صباح الخير يا حياة
صباح بصوت فيروز بتغني لي عن الشتا وانا في حر يونيو يعني يا فيروز لا نسمة هوا بارد لطيف يبهجني ولا حبيبي اللي غاب غلبه الحنين ورجع...
"بيقولوا الوقت بيقتل الحب"
أيوة يا فيروز اتفق معاكي في الكلام ده، الوقت فعلا مش بس بيقتل الحب ده بيقتل كل البدايات الحلوة وبينهي كل الوعود اللي كنا بنقول عليها عهود ل أخر العمر...
انا بحبك انتي يا فيروز عشان كل الصباحات اللي كانت بتبتدي بصوتك كنت بحلم بيها بيه وهو راجع من بعد سفر وغياب.. راجع ليا يقولي خلاص مفيش فراق تاني يا أيوش، بس طال السفر والغياب بقى للأبد.. وزي ما بتقولي يا فيروز
"يا حبيبي شو نفع البكى"
وانا مش مسامحة يا فيروز... لا سامحت في ظلمه ليا ولا في قلبي اللي بردان من الوحدة.. أنا بس بقيت بتسرق من الدنيا ومن الأيام والضحكة اللي مكانتش بتفارقني ضاعت بين البكا ع كل الحاجات اللي حلمت انها تكمل بالفرح ومكملتش.
"لا إنت حبيبي، قصتنا الغريبة ضيعها الهوا"...
يناير 2019 انا مكنتش منتظرة حد وقتها يدخل حياتي الهادية، كنت مكتفية بوحدتي و بفيروز وأغاني الشتا وبهجة الهوا اللطيف وأنا بأكل عصافيري الصغيرين كل فجر يوم جديد...إنت ليه جيت وقتها بكل اللهفة والحب اللي من كتر ما كنت بتحكي عنه أنا صدقته؟.. حقيقي بسألك ليه جيت، ليه سرقت ضحكتي ليه بدلت فرحي لحزن.
"أمس انتهينا يا صاحب الوعد"
انتهت القصة وكان الوداع ابتسامات مبللة بالدمع حينا وبالذكرى أحيانا.. يعني ايه ممكن تمحي إنسان من حياتك بكلمة، يعني ايه تكسر الفرحة وتقتل كل التفاصيل اللي جمعتك بنصف قلبك، إزاي بتقدر تجمع بين حنين الحب في لهفة البدايات وبين قسوة الفراق.
"علموني حبك ولاموني"
شوفتي يا روز قديش كنت بحب اغنية علموني، كنت دايما مقتنعة إن الاهتمام هو أكسجين الحب.. مع اعتياد وجودك في حياتي واهتمامك في البداية إتعلمت أحبك... اتعلق بيك أكتر لحد ما لاموني على الحب ده وقالولي بالنهاية "احنا منعرفش اللي كان بينكم إيه".
" رجعت الشتوية"
شهور وهنغني تاني يا فيروز القلب، يرجع الشتا وترجع ضحكتي.. ويدووب الألم، ونرجع تاني نحلم... نفس الحلم يا قلبي، نصي التاني الرومانسي، والمشي تحت المطر معاه ولهفة أول لقا، أنا عارفة مهما طال الميعاد لينا لقا في النصيب أيها المجهول الجميل... إنت موجود أنا متأكدة، نصي التاني اللي بيكملني اللي موجود بمكان ما بالعالم... هرجع تاني انتظر وكلي أمل إن الميعاد قرب وهتتلاقى ضحكتها وأصالح دنيتي بيك.
