الجمعة، أكتوبر 06، 2017

الفستان ربيع 2012



"ده جميل خالص..تحويش بسيط من المصروف و هقدر أشتريه" ... فضلت أقول لنفسي طول وقفتى قدام الفاترينة وأنا بتفرج عليه كان حلو جدا هو ده اللي في خيالي بالظبط زي فستان سنووايت الواسع المبهج بتصميمه اللي زي فساتين أميرات الحواديت اللي بحبها ... هدخل أتفرج عليه وأعرف إذا كان ممكن أحجزه خطوات صغيرة كنت جوه المحل وعيني على الفستان اللي بره لما سألت البنت اللي في المحل "هو الفستان ده في منه مقاسي ؟ " البنت إبتسمت وقالت" أخر فستان من الموديل ده اللي موجود على فكرة وتقريبا مقاسك " طلبت منها إني أحجزه رفضت قالتلي ممكن تيجي بكرة تشتريه عادي ... خرجت من المحل وعيني بتلمع على الفستان لما مشيت و وصلت البيت حكيت لآختي عنه وطلبت منها إنها تديني فلوس أشتريه قبل ما يتباع ، تاني يوم كنت هناك وأنا بدفع الفلوس زي الطفل الصغير اللي فرحان بهدية جميلة كان بيتمناها من وقت ... وهنا بقى تبتدي حدوتة فستاني الجميل اللي متلبسش غير مرة واحدة ومن وقتها وهو كل ما أفتح الدولاب أتحاشى إن عيني تيجي عليه وأفتكر ....


مارس 2012:
  الآيام كانت وقتها جميلة وأنا منتظره الحدث الجميل اللي في حياتي اللي هيخليني أنتظر البس فستان عمري لآول مرة حكون بطلة حدوتة جميلة الفستان كل يوم الصبح ألبسه قدام المرايا أشوف نفسي فيه وأنا كلي سعادة كل يوم يعدي يقل وزني عشان أكون أحلى فيه وتكتر سعادتي بيه ..

يوليو 2012:
 فيروز كانت بتغني أحنا والقمر جيران في اليوم ده كنت زي العروس اللي جهزت كل شيء جميل عشان تليق بالفستان كل ما الميعاد يقرب وتقل الدقائق والثواني قلبي  كان بيدق بسرعة من الفرحه ...لأول مرة أبقى فرحانة جدا كده ..مش عارفة ليه وقتها من كتر الفرحة كنت خايفة ..هو ليه الناس لما بتفرح بتخاف ..! كنت مقتنعة إن الخوف هو أنتيم الفرح منين ما يروح الفرح يواجهه الخوف ,الخوف من إن الفرح يهرب مننا...

الاثنين، أكتوبر 02، 2017

2012 يا أجمل سنين العمر


2012 صوتك كان بيفرق وكان له قيمة كان في وطن بننتمي له دلوقتي عايشين في اللاوطن اللا حب اللا حرية اللا أمان .. ☺️ 2012 يا أجمل سنين العمر يا كل الحاجات الحلوة كان لسه لهيب الثورة جوانا كنت أبتهل اناشيد الثورة إحساس إنك موجود جوه جيل ثوري وبتنتمي للوقت ده في حياتك كان كفيل إنه يسعدك ويخلق جواك آمل في مستقبل أفضل دايما أيام السعادة قليله خلصت 2012 وأنتهى الحلم الجميل عشان نفوق منه على واقع هزمنا كلنا ودخلنا جوه أقفاص كبيرة وغربت شمس الحريه في يوم من الأيام أنا متاكدة إني هقدر أكتب عن 2012 وأحكي كتير عن أجمل سنه في عمري.. 

الأربعاء، أغسطس 02، 2017

تشهد الأيام على القلب المسامح ...




أحلامها بريئة تماما كملامحه الهادئة أحلام وردية اللون كأحلام الصغار وهم في عمر الزهور شهدت الأيام على كل حلم تمنته ولم يوعدها بالفرحه وعن كل حزن خلفه حلم لم يتحقق لم تمت الصغيرة مع كل حلم رسمته وخذلها وتركها وحيدة فكانت كل احلامها القديمة يجددها بذوغ فجرا جديد لحلم أكبر يتسع لروحها الرقيقه وأطلقت لروحها العنان ودعت لأمها بالرحمة والمغفرة لما أورثتها إياه عن قصص البراءة والطيبة والحب لترحل وتتركها في زمن لم تره تلك القصص حقيقه ،وحدك تتحملين يا أمي ذنب تلك الصغيرة التي أورثتيها الطيبه والبراءة والحب ..

السبت، يونيو 10، 2017

صندوق الدنيا



ما تيجي نرتب أفكارنا مع بعض من تاني ونشوف هنقدر نتغير ولا لاء ، ما يمكن أفكارنا قدمت ومبقتش تناسبنا دلوقتي زمان يا صديقي كنا ابرياء وكانت افكارنا بتليق علينا دلوقتي النقاء بيعتبروه موضه قديمه وانت عارف ان اكتر حاجة بقت بتوجعنا وتسيب اثر فبنا  اننا تايهين في وسط حياة لا تشبهنا ولا نشبها ،، الدنيا بكل حكاياتها والناس على اختلاف أخلاقها بنبقى كلنا في نفس خط السير وناس تفارق وناس تكمل وناس في نص الطريق تجرحك عشان تكمل باقي الطريق وعينك على كل الخطاوي الي قطعتها معاه، والقلب مرايا بتشوف فيها كل الاحلام الي فاتت والشوارع مبتنساش لا ضحكك الي كان ولا حتى زعلك في يوم ما رجعت وحيد في نفس الشارع من غيرهم، ودور الدايرة بناس تانين وجرح يجدد جرح ولسه الفرح أوانه مجاش مستنين واحنا خايفين،، خايفين من الغايب الي لما يرجع يكون كل شيء استناه راح وفي وسط كل العاتمه يهل حلم صغير وينور ضي ضعيف نتسند عليه يقوينا ونقويه ونلاقي الي يصدق حلمنا وأفكارنا القديمة وحياتنا البريئة الي كانت وردة جميلة صغيرة في وسط الشوك بتتفتح 

الجمعة، أكتوبر 21، 2016

حالها كحال كل سجناء هذا الكوكب لا تحلم ولا تنام لا تشعر بالأمان ظلت تحلم كثيرا قبل هذا الوقت والأن توقف بها الزمن لتصبح سجينة في أحلام الماضي ورعب الحاضر تفكر كثيرا في اللا شيء أرهقت نفسها رغم حجمها الضئيل وسنها الصغير تشاهد الأيام والسنين وهي تمر بلا جدوى

الاثنين، أغسطس 15، 2016

مفيش مشكلة ..



عن الوجع اللي بيكون جواك ومش عارفه تقوله لحد لان مفيش حد بيقدر فبتستحمل عن الحياة اللي بتقف بيك عند ناس معينه خلاص ماتو وسابوا الدنيا باللي فيها عن حزنك عليهم اللي غيرك وكسرك عن الفقد اللي بقيت فيه من يوم ما ماتو وفضلت انت لوحدك مش عارف تعوض غيابهم بأي ناس تانيه عن كلامهم اللي لسه بيرن في ودانك عن صورهم اللي بتتحرك قدام عنيك ليل ونهار عن الحب والحنيه اللي نفسك تحسهم بس مش لاقيهم خلاص عن النقاء اللي بتفقده كل ما تقابل ناس وحشة بتصدمك في كل حاجة عن الثقة اللي بتقل في نفسك وبالتالي بتنعدم في الناس عن التلقائيه اللي اتحبيت عشانها وفجأة كرهوك برضو عشانها ببساطة لانك مش عارف تنافقهم عن الصاحب الحلو اللي قبل ما يموت بيومين قالك كلام يفرح ويوجع لانه فهمك قد ايه كان بيحبك وكان صادق في علاقته بيك وبيوجعك لانك قصرت وانشغلت بحاجات وناس ماكنتش تستاهل وسبت اللي كان فعلا فاكرك وبيحبك عني دلوقت وانا بكتب وانا مكبوته ومش عارفه اقول اه لان لوحدي في الحياة عن الوحدة اللي بتزيد يوم بعد يوم ومحدش عارف حاجة 

الجمعة، أبريل 22، 2016

حكاية كل يوم ...


النهاردة صحيت وابتدت يومها بسماع منير و وقفت عند جملة " أنا قد كلامي اللي هياخدك من دنيا لدنيا أنا قدة" أبتسمت أكتر وكأن الجملة دي هي المقصودة بيها وكأنها بتعلن لنفسها إن وعوده مش وهم وإنه بيحبها أكتر من نفسه وإنه مش ممكن يسبها إبتسمت مش بس لإنها بتحبه لا عشان الحب بيقوي وهي حست قد إيه هي قوية لإنها بتحب وإن القصص الرومانسية مش دايما نهايتها تعيسه ولا القلوب اللي بتقدر تحب ممكن تنسى و تبعد عادي زي معظم الافلام او الروايات اللي أبطلها بيفترقوا بعد قصة حب جميلة وإبتدت تكدب خوفها وتصدق الحب وتسمح لنفسها تحلم وتعيش أحاسيس جميلة زي اي بنت في سنها ولإن الحب سر من أسرار سعادتها ونجاحها فقررت تقتل كل مخاوفها وتتمسك بسعادتها اي كانت الظروف والروايات المتكررة 

حقوق النشر محفوظة لصاحب المدونة. يتم التشغيل بواسطة Blogger.

مريومتي

مريومتي

وردي الرقيق :)

وردي الرقيق :)

بحب البنفسج

بحب البنفسج
صورتها من حديقة الكلية 2010

من أنا

صورتي
أنا من تخوض الحياة ببرأة الآطفال وطموحاتها لا تمنعها اسوار ولا يصد هدفها الجبال كالطير المهاجر بين الآوطان... ..................... آية ده إسمي .. بنوتة بسيطة جدا لا أحب الكلكعه ولا الناس اللي عايشة في الدور .. هادية وشقية ومعرفش إزاي .. أنا إعلامية يعني خريجة إعلام جامعة القاهرة ..

Translate

إجمالي مرات مشاهدة الصفحة

About this blog



أنا من تخوض الحياة ببرأة الآطفال وطموحها لا تمنعها أسوار ولا يصد لهدفها الجبال كالطير المهاجر بين الآوطان .. أنا من تعشق الحياة بكل ما فيها تحلم مع البحر وترسم فوق الرمال قلبها الرقيق..تحمل روحها الجميلة أينما تكون تزرع فى كل مكان وردة وفى كل قلب ذكرى..شقية احياناَ هادئة احيانا ..لكن هذة أنا.. وغيرى أنا ما أكون...
فقد صنعت لنفسى كون وحياة فيه اشيائى وفيه أعيش وحدى..
************ يارب سبحانك بينى وبين الناس فى دنيتك احوال وانت اللى عالم بضعفى ياذا الجلال والكمال خلينى عبدك لوحدك لاعبد جاه ولا مال واحمينى من الحقد من نفسى من قالو وقلنا وقال يارب سبحانك ...

Blog Archive

Followers