا كدا أنا كنت وقتها شايفها كدا,على فكرة أنا سهل أوى إنك تبسطنى و تقدر أوى تضحك عليا و تاكل بقلبى حلاوة بكلمة عادية أو ضحكة أو حتى إبتسامة بسيطة أقل شئ ممكن يرضينى ويسعدنى لكن تعرفوا دى كانت سذاجة وطيبة زيادة عن اللزوم منى , المهم نكمل الكلام ...كنت كل يوم بنتظر فيها مجيء النور لحياتى و أنا زى الطفلة اللى بتنتظر العيد, و الفستان الجديد,سندريلا ,سنووايت ,كل بطلات الحواديت الجميلة اللى بحبها كنت أنا....لما أقترب شهر رمضان الكريم بالتحديد فى أواخر يوليو 2012 كان وقتها حان دخول النور الجميل اللى شفته فى الخيال لحياتى الواقعية وقربت الفرحه من قلبى وفرحت أوى زيادة عن اللزوم وفى لحظة الفرح دى يتقلب النور ظلام وأكتشف إنى كنت بشوف كل حاجة بس بعيون عميا لا ترى مقدرتش أفرق بين النور والظلام ,بين الكدب و الصدق ..بس الصراحة أنا كان بيجيلى هاجس بكدا كان قلبى شفاف وكنت بفهم وبقدر أفرق وتدوينة.. 
" أبيض" تشهد بكدا بس وقتها النور كان تغلغل وجوده فخيبت ظنونى وقولت بلاش سوء ظن يا أية ,طبعا على قدر إيمانك بوفاء الآشياء والآشخاص على قدر صدمتك لو ثبت العكس,وقتها بيناتبك شعور بالخوف و الإنعزال و دا بالضبط اللى حصل معايا,كنت عايزة أبعد عن كل الناس إلا ربنا هو اللى لجأت له,فقدان الثقة فى البشر شئ صعب إنك تتحمله ,إحساس الخذلان و الوحدة يزيد أكثر مما كان حتى لو كان كل الناس حواليك,دموعك فى السجود هى اللى وحدها بتغسل قلبك و بتطبطب عليك ,دعاء فى العشر الأواخر من رمضان من صحبة طيبة فى مسجد بتدعى ليك إن ربنا يصطفيك,و إنك بقدرة الله و بفضله و بدعوة مستجابة أتحول أنا لــ" أية" تانية خالص غير التى كتبت هنا منذ سنة,أنا الأن أدركت قيمة حياتى فى رحاب الله و أدركت خطئى و علمت يا ربى إن كل حب لغير الله ينهار و أشفقت على كل من جهل ذلك,فى الجانب الإخر أبصرنى الله بما لم أتوقعه عن ذاك النور الذى ظننته خيراً فى يوما ما بل و تماديت فى حزنى على فقدانه,رأيت شبحاً يجول من ظلام لظلام يستبيح كل ما لا يرضى الله و نظرت لنفسى فوجدتنى على طاعة و مع صحبة صالحة أأتنس بها,الأن صرت أنا حاملة لكتاب الله القراءن أحفظه و أدرس علم التفسير و أسأل الله الثبات و أن لا يفتنى فى دينى,رضيت يا ربى ....و أدركت حكمتك ,ما حرمك إلا ليتفضل عليك ...و لقد أبتليتنى فصبرت فأصطفيتنى ..و إن قدر لىّ الله أن يحدث ذلك ثانيةً على أنا أكون على ما فيه أنا من سعادة و طاعة, لتمنيت أن يحدث مرة أخرى... 
أما و اليوم وقد برأت إلى الله مما قد سلف ,جئت لأدون عن تلك الأيام لا لتنظير و لا لأى شئ سوى إنى ما رأيت صدقاً إلا بين طيات مدونتى فأثرت أن أدون للعبرة عن كل ما كان يقول الأمام الشافعى رحمه الله..
يريد المرء أن يعطى مناه.. ويأبى الله إلا ما أراد 
يقول المرء فائدتي ومالي .. وتقوى الله أفضل ما استفاد

الخميس، مارس 28، 2013

الآحساس الصادق لا يموت

ان اللحظات " الغنيه " بالاحساس الصادق وان ندرت الا انها تملأ نفوسنا بالراحه والاطمئنان وتجعلنا نتذكر هؤلا "الطيبين " بالخير وان مكروا في بعض الاحيان وان كابروا في بعض الاحيان وان استمروا في عبثهم الجميل في بعض الاحيان نتذكرهم ونشعر بانهم قريبون منا وان ابتعدوا عنا وان تمردوا على انفسهم وان داهم شعورنا احساس بالغربه تجاههم في احيان اخرى " الاحساس الصادق لايموت .. وان جرحه نزف العابثين احيانا "

الخميس، مارس 21، 2013

السبت، مارس 09، 2013

أنا والمدونة وحواديتنا



.........
حواديت بنوته مصرية : أزيك يا آية عامله إيه
آية: وحشتينى يا مدونتى معلش بقى غبت كتير عنك
حواديت بنوته مصرية: ولا يهمك يا أيوش ما أنا عارفه انتى كدا زى الاطفال لما تفرحى بحاجه جديدة تاخدك منى ببقى بضحك عليكى من بعيد واقول راجعه راجعه
آية : هاهاهاهاهاهاها ضحكات شريرة متقطعه يا بنت الآيه عرفانى وحفظانى
حواديت بنوته مصرية : اهلا يا ستى هه إيه جديدك
آية: إستنى بقى عندى حدوته هتعجبك
حواديت بنوتة مصرية : شوقتينى يا توته أكتبى أكتبى
آية: المرة الجايه يا جميل أنا مش فاضيه دلوقتى سلام مؤقت
حواديت بنوتة مصرية : سلامونتى يا أيوياا هستناكى ..

الثلاثاء، مارس 05، 2013

قلوب كأفئدة الطير


 .. هناك قلوب كأفئدة الطير ..

عن أبي هريرة عن النبي صلى الله عليه وسلم قال:" يدخل الجنة أقوام أفئدتهم مثل أفئدة الطير"أخرجه مسلم
-قوله صلى الله عليه وسلم: يدخل الجنة أقوام أفئدتهم مثل أفئدة الطير... قيل مثلها في رقتها وضعفها....

 هناك علاقة ، بين الرقة و الإيمان والحكمة،ولهذه الرقة النابعة من الإيمان سمات كثيرة
-سرعة التأثر وسرعان ما تذرف العين.
-سرعة الاستجابة للحق.
-سرعة الاتعاظ والتذكير ، وكره الظلم بشدة.
- مراعاة مشاعر الغير واحترامها والاجتهاد في التلطف والحذر في أن يمسها بسوء.
-التفاعل مع من حوله والاهتمام بمشاعرهم فرحا وحزنا.
- التفكير في الآخرين، فإذا عجز عن مد يد العون، فلا أقل من أن يحمل همهم في قلبه وعقله.
وهذه الصفات العامة التي يتسم بها أصحاب القلوب الرقيقة ، والتي هي كأفئدة الطير،لها ضوابط مهيمنة،ومن أبرزها:
-لين من غير ضعف ، وقوة من غير عنف ،أي هيبة أو حزم من غير شدة... ثقة بالنفس من غير غرور أو تكبر.
-أن يحب ويبغض ويعطي ويمنع لله... ردود أفعاله ينبغي أن تكون متزنة دون إفراط أو تفريط... وفقا للضوابط الشرعية.

أحسب نفسى وأياكم من هذه القلوب 

الأربعاء، فبراير 27، 2013

إليك أنت ....



يا صديقى لن أخشى المواجهة إليك أنت يا صديقى سأرحب بنقدك وتوجيهك
... لآننى أثق فيك وأعرف إنك تهتم بأمرى .

لأنك تواجهنى بالحقيقة فى إطار من الحب والتقدير والأحترام لأنك تصون كرامتى وتحرص على إنسانيتى.

ولا تشعر بإنك أكثر ذكاء منى أو أهمية لأنك تقبلنى مهما كان خطئى أو تقصيرى أو وجهة نظرى فإختلافى معك لا يعنى إنك ترفضنى .

وعدم إتفاقى معك ليس معناه أن تهاجمنى وعدم رضائك عن أمر ما لا يجعلك عدوى لأنك تحبنى كنفسك وتود بنيانى ولا تهدف إلى تحطيم ثقتى أو هدم معنوياتى لأنك تواجهنى  بحب و وداعة وفى وضوح وحزم .

فى الوقت نفسه تحبنى لأنى أنا أنت كلانا يمثل للآخر نفس القيمة من الحب والتقدير لآنك تواجهنى لتوجهنى لكى أتغير إلى الآفضل .

وليس لتديننى أو لتحكم على أو لأنك تهوى مجرد الإصطدام بى أو العناد معى
  لأنك تعرف إننى لن أستطع أن أكون نسخة منك.

لأنك لم تتكلم عنى مع غيرى من ورائى و إنما كنت شجاع فواجهتنى لأن هدفك دائماً هو أن تربحنى وتفوز بصداقتى .

ولا تفكر أبداً فى أن تخسرنى أو تتخلى عنى لأنك كنت الأقرب لىّ وقت ما جرحنى الآخرين كنت وحدك الملاذ.. الصديق.. والحبيب .

لأنك تشجعنى على أن أكون نفسى وأتحدى ظروفى وأبدأ من جديد لآنك تخاف على وتسرع لتنبهنى إلى أى خطر يسئ إلى.

أو يهدد سلامتى فمن أجل كل ذلك أهلاَ بالمواجهه يا صديقى تواجهنى أو أواجهك
طالما كنت صديقى سواء أكنت أخى ...أو أبى... أو زوجى... أو زميلى.. أو قارئى .....

....

يا رب كلما واجهت نفسى أدركت إننى ضعيف أحتاج إلى قوة منك ألتمس غفرانك نفسى عليله تحتاج إلى شفائك روحى مضطربه أطلب سلامك يا رب
حقوق النشر محفوظة لصاحب المدونة. يتم التشغيل بواسطة Blogger.

مريومتي

مريومتي

وردي الرقيق :)

وردي الرقيق :)

بحب البنفسج

بحب البنفسج
صورتها من حديقة الكلية 2010

من أنا

صورتي
أنا من تخوض الحياة ببرأة الآطفال وطموحاتها لا تمنعها اسوار ولا يصد هدفها الجبال كالطير المهاجر بين الآوطان... ..................... آية ده إسمي .. بنوتة بسيطة جدا لا أحب الكلكعه ولا الناس اللي عايشة في الدور .. هادية وشقية ومعرفش إزاي .. أنا إعلامية يعني خريجة إعلام جامعة القاهرة ..

Translate

إجمالي مرات مشاهدة الصفحة

About this blog



أنا من تخوض الحياة ببرأة الآطفال وطموحها لا تمنعها أسوار ولا يصد لهدفها الجبال كالطير المهاجر بين الآوطان .. أنا من تعشق الحياة بكل ما فيها تحلم مع البحر وترسم فوق الرمال قلبها الرقيق..تحمل روحها الجميلة أينما تكون تزرع فى كل مكان وردة وفى كل قلب ذكرى..شقية احياناَ هادئة احيانا ..لكن هذة أنا.. وغيرى أنا ما أكون...
فقد صنعت لنفسى كون وحياة فيه اشيائى وفيه أعيش وحدى..
************ يارب سبحانك بينى وبين الناس فى دنيتك احوال وانت اللى عالم بضعفى ياذا الجلال والكمال خلينى عبدك لوحدك لاعبد جاه ولا مال واحمينى من الحقد من نفسى من قالو وقلنا وقال يارب سبحانك ...

Blog Archive

Followers