الاثنين، فبراير 14، 2011

يا نور جديد فى يوم سعيد...


اليوم هو الآثنين 14 فبراير 2011....
بحلول هذا اليوم اكون تميت بالتمام والكمال 23 سنة ..اصل انا من مواليد الشمعدان زى ما كان الناس اللى اكبر منى بيقولولى ..
14_2_1988 كان الميلاد.. والنهاردة بكمل من عمرى 23 سنة .. متهيائلى ان انا عمرى 3 سنين بس من غير العشرين , اصل انا بحسب عمرى على حسب وقت الفرح فيه .. وعشان نحسب صح يبقا انا عمرى 3 سنين عدد سنوات الفرح..بس ممكن نزود عليهم يوم ولا يومين من 2011 من 25 يناير لـ 11 فبراير .. اصل دى بالنسبالى أيام فرحت فيها برضه ومش اى فرحة ... دى فرحة شاركنى فيها كل المصريين..., عالينا الصوت وسمعنا كل العالم يعنى ايه مصرى حر وانزاح عننا الطاغيه وأعوانه... برضه عيد ميلادى السنة دى مختلف حاسة فيه ان انا كمان حد مختلف وبفكر بطريقة مختلفة غير كل السنين اللى فاتت ..صرت اكثر هدوءاَ وتعقلاًَ لكل الآمور .. صرت اكثر إيماَناً  بالحكمة التى تقول بأن" ليس كل ما يلمع ذهب" , لم يعد البريق المزيف يخطف بصرى لم أعد انخدع فيمن يدعون العقل والعلم ...,بعدوا عنى وفى بعدهم زال بريقهم أنكشف عنهم الغطاء صرت أضحك كثيراَ وانا اتذكرهم , اردد كيف لى اننى يوماَ قد غرنى وبهرنى أدعائهم للصدق والعقل والحكمة , الحمد لله مر هذا العام ومر معه كل ما ليس له قيمة ..
على المستوى الدراسى الحمد لله حققت ما كنت اصبو إليه... وعلى الصعيد العاطفى مازالت الآمور كما هى لا جديد, قلب لا ينبض, لا يزال ينتظر رسائل من حبيب مجهول, يبحث عنه فى قاموس الآسماء من حوله وهو متيقن انه موجود خلف ستار ما يحمل له كل مشاعر الحب, والدفء والحنان , تائه بين الناس ومكانه فى القلب محفوظ.
ربما تناثرت له بعض الصور المتقطعه أمام عينى لكنها كلها صور لشخصيات باهتة.
غاب عنها الوهج ليس بينهم حبيبى, فحبيبى شمسه لا تغيب.. ...
متفائلة جدا بهذا العام واشعر بأن طيف الحبيب يقترب منى ,حتماَ سأرحب بالمجهول الذى طال انتظاره ولكن أين هو وما موعد مجيئه, سؤال الآيام القادمة وحدها هى التى ستجيب عليها...؟؟
23 سنة لسة بحب البحر واسكندرية وقطتى أيويا وكلية الإعلام والفيس بوك واصحاب ثانوى وابتدائى وشارعنا وحدائق القبة عند بيت جدتى ومدونتى الجميلة وشهر 7 لما بنروح العجمى والآيام الجميلة اللى بنقضيها هناك ومترو الآنفاق اللى الناس فيه كلها عاملين زى الدنيا بكل حكايتها والرسم والآلوان , وزهرة البنفسج الجميلة , وكلمة صباح الخير يا حياة اللى بحب اكتبها الصبح على صفحتى فى الفيس بوك ,وعبد الفتاح الجرينى اللى بمووت فيه , وصوت حنان ماضى اللى بتغنى للبحر حبيبى , وترام اسكندرية وغزل البنات, والايس كريم اللى باكله فى الشتا بس , والرخمة اسماء صحبتى, وميدان التحرير اللى خلانى لآول مرة انزل مظاهرات واقول يسقط حسنى مبارك وكل شباب وبنات بلدى الآحرار... ويوم الجمعة 11فبراير لما نزلنا كلنا نحتفل برحيل مبارك وغنينا كلنا فى وسط الناس وكتبت على العلم أنا مصرية حره والمطرب أحمد سعد اللى بتلقائيتى أول ما شوفتة قولتلة عايزين بقى اغنية وطنية ضحك معايا وقالى انتى عسل .., وكوباية النسكافية فى الفجرية مع سماع عبد الوهاب.... , وبالمرة الرجل اللى كان واقف ورا عمر سليمان ههههههههههههههههههه اللى ضحكنى من كتر الضحك اللى اتكتب عليه فى الفيس بوك , وتعظيم سلام للشهداء اللى ضحوا عشانى وعشانكم اللى عمرنا ما هننساهم ابداَ ..
كنت هنسى بحرى واحب مكان فى الدنيا لقلبى , والقاعدة فى الحسين وقت المغربية ليها طعم تانى برضه ...
23 سنة ولسة بحب اتفرج على فيلم عجميستا اللى بياخدنى معاه لشوارع العجمى وشخصية (هيبه) اللى بشوف فيها نفسى .. لما بيقول" لسة بحلم يوم بمرسى ومركب وصبية لية حياتى شايفها سد مش مهمة لآى حد",...
23 سنة ولسة بحلم يا بكرة تيجى احلى واحلى ولسة بقطف ورد البنفسج كل ما اشوفه ولسة بضحك كل ما يجى الصبح وتزقزق عصافيره , لسة بجرى تحت المطر زى طفلة صغيرة تدور تدور وهى بتحلم ان المطر يغسلها من كل شئ سرق فى يوم ضحكتها ونقاء قلبها.....كل سنة وأنتى طيبة يا أيوش....

هناك 15 تعليقًا:

Casper يقول...

كل سنة وحضرتك طيبة
ويارب يوفقك الى ما تطمحين إليه

مدونة رحلة حياه يقول...

السلام عليكم
كل سنة انت طيبة
تهناة منك ليك عقبال طول العمر
23سنة ولسة بحلم يا بكرة تيجى احلى واحلى ولسة بقطف ورد البنفسج كل ما اشوفه ولسة بضحك كل ما يجى الصبح وتزقزق عصافيره , لسة بجرى تحت المطر زى طفلة صغيرة تدور تدور وهى بتحلم ان المطر يغسلها من كل شئ سرق فى يوم ضحكتها ونقاء قلبها.....كل سنة وأنتى طيبة يا أيوش

سواح في ملك الله- يقول...

كل سنة وانتي طيبة
والسنة الجاية انشاء الله
تبقي اجمل واحسن
تحيتي

شيرين سامي يقول...

كل سنه و انت طيبه و سعيده ومشرقه دائماً و أكيد انسانه متفاءله زيك أيامه الجايه كلها هتبقى سعاده ان شاء الله

غير معرف يقول...

وهذا جيد إيفاد آخر ساعدني كثيرا في دراستي assignement. الامتنان لكم والمعلومات الخاصة بك.

وجع البنفسج يقول...

كل ذكرى مولد وانت بخير ،، يارب يحقق كل امانيك وتزيد عدد سنين فرحك بدل ثلاثة لثلاثين بعد المائة.

BNT ELISLAM يقول...

كل سنه وحضرتك طيبه ويارب عقبال المليون





واسفه على تاخير وكتير عجبتنى المدونه اوى
احترامى لحضرتك

بنوتة مصرية يقول...

casper:
وحضرتك بالف خير وسعادة
اشكرك اخى اللهم امين واياك يارب

شكرا لمرورك الطيب

بنوتة مصرية يقول...

رحلة حياة:
وعليكم السلام ورحمة الله وبركاتة
شكرا لمرورك اخى الكريم

تحياتى لك

بنوتة مصرية يقول...

سواح فى ملك الله:
وحضرتك بالف خير وسعادة
ان شاء الله سنوات القادمة تكون احلى سنوات عمرنا
بارك الله فيك

شكراَ لك

بنوتة مصرية يقول...

شرين سامى:
وحضرتك طيبة وبخير عزيزتى الدكتورة شرين اعزك الله واكرمك .. التفاءل هو حياتى .. فاعلم ان رزقى لن يأخذة غيرى فيطمئن قلبى فلذلك انا متفائله دايما

شكرا لمرورك الرقيق

بنوتة مصرية يقول...

غير معروف :

كنت اود ان اعرف اسمك .
وسعيدة انى ساعدت بكلماتى هذه فى دراستك

شكرا لمرورك

بنوتة مصرية يقول...

وجع البنفسج:

وحضرتك طيبة وبالف خير وسعادة اسعدتنى زيارتك وكلماتك ..

تحياتى لك عزيزتى

بنوتة مصرية يقول...

بنت الإسلام:

وحضرتك طيبة وبخير اشكرك اخيتى لكن مليون كتير اوى كدة هبقا من الحفريات هههه

لا ابداَ انتى متأخرتيش تكفى كلمتك الطيبة يا عزيزتى .. فالكلمة الطيبة صدقة ..

اسعدتنى زيارتك لمدونتى البسيطة ..

ولكى منى كل الحب والآحترام

محمد يقول...

كل سنة و انتى طيبة يا أية

حقوق النشر محفوظة لصاحب المدونة. يتم التشغيل بواسطة Blogger.

مريومتي

مريومتي

وردي الرقيق :)

وردي الرقيق :)

بحب البنفسج

بحب البنفسج
صورتها من حديقة الكلية 2010

من أنا

صورتي
أنا من تخوض الحياة ببرأة الآطفال وطموحاتها لا تمنعها اسوار ولا يصد هدفها الجبال كالطير المهاجر بين الآوطان... ..................... آية ده إسمي .. بنوتة بسيطة جدا لا أحب الكلكعه ولا الناس اللي عايشة في الدور .. هادية وشقية ومعرفش إزاي .. أنا إعلامية يعني خريجة إعلام جامعة القاهرة ..

Translate

إجمالي مرات مشاهدة الصفحة

About this blog



أنا من تخوض الحياة ببرأة الآطفال وطموحها لا تمنعها أسوار ولا يصد لهدفها الجبال كالطير المهاجر بين الآوطان .. أنا من تعشق الحياة بكل ما فيها تحلم مع البحر وترسم فوق الرمال قلبها الرقيق..تحمل روحها الجميلة أينما تكون تزرع فى كل مكان وردة وفى كل قلب ذكرى..شقية احياناَ هادئة احيانا ..لكن هذة أنا.. وغيرى أنا ما أكون...
فقد صنعت لنفسى كون وحياة فيه اشيائى وفيه أعيش وحدى..
************ يارب سبحانك بينى وبين الناس فى دنيتك احوال وانت اللى عالم بضعفى ياذا الجلال والكمال خلينى عبدك لوحدك لاعبد جاه ولا مال واحمينى من الحقد من نفسى من قالو وقلنا وقال يارب سبحانك ...

Blog Archive

Followers