الناس الطيبة

أكتر شيء صعب  بجد إن يوحشك حد مش هتقدر تقوم تتصل به أو تاخد عربيتك وتنزل تروح له لآنه مات ، تخيل بعد كل الوقت واللهو والدنيا الي بتلعب بينا وتنسينا حبايبنا لحد ما يروحوا مننا وبعد كدة نفوق  نلاقيهم ماتوا راحوا لمكان أحسن من الباطل الي احنا عايشين فيه وبإيه يفيد البكا خلاص اللي كنا متاكدين من حبهم لينا فعلا نسيناهم في الزحمة ولما أفتكرنا كانوا ماتوا !! لحظة الندم قادرة تقتلنا في كل مرة نفتكرهم..







                                                                         

أن تستهلك نفسياً

 أن تستهلك نفسيا  في هذة البيئة العفنه  وتحاول أن تمنح لنفسك بعض من أحلام المثاليه في جو غير مثالي بالمرة كمصر - مرض كبير بيهاجمك دايما وفي كل مرة بتحاول تصنع جو مثالي في بيئة ومجتمع يستهزء بالطيبه والافكار النبيله ويمجد للمنافق والمطبلاتي وسيء الآخلاق والعدو ،أن تستهلك نفسياً في كل مرة تحاول تعيش كبني أدم راقي بأخلاقك ودينك ، وبشكل تلقائي تنعزل عن كل شيء دون إرادة منك وتبتدي رحلة اللامبالاة

البيت الكبير ...

ثلاث شهور وأكون قد أكملت من عمري 28 سنه ومازال بيت أبي هو بيتي الآكبر على الآطلاق ولا يمثله أي بيت أخر كبيت الزوج مثلا في الآحتواء والحب فهذا البيت شاهد على طفولتي وعلى مراهقتي وعلى كل سنوات عمري التي عشتها مهما كان قديم وسيصبح بمرور الآيام بيت مهجور لكنه بيتي الذي أعتز به دوما في كل ركن من أركان هذا البيت أرى أبي يجلس وأرى أمى تنادي أراها وهي تصحبني أرى أخي الآكبر يذاكر ترتسم لي كل صورهم القديمة المحفورة بداخلي ، رحل أبي وأنا في عمر الزهور ورحلت أمي بعده ولزال البيت بيتي رغم رحيل أحبائي لا أتمنى بيت أبي يكون كبيت جدي المهجور الآن فكل أحفاد أبي قد كبروا وقد أختلفت الحياة مع أبنائه والدوامة أخدتهم لكني أنا لا أري بيت يتسع وجودي غيرة ، جدران البيت القديم حفظت ذكراك يا أبي ويا أمي 

ربنا يسامحك يا صحبتي ......... :( 

بتكلم من جوايا ....

إنتي عارفه إيه مشكلتك إنك دايما وعلطول بتبحثي على الشيء الصح في المكان الغلط إنتي دايما شايفة الناس أبطال لحواديت إنتي ياما سمعتيها وإنتي صغيرة من أمك الله يرحمها عشان كده كبرتي وتخيلتي إن الناس شبه حواديتك اللي حبتيها نسجتي من الخيال واقع وعيشتي فيه ترسمي المثالية المفتقدة جوه قلوب بشر متعرفش المعاني اللي بتتكلمي عنها دي، وبعد كده جاية تلومي حواديتك البريئة الطيبة الصادقة يا بنتي دول حواديت خيال يعني فاكرة صحبتك لما قالتلك قبل كده كلمة وضايقتك وقتها وأعتبرتيها بتسخر من رقتك دي لما قالتلك " إنتي لو ماشية قطة في الشارع هتحبيها وهتتعلقي بيها " .

دلوقتي بس تقدري تقولي إنها مكدبتش عليكي لما قالتلك كده أصلها شافت اللي إنتي معرفتيش تشوفيه لحد دلوقتي دي حتى صحبتك دي من كتر واقعيتها كانت أول الناس اللي باعتك وسابتك لوحدك في الطريق وإنتي بقى كنتي بتعتبريها الحدوتة الحلوة اللي في حياتك .

يا بنتي الدنيا دي مش زي ما انتي شايفاها كده حلوة وفيها ناس أحلي بصي عشان تبقي واخدة بالك أنا مش بقولك إتشأمي وأعتزلي الناس أنا بقولك كده من باب إني بحبك صدقيني مش هكدب عليكي زيهم هما إتعودوا يضحكوا في وشك الضاحك ده عشان يسرقوكي أيوة كانوا عاوزين يسرقوا منك قلبك الجميل النضيف وطيبتك النادرة دي أصل هما ناس مفهومش من روحك ولا حبك للحياة دول ناس معقدة كانوا محتاجين وردة زيك تبقى معاهم ياخدوا عطرها وبعدين يمشوا .

بصي من الآخر كده أحلمي زي ما أنتي عايزة وأكتبي حواديت كمان زي ما أنتي عايزة بس خلي دايما الإمضاء من الواقع .

نفس المكان

تمهيد ...

" كان ياما كان يا سادة يا كرام , و ما يطيب الكلام إلا بذكر النبى قولو عليه الصلاة والسلام يا ولاد" ... أقول عليه الصلاة والسلام وأنا على مقعدى بجوار الراديو فى بيتنا الصغير أسمع الحكاية وأطلق لخيالى العنان....
"كان ياما كان, كان فى رجل شقيان عنده من البنات أثنين بنت إسمها شمس الشموس تحب تلعب فى البستان تحن على الحيوان وتسقى غصن الورد وتسمع الكلام وبنت إسمها ........"  قبل ما تكمل الحكاية كنت صغيرة أقفز من مقعدى أردد "أريد أن أكون شمس الشموس وألعب فى البستان " ....كبرت ولم تكبر بداخلى الحكاية ظل عالم الحواديت وحده هو البستان وكنت أنا فيه شمس الشموس هنا أسرح بخيالى كما أشاء وفى عالم الحواديت يكون النور نبيلا فى إنتصاره لا ينتقم من الظلام ,لا يدس عليه بالآقدام... فى عالم الحواديت الحب براءة و البراءة طفولة و الطفولة عهدها بنا أيام قليله وتنقضى فى مدونتها كتبت مراراً وتكراراً عن قصص الحب كانت ترى فى كل قصة تخطها أناملها بإن النهايات دائما لا تأتى بقدر وجمال البدايات خيالها ككاتبة قصص كان يرى إن اللحظة الآدبيه تولد من الآلم.. وحده الآلم كان الباعث الآساسى فى تحريك أبطال قصصها وفى يوم عاصف لم تدر كاتبة الحواديت إنها هى الآخرى ستكون البطله فى قصة قصيرة لم تشأ لها الآقدار أن تكتمل  قال أبى ذات يوم "هذة هى الحياة يوم نزاع ويوم وداع" أطلبى لمن تفارقين الرحمة لا حزن مثل حزن الصغار حزن نقى يدركونه بالغريزة كنت أنا كذلك فى نهاية القصة نفحت قلبى المثقل نفحة من الشوق إلى كل الحواديت التى أمطرت طفولتى بالحب أودعتها سلام عزيز من قلب فتاة أدركت الآن أن كل قصص الحب التى كتبتها وتخيلاتها لم تكن إلا خيال لا يمت للواقع بصلة وإن الواقع تتحكم فيه الناس كل على قدر ما يريد فى دنيا الواقع رأت فتاة تتألم ولا يشعر أحد وشاب يكابد مشقة الوصول إلى حلمه ولا يدركه وأباء يتحكمون فى مصير أولادهم لا يتركون لهم أى حق بخوض أى معركه ......

" عمرى اللى فات و الذكريات كانوا هنا..و انت بعيد قلبى غريب و أنا مش أنا .... "
من فضلك يا اسطى أخفض صوت الردايو الطريق إلى المطار طويل ونريد ألا ننزعج , قاطعتهم مخاطبه سائق التاكسى لا من فضلك لو سمحت أترك هذة الآغنيه أود سمعها تسللت بعيناها خارج نافذة التاكسى أبت ألا تسجل أى مشاهد فى ذاكرتها للطريق الموصل إلى المطار كانت كلمات أغنية عمرو دياب تخترق مسامعها لتنفذ إلى قلبها موقظة كل ما قد سلف من أحداث سبقت لحظة الرحيل من الوطن , عادت بذاكرتها سنه إلى الوراء,تبسمت وجنتيها ....تذكرت صورته
مضى ومضت كل أيامهما معا...صاروا ذكرى لن تعود..

2008

 
سلامات للذكرى اللي كل ما افتكرها يرجع بيا الزمن وأفتكر،،، الدنيا اخدت ناس كتير وجابت ناس لكن اللي راحو ميتعوضوش 2008 و2007 وأصحاب العمر اللي بجد تحياتي ليكم ولذكراكم والله يرحم اللي ودعني ومات بس لسه عايش جوايا .. الصداقه دلوقتي بقيت مهنة متهانه اوي عشان كده تحياتي لسنين من عمري راحت خلاص.. 

إنسان ...

 كان لازمتها إيه الحدوته دي .. إستفدت إيه ؟ 

إستفدت تجربة عرفت انى أقدر أحب وأقدر أضحى و أقدر أحلم من جديد عرفت إن أنا إنسان ....

إلى من لا يأتي...!

إنك تكون غيرهم ده بيخليني أتحمل شويه وأصبر وأقول ده غيرهم كلهم هو ليا أنا

 إنك تكون بتعرف ترسم ضحكتي ده يخليني محبش غيرك أنت متتصورش يعني إيه تكون غيرهم ،طيب وحنين وبتكره الكدب والفراق زي، هما عملوا كل شيء عشان يخسروني لكن أنت عرفت إزاي تحافظ على وجودي معاك وعشان كده أنت غيرهم ،الحكايه مش كونك مختلف عنهم الحكايه إنك ضحكة بتسعدني كل صباح وإنك همسه بتطمني، أنت بالنسبالي وطن الأمان على كوكبي الصغير وصدقني هما الخسرانين وأنا الكسبانه بيك أنت ..

وسط الزحمة..

 ولما وصلت موبايلها رن بنغمة هي دايما بتحبها " عصفور طل من الشباك " هي دايما بتحب الحاجات اللي بتشبه ملامحها الهادية البسيطة ، الدنيا دايما بتصالحها بالحب اللي بتبعتهولها من وقت للتاني ، الظاهر إن الأمل دايما مصاحب روحها وبيوعدها بالأحلام ، رن موبايلها وملحقتش ترد رن تاني .... 

اهو كلام ..

قلبي بردان أكتر من برد الشتا ،

لســـه فــاكــر ...

 وبعدين لسه فاكره إنك... هي مبقتش زي زمان أوى بقيت عصبيه كتير مهمله وكسوله هي تايهه حواليها مليون حاجة متشبهاش حاولت تتعرف علي نفسها اللي تاهت ارهقت من كتر ما دورت وتاهت اكتر ،، هي بني أدمه رقيقه بني أدمه مختلفه لكن  هي تعبت فقرر تبعد عن العالم الملل المتكرر بشخوصه وتفاصيله لما بعدت تاهت ومعرفتش ترجع تاني ويوم ما حاولت وقعت كانت هتموت من كتر الوجوه الملونه اللي حواليها فرجعت تاني للعالم الصغير اللي قررت تعيش فيه لوحدها ،، حتى الذكريات سابتها مش فاكرة منها غير خيالات وفي الغالب اصحاب الخيالات دول ماتوا ،، ماتوا جواها زي ما هي ماتت جواها أحلامها ،، هي حاولت كتير متستسلمش لكن مقدرتش تواجه مجتمع بيقتل اللي زيها بسمومه ،، مشيت لبعيد وقررت انها مترجعش للابد ،، وفي عز الوحدة اللي قوقعت نفسها فيها لاقيت آمل بينادي عليها هي بالتحديد ،، إستغربت ان لسه في حد فاكرها وممكن يهتم بيها ،، اندهشت إنه بيناديها بأسمها اللي دايما كانوا اعز الناس عندها بينادوها به ،، كانت مترددة ترد عليه خايفة ليكون آمل كداب زي كل اللي فات ،، مش عارفه كانت خايفة تكون بالشجاعة دي وترد وبعدين تتألم ،، جمعت كل قواها وقررت ترد وتخرج للدنيا من تاني بعد ما كانت بره الدنيا اللي سئمت منها ومن اهلها الآنانيين ،، بس هي مش عارفه برضو ترجع زي ما كانت صحبة القلب الصافي البريء مش عارفه ترجع لطفولتها اللي اتجرحت ،، مصدقت الآمل دق على بابها لكن حاجز الخوف بينهم ..

الناس فى متــرو الأنفاق.....

ناس لا تنسى ..

قالولي بكرة تنسي ده النسيان نعمة ،ومبنساش مبقدرش أنساك إنت جوايا يا غالي .
إللي عرفوك قالوا ولد مفيش منه إثنين قالوا جدع وطيب القلب وحنين قالوا فراقه ألمنا
قالوا وقالوا وقالوا ....
ومهما قالوا مش هيوصفوا حزني وصدمتي لما قالوا مات ..
أحمد فراقك مش ألمني لا فراقك قتلني مبتصورش للحظة إنك مش هنا مش هتكلمني مش هتطمن عليا .. صحيح فترات كتير كنا بننشغل بالحياة وإللي بيحصلنا فيها .. لكن كنا بترجع تجمعنا الأيام من تاني ..
رمضان 2014 كان أخر رمضان تقولي فيه كل سنه وإنتي طيبه كنت بتودعني لما طلبت مني مزعلش منك في تقصيرك في السؤال عني كنت بتقولي إنتي أجدع مني متزعليش كنت بتضحك الضحكة تطلع من القلب .. كانت لحظات كلمتني فيها لكن لحظات بكل العمر كنت سعيدة وفرحانه بسؤالك وكلامك ليا ..
"ثاني يوم رمضان "
أحمد مات في 30/6/2014
أحمد قبل ما يموت بساعات كان موجود وبيضحك ورايح شغله ..
"يوم وقفة العيد الصغير "
الو الو الو آيه فينك إنتي متعرفيش .. أنا: أعرف إيه حصل إيه ..
بجد متعرفيش .. ده أحمد .. مالوا أحمد ..أحمد مات يا آيه :( :(
لا محدش يقول إن أحمد فتوح مات أخويا الجميل الطيب ..
في إنهيار بكلم نفسي ليه إللي بحبهم بيسبوني  ويمشوا بيرحلوا ويسبوني طيب مين هيسأل عليا طب مين هيكلمني طب مين هيسمعني لما اكون زعلانه طب مين هيشاركني فرحتي طب مين هيحس بيا من غير ما اتكلم ..
قالوا النسيان نعمة قولتلهم صعب تنسى لحظات عمرك مع ناس حبيتك بصدق بتسأل عنك من غير مصلحة ناس دخلت حياتك وتركت أثر جميل ورحلوا في صمت..
ناس شركتك أيام البراءة وإنت زهرة لسه بتتفتح للدنيا ناس شبهك في أخلاقك وروحك وطيبتك ..
أحمد مهما وصفوه مش هيعرفوا .. البراءة والطيبه والقلب النقي أحمد " 8 " سنين وأكثر أحمد زميل جامعة واحده كان أكثر من أخي ماكنش بيخبي عني أي شيء
ربي يعلم حزني وتألمي الشديد لفراقك يا غالي ..
اللهم أرحم أحمد وأجعل مثواه الجنة

أخر أيام الصيفية ....

 وكنا نتحادث سويا في مساء كل يوم ،تدق الساعة  العاشرة ليلا وأنتظر مهاتفته ،أذكر إنه لم يكن لطيفا في حديثه ، كثير التذمر ، دائم الشكوى،لا يمّل من لعن تلك البلد التي ساقته الأقدار ليكون أحد أبنائها ،لا أدري ما الذي كان يخفيه وراء تلك الأحاديث المتكررة عن فتاة أحلامه الغير عادية وعن اختناقات القاهرة وزحامها الشديد الذي يعكر صفو تنقلاته بين الأمكنه ، وعن حنينه الدائم لوالده رحمه الله ...
كنت أتحمل إنتقاده الدائم لشخصيتي،المنغلقة على حد تعبيره ، ولا أنصب من نفسي أنا الأخرى قاض يضع الأحكام دون أي روية ،فلم أقدم يوما على وصفه بأي صفة تنتقص من شخصه ، كنت أستمع فقط لأستطيع فك شفرات تلك الشخصية وكنت على يقين تام إن هناك ما يخفيه هذا الرجل خلف لسانه السليط ...
كان ما يظهر ليّ في محادثاته شخص قوي الشخصية لا يبالي لأراء الناس بل وجود الأخرين بحياته أمر لا قيمة له ، لكني كنت خلف كل ذلك أرى رجلا أنهكته الحياة والإغتراب، كنت أرى قلب يتمرد على الضعف الذي يعتري المحبين فيرفض وجود الحب لئلا يشعر بالإحتياج لطرف أخر يستنفذ أي من رصيد حبه لذاته ،أذكر إني أحيانا وسط آناته وصمته كنت ألمح بعض من الطيبة والحنان، لم أقتنع بإنه مثقف بالقدر الذي كان يصف نفسه به، تستطيع أن تلمح من خلال مناقشاته راجل غير واسع الإطلاع، لم تستمر محادثتنا طويلا فسرعان ما دبّ الملل من أحاديثه المتكررة وإستئثاره بأن يكون المتحدث الوحيد كما الحاكم بأمره ، تركته يبني أحكام وأفكار مغلوطة عني ليتسنى لي معرفة طريقة تفكيره ، كنت أضحك كثيرا على أراءه الغير خاضعه لأحكام العقل والمنطق لم يكن الفارق العمري بيننا بحائل ألا أفهمه... لم يكن يفطن للسؤال المفروض على كلانا, لماذا أتمسك بمحادثته رغم  كل ذلك ؟، كان يظن حالي مغرمة به ومولعة بحديثة وهذا منحنى أخر يؤكد ما ذكرته عن أفكاره المغلوطة فكيف له أن يؤول ذلك على إنه حب ، رغم علمه بأن الحب لا يولد وسط الجفاء ...
كنت فقط أفكر بالشكل العقلاني الذي أنكره علي و وصفني بالخيالية ، كنت أتعقل الأمر بالشكل الكامل لئلا أخسر إنسان ربما كان هو من أنتظره ...
ومع مرور الوقت تيقنت تماما إنه ليس الحلم المنتظر ، الغريب إنه كان ولأخر وقت يعتقد غير ذلك لم أستطع أن أفسر له وتركته على جهالته ...
علمت بسفره الذي يقترب ،إبتسمت وقولت في نفسي ، الأن ها قد تخلص من كل ما يؤرقه لعل عودته للإغتراب تجعله يرى ما أحجم عينه عن رؤياه ...
في سيارتي كانت فيروز تشدو آخر أيام الصيفية ، أنطلقت معها أطوي تلك الأيام العجيبة وأنا كلي ثقة بأن الأجمل لم يأتي بعد ...

:)

سافر عند القمر 

سباق أيهما أفضل .. !

و أنا مش هرتبط بيكى لإنك أحلى شكلا و إنك متميزة في كل صفاتك الاجتماعية و العلمية و لإنك و..و.. عشان لو أخضعتك لكل حسابات المفاضلة هلاقي أكيد ناس أفضل منك و هظلمك فى حسابات بتعتمد بشكل بحت على الماديات التي لا يتخللها أي عاطفة و شعور ,,أنا هرتبط بيكي لإنك إنتى اللى بحبها ولإن الحب مش المرايا العميا زى ما بيوصفوه ,الحب هو درجة الفهم اللى ولدت العاطفة بينا و خلتنى أنسى كل اللى اتكلمت عنه وحفظتك من رهانات وسباق أيهما أفضل

أثابك الله خيرا يا زياد

اليوم الأول من الدراسة الجميع في كامل لياقته الطلبة والمدرسين حتي أسوار وفصول المدرسة بَدت هي الآخرى في كامل لياقتها،يصعد ناظر المدرس الدرج ممسكا بلافتة بيضاء مكتوب بها " أثابك الله خيرا يا زياد " , أندهش التلاميذ وأخذوا يتهامسون من هو زياد ؟ ولماذا يصر ناظر المدرسة علي وضع تلك اللافته في صدر فناء المدرسة إلتقط الناظر دهشة التلاميذ وأعقب في المذياع اليوم "لا دراسة سنتعرف جميعاً علي زياد" , وأردف الطلاب بالإنتباه وصعد المدرس الأول للغة العربية الأستاذ حسن ملبيا لدعوة الناظر وبدأ في سرد حكاية اللافتة من زياد ولماذا يحتفون به اليوم؟
 القصة تبدأ أحداثها في عام 1999 حينما التحق زياد بالصف الأول الأبتدائي تلميذ صغير أتسم بالذكاء المتقد وحب مدرسينه له لنشاطه و تفوقه.
 رغم صغر سنه إلا إنه ومنذ أول عام دراسي له أبدى إستعداد لتكوين صورة مثالية لتلميذ نجيب مرت السنة الأولى،وأصبح زياد في الصف الثاني الأبتدائي وفي احدى أيامه الدراسية كان الدرس المقرر عليهم هو "سورة العلق" زياد الصغير كان كسائر التلاميذ الصغار يحفظ بالتلقين لا شرح ولا تفسير، مادة التربية الإسلامية في المدارس الحكومية المصرية هي مادة لا تضاف لمجموع درجات الطالب ولا تؤثر في ترتيبه الدراسي بين أقرانه,  مادة التربية الإسلامية في المدارس الإلزامية المصرية  بعيدا عن التعليم الأزهري مادة مهمشة و لا يلتفت لها و لا لكيفية تدريسها و من الموكل له القيام بذلك،هكذا اقتضت الضوابط التي ينظمها مشرفو العملية التعليمية في جمهورية مصر العربية بأعتبارها مادة  لا تعيرها وزارة التربية والتعليم أي اهتمام حتي إنه مدرس اللغة العربية هو نفسه المكلف بتدريس مادة التربية الإسلامية..
في أثناء الحصة كان كلما قرأ المدرس أول سورة العلق بداياً بالكلمة ذات الحروف الآربع "أقرأ"  يلهب خيال بطلنا الصغير المتطلع لأسباب نزول الأيات و مكان نزولها و تفسيرها لم يذكر المدرس شئ سوي ان تلك الآيات هي أول ما أنُزل على رسولنا الكريم في غار حراء ولم يذكر للتلاميذ باقي ما حدث , الصغار يملكون عالم من الخيال يسكنه الشغف والفضول فأبي عقل زياد أن يحفظ سورة العلق دون أن يعرف ماذا كان بعد إقرأ عاد إلي بيته وعلامات الإستفهام تدور برأس صغيرنا ليسأل والده عن سورة العلق,أصر الولد يومها أن يصطحب زياد لجاره فريد الانصاري أستاذ التفسير في جامعة الأزهر ليعَلم صغيره زياد التأويل الصحيح لسورة العلق، وهنا كان الحدث الفارق في حياة التلميذ الصغير الذي تعلم ما تجهله أمة "أقرأ" على يد السيد فريد الانصاري ,حَدثه حيناها عن أول آيات القرءان التي أُنزلت على رسولنا الكريم،حينما جاءه سيدنا جبريل بالرسالة، وأمره أن يقرأ، فامتنع، وقال: ( ما أنا بقارئ) فلم يزل به حتى قرأ. فأنزل الله عليه: ( اقْرَأْ بِاسْمِ رَبِّكَ الَّذِي خَلَقَ),الله الذي أخرجه من بطن أمه لا يعلم شيئًا، وجعل له السمع والبصر والفؤاد، ويسر له أسباب العلم. فعلمه القرآن، وعلمه الحكمة، وعلمه بالقلم، الذي به تحفظ به العلوم، وتضبط الحقوق.
في اليوم التالي ذهب زياد للمدرسة مزهوا، يشعر بأن هناك شيء في عقله تدبره بالأمس جعله بين أقرانه كشعاع يضيء وسط ظلمة، وما أنفك يُخبر كل أصدقائه في الفصل عن الذي جرى في منزل السيد فريد الانصاري ويشرح لهم الدرس الذي ما أستطاع مدرس الفصل أن يفيه حقه,و هنا كانت الثمرة الأولى لتعَلُم بطلنا الصغير في أن ينشر ما تعلمه للجميع،ليدركوا قيمة النعمة التي منَّ عليهم المولى عز وجل بها،حتى إن تلاميذ الفصول المجاورة سمعوا عن زياد الصغير الذي يشرح تفسير سورة العلق و يوجه أقرانه للقراءة، 

مما أعجبني ..

إلي صاحبة الضحكات الساخرة .. وحشتنا إبتسامتك ..

كنت أغرد معها يومياً في النافذة... آراها تستتر خلف الستار ضاحكة علي منظري وأنا أحتسي القهوة التي ما تلبث أن تغرق صفحات الجريدة من هول ما كنت أقرأ علي صفحات الكذب القومي يوميا ..
 كنت ألمح بقايا تلك الضحكات وهي تخفت مع أول نداء من والدتها لها، أما هي كانت تصر علي أن تتجاهل صيحات الآم وتحملق من النافذة لئلا يفوتها ذاك المشهد اليومي ولربما سعدها الحظ وأستطعت رشف قهوتي دون أن أرتكب أي حوادث ..
فتاة تعدت العشرين بأشهر قليلة ..بُرعم صغير في ينبوع الحياة، ذات وجه صبوح أظنه لم تعتريه التكشيرة يوما...
 ضحكاتها رغم سخرية ما كان يطلقها إلا إنك لم تكن لتملك إلا أن تستمع لتغريدها أعتدت علي سماعها وكأنها تطلق صفارة بدء يومي..
فتصيح، إنهض فإن صباحك قد بدأ ..

ان حبيت اوعي تخبي ...

ان حبيت اوعي تخبي اعلن حبك وافرح به , اعلن فرحك لكل الدنيا وعيش ايامك , ياما ايام بتيجي علينا واحنا لوحدنا عشان كده اوعي تخبي احساسك بالفرحه ومشاعرك البريئة , الفرحه زي طفلة صغيرة محتاجة مننا اننا نخلي بالنا منها وان دقت علي قلوبنا نفتح لها علطول بدون تردد , الحزن قاسي وبيكرهنا ..
ليه لما بنكره بندمر ولما بنحب بنخاف.. ؟ الحب حياة والخوف دايما جبان ..

صحبتي بحبك أووووووووووى

عن قلب انت بتعشقة من كتر ما هو طيب كده وضحكته بتخلي للحياة معني,
 عنك يا صحبتي بتكلم عن البنت اللي عندها صدق وامانه واحترام ربنا يخليكي ليا , وعلي فكرة بقي 

ضحكتنا المسروقة ..

 القسوة هي انك تبعد نفسك عن اشيائك والحاجات الصغيرة اللي انت بتحبها واللي هي مكتوبه علي اسمك انت  ببساطة هي اللي بتميزك عن غيرك , لما بتحاول تبعد عن طبيعتك دي وتلبس قناع تاني فيه من الجدية و في الاساس انت شخصية مرحة وبسيطة وطفولية.. بتتعب كتير اوي و بتحس انك مش انت ,حتي لما بتفكر تغير الوان اللبس اللي انت بتحبها ومتعود عليها وتروح تشوف نفسك في المرايا  عشان تحاول تلاقي فيها اللي يقنعك قد ايه انت جميل ومحصلتش وانك اسعد انسان في الدنيا بتقنع نفسك ببتسامة بهتانه انها مناسبة عليك لكن من جواك رافض انك تكون كدة بس عشان المجتمع مريض بالافكار الكتير الغريبة والناس الاغرب اللي بيخلونا نعيش غربه جوانا محناش عارفين نتعرف علي روحنا الحقيقية ولا قادرين نحس بأي سعادة .. وفي الغالب بتكون الناس اللي عرفتنا بحاجة اسمها قسوة هما نفس الناس اللي كانوا بيقولوا انهم حبايبنا عشان كده مبنستغربش لما انسان كله حيوية ومرح فجأة تحول لشخص تاني شارد مع الحياة وامواجها بترسيه علي شواطئ كتير وعمره ما بيفكر ينزل من المركب قبل ما تغرق به ببساطة لانه مش حاسس انه موجود  ومش فاهم  لسه بيدور علي ضحكتة الجميلة اللي اتسرقت منه بيحاول يلاقيها بس مش عارف .. الروح اللي ساكنه جواه روح مجروحه محتاجة حنان وامان  والقسوة اكتر حاجة ممكن تدمر طبيعية انسان رقيق و بسيط ..

 نفسي :عن إحساس التوهان والحيرة اللي لازماكي الآيام دي يا آيوش , مش هينتهي ويروح لحال سبيله بقي ولا إيه ,

 آيوش: تنهيدة ونظرة حزينه مش عارفه

نفسي: يا ستي محدش واخد منها حاجة

آيوش: بس أسكتي وإنتي فاهمه حاجة

نفسي: أنا فاهمه وعارفه بس مش بحب أشوفك كده

آيوش: لما تفقدي آية هتعرفي يعني إيه توهان وحيرة

نفسي: مقدرش أنا إنتي وطيبين زي بعض مش كده ولا ايه يا توته ؟

آيوش : ما الطيبه هي السبب أسكتي إنتي السبب إنتي السبب

نفسي: أنا سبب في إن الناس تحبك

آيوش: ده كلام محدش بيحبني دول كدابين فاكرين القلوب الطيبه لعبه

نفسي: ما تزعليش من شوية الناس الفالصوا أيامهم بتعدي  

سامحكم  الله يا صانعي عالم الحزن واﻵكتأب يا من تبعثرون دموعكم وتجاربكم القاسية علي عالمنا البرئ ، الضحكة ﻻ تساوي سوي ثواني من الحياة لن تتمكنوا من نشر عالمكم القاسي داخلي ، ببساطة ﻵني إنسان محبه للحياة بكل مفرادتها لن تنالوا من أحلامي وضحاكتي أبدا مازلت شمس أﻻمل تشرق لتبهجني

عن ناس بحبها

أنا بحبك أوي عشان إنتي حد طيب وحنون ومتدين و دايما كلامك في ذكر لله , أنا بحبك عشان يوم ما أتعرفت عليكي كنا مختلفين لكن لما قربت منك بقيتي حد بحب أشوفه وأسمعه كتير , إنتي كنتي من الناس القلائل اللي لما أشوفها بحس بأمان الحياة وسلامها , أنا حلمت بيكي النهاردة وكنتي فرحانه أوي بيا إنتي وحشتيني أوي ونفسي أشوفك أنا بحبك أوي عشان إنتي كنتي حنينه عليا أنا مش بنساكي , بدعيلك من قلبي اللي حبك وحب فيكي كرم أخلاقك الراقية النادرة في زمنا .. ياريت كلامي اللي بكتبه عشانك ده يوصلك يا ريتك تشوفيه وتعرفي إنك حد أجمل من إنه يوصف بأي كلام .. أحبك في الله يا درة الحياة 

لن يضّيع الله حبي ..

كنت أتمتم بتلك الكلمات حين قرر هو الفراق أبتسم قليلاً, أبكي كثيراً و أردد والدموع تختلج نبضات قلبي " لن يضّيع الله حبي " لن يضّيع ربي قلباً أحب في الله بصدق صدقت نواياه فصدق عمله ,, ستمر السنين وستصبح تلك الكلمات التي أكتبها ذكرى وسأظل أردد لن يضّيع الله حبي , سيبدأ عام جديد بعد أيام قليلة , عام أخر من الغياب , مازال القلب يحتفظ ... !, مازالت أماكنكم في القلب تنشد البقاء لكل من أحببت أنتي يا صديقتي يا صاحبة القلب الطيب , و أنت أبي رحمك الله تشغل في قلبي الحيز الذي يتسع للسنوات القليلة من عمري التي صاحبتني فيها , أمي يا جنة الدنيا متي اللقاء يا غاليتي أستوحشك قلبي الصغير مازالتي يا أمي بعد رحيلك صاحبة النصيب الآكبر في قلبي وحدك تتربعين فيه , أما أنت يا صاح الغياب ترانا سنلتقي .. !!

عمرو

لما قالت صعب تبعد وانت روحك فيا انا. غصب عني لقتني بعند قولت هبعد 100 سنة

الناس الطيبة هدية من الرحمن ....

 عن الناس الموجودين في محيط حياتك من معارف و أحباب و إنت شايف وجودهم في حياتك بشكل عادي إتعودت عليه مع الوقت من غير ما تسأل نفسك أد ايه و جودهم بيسعدك و فجاءة الناس دى تموت و ترحل من حياتك و من الدنيا دى..و تبتدى تفتكر أد ايه الناس دي كانوا طيبيين و مسمعتش منهم غير كل كلام طيب و كان وجودهم مش مجرد تعود و خلاص ده كان حب و جزء كبير من السعادة اللي بتشكل حياتك ..اللهم أرحم كل
عزيز غالي فارقنا

الشيخ محمد

هو من الناس اللي بتعدي مرة واحدة في الحياة تدينا شوية سعادة مع كام احساس لذيذ كالطمئنينه وبعدين يختفي للابد . متشفهوش تاني هو الشخص اللي يحبك من غير مقابل ينصحك بخوف وقلق و يسأل عليك, الشخص ده معطاء دايما لكل اللي يعرفهم وحنين وطيب ومحبوب من كل الناس الشخص ده في وجهه سماحة لا توصف رضا الرحمن عليه  واضح ,هتلاقيه دايما بيضحك وسباق في الخير الشخص ده حافظ كتاب الله وعنده علم الدين الشخص ده متواضع وبسيط وهادي في كلامه مع الناس الشخص ده كل اللي يشوفه من قبل ما يكلمه يحبه هو شخص لا يغيب عن البال وتمر صورته أمامي دائما لا تفارقني الشخص ده اتعلمت منه ما ينفعني في ديني ودنيتي الشخص ده عابر ولكنه حاضر الشخص ده اسمه الشيخ محمد ..  لو تمنيت ما تمنيت إلا رؤيتك .. اللهم فرج كربه وأزال همه وحزنه وبارك الله في علمه وأنفع به الناس .

دنيتي اللي بحبها .. ♥

عارف ياللي إسمك إيه انت مهما تبعد عني هفضل أقرب ليك مهما تبعد عني ناس وأهتماهم ليا يقل جايز أخد موقف منهم لكن أنت مقدرش أصل أنت مش عارف سيادتك بالنسبالي إيه أنت الحياة اللي من غيرها مقدرش أعيش أنت عارف كم الآقنعة المزيفة اللي ظهرت لي الايام اللي فاتت ورغم كده لسه متمسكه بحضرتك أصل أنت اللي باقيلي لو الكل راح وسابني أنا مقدرش أتخيل إنك تعمل زيهم حتي لو هما خدعوك في يوم أصل أنت جميل وبتسامح وده أحلي ما فيك أنت عارفني بقي جايز أزعل وأتعصب وأقسي عليك لكن من جوايا بقول هيسامحني هيقدر حالتي وهيقف معايا وهيستناني بــ وردة بنفسج يصالحني بيها أنت أجمل حنيه ممكن تطبطب علي قلبي عارف يا اسمك إيه أنت, إن كل البشر يحبوك بس للاسف بيجرحوك كتير بس أنت بتستحمل أصل أنت نقي وبرئ ... ♥

مــســافــة بــيــن الــقــلــب..

زالت كل الإعتراضات وسقطت الحواجز وتحول الرفض إلي قبول , والفتور إلي محبة وأعتزاز , إنها قصة الامس واليوم والغد,, قصة إعلاء العاطفة الصادقة و الأخلاق والدين علي ما سواها من الإعتبارات الأخري التي لا تحقق السعادة وإن عظم شأنها والإستعداد للتضحية ببعض متاع الحياة في سبيل إنتصار الحب علي الصعاب,,,!

شــــــتــــا ,,,!

شتا وسقعه وشوية دفا مستخبين وعنيها بتلمع زي فرحة أول كلمة حب, صوته في ودنها كإنها بتسمعه لسه, ضحكته بترن جواها ..
 هي مش فاكرة فات قد إيه من الوقت كل إللي فاكراه.. فات شتا وده تاني شتا, مش عارفة تبتسم تاني ..
لسه بتسأل كان ليه كل اللي كان , كان ليه تظلمه إزاي مقدرتش تحافظ عليه ,  إزاي وهي بعيدة عنه لسه بتفتكر كل أيام السعادة اللحظات اللي جمعت ضحكتهم .. إسمه إللي رسمته علي السما والبحر ,,,!
 أما هو  وفي نفس ليل الشتا لسه بيفتكر كلام صاحبه لما قاله "سبها للزمن هو اللي هيعلمها وهيديها درس قاسي أوي  الحياة أصلها قصيرة وأما الخريف بيجي ورق الشجر بيدبل علي أغصانه وبيبقي قدامه حلم واحد بس إنه يفضل يحلم بذكريات الربيع "...!
 محدش فيهم لقي السعادة إللي كان بيدور عليها , عقارب الساعة اللي بتلف مع الآيام والسنين خدتهم في طريقها,, تروس بتلف و أختفت الآحلام ,,,
 لم يشفع ندمها علي ظلمها له  في أن الحياة تسامحها وتمنحها السعادة  , مازلت تتذكر أخر كلماته وهو بيعاتبها كان بيتمنى تقوله كلمة أنا أسفه,,, وقتها المكابرة جواها كانت أكبر من الأسف , محستش إنه كان بيتألم ,الأنانية جواها كانت شايفة السعادة في ماديات الحياة إللي بنزهدها أول ما بنمتلكها ,,,
لما الشتا فات وبعديه شتا كانت أبتديت  تحس إنها ودعت السعادة وإنها مابقتش تملك منها غير شوية الذكريات إللي كانت معاه , أما هو كان هناك كان بيستنى اللحظة دي كان عارف إنها حتندم مبقاش الشتا زي زمان بيفكره بلحظات الإفتقاد لها , لسه بيسمع أغاني الحب

آنا زي الفل ...

ولو تفهم في دمع العين كنت عرفت ان البكا مايجرحنيش
ده بيقويني تعيش روحي تروح أنت وروحي تعيش
وعمري ما أتوه في وسط قلوب بعرفها وعرفاني

ومهما تضيق مساحة قلبي قد الكون
آنا الخطوة إللي تبعدني متبعدنيش تقربني
آنا في خير وزي الفل والريحان

فرح ...

 زي نصيبي ما يوديني هغمض عيني..

 و اللي ما يقدرش يطول حاجة يقدر يحلم♥ ,,,

 أدي اللي إتمناه القلب تم يا قلبي شايف الفرحة شايف الحب في كل حبايبي ♥

الحياة هذه مشاهد ...

" إذا أردت أن تحب فأحب لكن بصدق وبشرف ونزاهه  "                          

 دوس هـــنــــا

دايماً في بالي ...

عارف مافيش يوم بيعدي وأنت مش ع البال . بدعيلك دايما في سجودي لله
بحس لما بكون قريبة من ربنا وبدعي عن كل شيء جوايا,وما بنساش ابداً أدعي ربنا
" يخليك ليا " وإننا نكون قريبين من بعض , بحس إن كل مسافة بتقربني ليك هي مسافة بنُصدق فيها أنا وأنت لله , لما كنت بسمع صوتك في القرءان كنت بقول صوت من الجنة لما كنت بشوف وجهك البشوش الضاحك كنت بقول هي دي راحة البال , لما كنت بسمعك بتقول إن طاعة ربنا هي المفازة , كان كل يوم بيعدي عليا بيقربني لله. لما كنت بسمعك تتكلم عن الرحمة والحب والوفاء قولت لنفسي إني كنت غلطانه لما تخيلت بعد ألمي إن مافيش وفاء وحب ورحمة , لكن جيت أنت عشان تصحي فيا نفسي اللي تاهت في أيام ظننتها هي أيام الخير , عارف أنت إيه ؟ أنت الحياة اللي بتمناها وياما أتمنيتها .. أنت الأيام اللي فيها الخير ليا ..

فصل : 3 / أول .. عام : 2005

Samsam Ahmed

ازيك يا بت يا ايوش شوفتى لقيت ايه

وكمان جوابات إيمان الصوفي وحبيبة والله كانت ايام حلوة انا قولت ابعتهالك واخليكى تفتكرى انتى كمان.. ابقى كلمينى بقى

Aya 

ياااااااااااه

عارفه اني بضحك جامد دلوقتي

Aya 

انا كنت لساني طويل كده ازاي ههههههه

هههههههههههههههههههه

Samsam Ahmed

افتكرتى.. طيب ايه رايك؟ هههههههههه وبعدين انتى طول عمرك لسانك طويل على شادية ولا نسيتى ايام ما كنا بنطرد بره الفصل

Aya

منستش عندك حاجات من دى تانى ليا

ههههههههههههه حاجات من ايام الزمن الجميل

Samsam Ahmed

والله يا بنتى مش عارفة انا لقيت الحاجات دى في علبة موجودة في كارتونة

مش عارفة الكرتونة دى لسه عايشة ازاى لحد دلوقتى

Aya

هههههههه عمرها طويل لسه .. ويا تري عايشة بتاكليها وتشربيها ولا  خلي بالك الظلم حرام هههههه

Samsam Ahmed

على رايك

بس والله انا لحد دلوقتى مستغربة

Aya

ليه بس يا سمسمتي

Samsam Ahmed

علشان اول ما فتحتها وافتكرت حاجات كتير

Aya

زعلتي ولا فرحتي وقتها

انا كمان افتكرت اليوم كله من اول طابور المدرسة لحد ما روحت كان يوم مضحك

Samsam Ahmed

والله فرحت ماكنش في حاجة تزعلنى

هههههههههه كانت سنة ثالثة كلها حلوة

يمكن علشان اخر سنة

Aya

طبعا ههههههه يا بنتي انا فاكرة اني كنت شقية أوي 

الكلام ده صحيح ولا أوشاعة ههههههههه

Samsam Ahmed

طول عمرك

Aya Mohamed Omar

طبعا أوشاعة لاني كنت بنوتة جميلة بتحب ترسم وهادية ومبضربش حد هههههههههههههه

Samsam Ahmed

ههههههههههه

وسعت منك ديه

انتى كنتى هادية امتى

والعيال اللى كنتى مطلعة على كل واحدة اسم

ها

Aya

ايه ده انا  ماكنتش هادية ورقيقه؟ هههههههههههههههه

 ينهار ضحك انا كده من زمان لحد دلوقتي بحب أطلع علي اللي أعرفهم أسامي وفي الغالب بتكون أسامي مضحكه ههههههههههه

طيب فكريني كده انا كنت مسمياكي ايه هههههه

Samsam Ahmed

هههههههههههه

 كنتى تعرفى

الا انا طبعا

Aya

اشمعني بقي

طيب فاكرة رسمتي المفضلة اللي كنت برسمها في اي مكان في المدرسة

Samsam Ahmed

اها انا اساسا كنت تحفة فنية لواحدى

صورة البهلوان ده تقريبا

صح

Aya

تؤ تؤ

Samsam Ahmed

امال

Aya 

لو دورتي في ذكرياتك القديمة  جايز تلاقيني كنت رسماه عندك ههههههههه

الرجل الاقرع يا بنتي  مش فاكرة ولا ايه   ههاي

Samsam Ahmed

ههههههههههههه

يا بنتى ما هو ده اللى بقولك عليه

Aya 

هو كان اقرع بس علي شكل بهلوان ههههههههه

انا نسيت شكلي.. اصلا انا اكبر نسايه ههههههههههه

طيب فاكرة لما كنا بنغني في المدرسة

samsam Ahmed

 طبعا هى دى حاجة تتنسى

.......
بعيداً عن خطي اللي كان مش ولابد والمكتوب في الرسالة اللي عمرها 8 سنين دلوقتي .. أنا فرحت أوي إن لسه في حد من صحاب ثانوي فاكرني كده أنا مش بتواصل مع أسماء بشكل دائم بنتكلم كل فين وفين ,
لكن فكرة إنك تصحي الصبح تلاقي رسالة من حد بيفكرك بنفسك بضحكك بعفويتك وبساطتك بالمريلة  والكتب والكراريس والمذاكرة وريحة أيام ثانوي , دي لوحدها كافية انها تسعدك لآيام كتير أوي ..
وأنا بقرا الرسالة اللي كنت  كتبتها  لآسماء وأنا " بنت في الثانوية "  أفتكرت كل حاجة حصلت في اليوم ده وأفتكرت برائتنا وحبنا للحياة ..
كنت شقية فعلا جدا بس كنت محبوبه من كل الناس 

نـفـــس الــمــكـــان ..... !

" كان ياما كان يا سادة يا كرام , و ما يطيب الكلام إلا بذكر النبى قولو عليه الصلاة والسلام يا ولاد" ... أقول عليه الصلاة والسلام وأنا على مقعدى بجوار الراديو فى بيتنا الصغير أسمع الحكاية وأطلق لخيالى العنان....
"كان ياما كان, كان فى رجل شقيان عنده من البنات أثنين بنت إسمها شمس الشموس تحب تلعب فى البستان تحن على الحيوان وتسقى غصن الورد وتسمع الكلام وبنت إسمها ........" قبل ما تكمل الحكاية كنت صغيرة أقفز من مقعدى أردد "أريد أن أكون شمس الشموس وألعب فى البستان " ....كبرت ولم تكبر بداخلى الحكاية ظل عالم الحواديت وحده هو البستان وكنت أنا فيه شمس الشموس هنا أسرح بخيالى كما أشاء وفى عالم الحواديت يكون النور نبيلا فى إنتصاره لا ينتقم من الظلام ,لا يدس عليه بالآقدام... فى عالم الحواديت الحب براءة و البراءة طفولة و الطفولة عهدها بنا أيام قليله وتنقضى فى مدونتها كتبت مراراً وتكراراً عن قصص الحب كانت ترى فى كل قصة تخطها أناملها بإن النهايات دائما لا تأتى بقدر وجمال البدايات خيالها ككاتبة قصص كان يرى إن اللحظة الآدبيه تولد من الآلم.. وحده الآلم كان الباعث الآساسى فى تحريك أبطال قصصها 
قال أبى ذات يوم "هذة هى الحياة يوم نزاع ويوم وداع" أطلبى لمن تفارقين الرحمة لا حزن مثل حزن الصغار حزن نقى يدركونه بالغريزة كنت أنا كذلك فى نهاية القصة نفحت قلبى المثقل نفحة من الشوق إلى كل الحواديت التى أمطرت طفولتى بالحب أودعتها سلام عزيز من قلب فتاة أدركت الآن أن كل قصص الحب التى كتبتها وتخيلتها لم تكن إلا خيال لا يمت للواقع بصلة وإن الواقع تتحكم فيه الناس كل على قدر ما يريد
" عمرى اللى فات و الذكريات كانوا هنا..و انت بعيد قلبى غريب و أنا مش أنا .... "
من فضلك يا اسطى أخفض صوت الردايو الطريق إلى المطار طويل ونريد ألا ننزعج , قاطعتهم مخاطبه سائق التاكسى لا من فضلك لو سمحت أترك هذة الآغنيه أود سماعها تسللت بعيناها خارج نافذة التاكسى أبت ألا تسجل أى مشاهد فى ذاكرتها للطريق الموصل إلى المطار كانت كلمات أغنية عمرو دياب تخترق مسامعها لتنفذ إلى قلبها موقظة كل ما قد سلف من أحداث سبقت لحظة الرحيل من الوطن 
بقلمي : aya
27 إبريل 2013
دي تدوينة قديمة كتبتها من شهور .. 

ليه كل حاجة نحبها ما تحبيناش

وإنما السعادة بطفولة القلب

ضــحِــك الــقــمــر

النهاردة شوفت القمر جميل اوي اه والله كان جميل أوي ودعيت دعوات كتير وحسيت بسلام نفسي , بعدها أخدت نفس عميق وغمضت عيوني ونسيت الآرض واللي فيها وشوفت نفسي هناك عند القمر اه والله عند القمر ..البال مرتاح . القلب كله حياة . مفيش مشاكل . مفيش فراق . لكن في حب, و حياة.. و, روح بتضحك تملي الكون فرح وسعادة ..

:)

وأهيم في دنياي أحترف الغياب

الناس الحلوة اللى بجد ..

 أحلى حاجه لما تشوف وجوه تشعرك بسلام نفسى
 و راحه كدا بتبقى من جواك بتقولهم خليكم معايا لاخر العمر..
 انتم مبتجوش كل يوم ليه ؟

قلوب لربها خاشعة ...

 مسكين من يقضي حياته يلمّع صورته أمام الناس ويزينها،
وينسى قلبه الذي لا يطلع على مكنونه غير الله !


عجبتنى أوى الجملة دى فى منتدىأحلى حياة فى طاعة الله .. 
 اللهم أجعل قلبى ملك ربى

Aya

خير اللهم اجعله خير .. :)

ليه لما بكون مضايقة مابقتش احب اقول لاى حد انى مضايقة عكس زمان ماكنش قلبى بيقدر يزعل ثانية وكنت بحب احكى على اللى جوايا علطول .. ليه دلوقتى بقيت اشعر انى لو قولت لاى حد على اى شئ بيضايقنى او ضايقنى هيقولى الكلام المعتاد زى انسى كبرى هى دى الحياة طيب معلش اصبرى شوية ..... إلخ وهكذا يطول الحديث :) ........

هو انا اللى ما بقتش اشوف حد يفهمنى عشان كدا مابقتش بحكى وافضفض زى زمان ولا الناس هى اللى مستمرة تعيش دور الناس الروتينية اللى كلامهم شبه كلام الموظفين ولا ايه !!

ولا هو ملل ولا ايييييه ؟

العــيــلــة ودوشــتــهــا ...

لما تشتاق للمة العيلة كلها فى بيت واحد وتبص تلاقى نفسك لوحدك متضايقش لما تشتاق للمة العيلة على سفرة واحدة وكلام مابيخلصش ومابيحلاش إلا على الآكل برضة متضايقش , بس خليك محتفظ بالحاجات الجميلة دى فى صندوق صغير جوه الذاكرة عشان من وقت لوقت الحاجات دى هتسعدك كل ما تفتكرها فى غياب آصحابها ..

ألـف حـكايـة وحـكايـة ...

على وقع كلمات أغنية وردة أيام وبنعدها اللى سمعتها مؤخراً بدأت أستدعى مشاهد من الذاكرة ألف حكاية وحكاية عدت ونسيت أكتب عنها كلمات وردة كانت ملهمة ليا فى كتابتى للتدوينة دي ..

(1)

"حتى كل دمعة بكيناها كنا بالضحك محيناها,حرام نضيع أيام تمر ما فينا نردها"....أكتر من ألف حكاية و حكاية  كتبتهم عنها,عن حبي ليها,عمرى ما كنت أتخيل إنى ممكن أحب الكتابه عشانها,,,منين ما بتيجي فى بالي كنت بكتب عنها...الحتة اللى إتسرسبت غصباً عني من روحي خليتها معاها,,كل ما تقرب منى الحتة الناقصة من روحي بتكمل لوحدها...دى إنتي يا اسكندرية,,,كل مرة كنت بكتب عن اسكندرية كنت بحس إن اللى كتبته حتة من روحي علشان كده قررت أحتفظ بكل اللي كتبته في شنطتي اللي كانت معايا فى كل الأوقات...الغريب إن شنطتي كانت بتساع كل ده,,,شنطة شالت حبايبي وصحابي اللى سمعوا حكاويه عنها,,شنطة شالت ورق صغير و جدران و أسوار ,,شنطتي شالت السما و السحاب و البحر....

كنا ردينا أوقات صارت هلا ذكريات ,كنا رجعنا أحباب فارقناهم,كنا صالحنا أصحاب زعلناهم....من المنشية لبحري حيث مكاني المفضل بقلعة قايتباي و جيلاتي عزة اللذيذ,,, الحنطور و التمشية ع الكورنيش من المنشية لبحري و عيني ع البحر و الناس و الوقت الجميل اللى بيمر بسرعة البرق ,,,و فرح نوبي يستقطع طريقي فى ممشى القلعة أنزل من الحنطور و مكملش التوصيلة و أتفرج ع الزفة النوبية و العروسة الجميلة هى و عريسها و هما بيرقصوا على نغمات الدفوف النوبية و كل الناس حواليهم فرحانين ,,أبص لعيون العروسة و الفرح و السعادة اللى بتنطق بالحب و العريس اللى ضحكته منورة وجهه..أنسى إنى معرفهومش و أبتدى أسقف مع الناس الواقفين فى الزفة و أنا كلي فرح ,,,, لناس متربطنيش بيهم أي معرفة.. بعيدة عن كل الناس اللى عرفتهم و أتمنيت إني أشاركهم أفراحهم,,,و فى قلبي كل الأوقات الجميلة اللى بقت ذكريات  ,,,الناس اللى رحلت و الناس اللى ضحكت معاهم أيام و مرت و الناس اللى لسه كلامهم و صوتهم جوايا... "أيام و بنعدها لو فينا نردها"...
Aya

بنوتة أسمها آية :)

مفيش أجمل من البنت اللى تحس إنها زى الطفلة فى معاملتها ولما تيجى تسألها فى حاجة تلاقى بنت دماغها كبيرة وفاهمة ..

رسالة إلى السيد بحر . من الرسائل القديمة جدا التى لم تنشر فى المدونة . لم اعتاد أن أكتب خواطر لكنها كانت تجربة حلوة .. تاريخ هذة الخاطرة 2010

رســــــالة إلى الســـيد بحـــــــر.....

العــزيز الغــالــى......

أشواقى وتحــــياتي.....

أوحشنى غيـــابك...

أشتقــــت إلـى أمواجــــك.......وتلهفــــت عـلى لقائــــك....

أكــــتب لك من القـــــاهرة العامـــرة الســــــــــاهرة......أكـــــتب لك وأنـــــا حـزينة يـــــا بحـــر....

حزيــــــنة أنـــا يـا بحــــر....

الــــيوم كــــان الفــــــراق....الــــــيوم كان الــــوداع....

أتــــــدري من أقـــــــصد؟....أتـــــدري من فـــــــارقني يــا بحـــر؟.....

نـــــعم أنــه هو يـــــا بـــحر......ألازلت تتـــذكره؟.....

أنـــــه من ســـــطرت عـــــــلى رمالك حــــروف أســــمه الشهر الماضى حينما ألتقـــــيتك يا رفــــــيقي....

أعلـــــم أن أمـــــواجك قـــد خطفـــــت حــــــروف أســـمه مـــــني......

كم هـــى أنــــانيــة تلك الأمـــــــواج .....فـــى أنـــــانيتها حروف أســــــمه...

أنــــــا حـــــزينة يــــا بحـــــر.....

ضــــــاعت أحــــــلامي......تــبــددت شــــــمس أيـــــامــي..

لا تـــــسلنــي يـــا صـــديقـــي...كـــيف ضــــاع الحــــب منــــي

كـــبف تــاهـــــت الأمـــــاني.....والهــــوى رغــــم عــــني...

لا تـــسلنـــي فـــلن أجـــب......لم يــبق شئ في بـــعادك غـــير حـــزن واّلامــ

أشــــتاق إلى جــوارك كــالطفل ألـــتمس الاّمـــان....

كالعــاشق الولـــهان .... وشــوقه لأن يضمه سكنـــات المــــكان...

أتــــرى ستـــجمعنا الليــــــــالي ....وأشــــكو لك مــــا كـــان....

أخــــشى صـــديقى على الأمــل الصغير.....أخشــــى يضيع ويــندثر ويـــطويه مـــرور الأيــام.....

أخشــــى مـــن الـــجرح العمـــيق....أخشـــى من طـــعنة الــــحبيب....

بـــــريئــــة أنـــا يا بــــحر...لم أقتـــرف ذنبــــاً ولا اّثــــام....

مـــا كنــــت لأظلـــمه...إلا رغـــم عنــي يا بـــحر...

مــــا بيـــدي ...كيـــف يــدري؟؟....

كـــيف يـــدري بيــن صـــمتي؟؟.....

لـــن أدافــع ...لـــن أبـــرر...لــن أواجه ...

ســـأبعث لـــه لحـــنى القـــديم....بيـــت صغيــر على البـــحر ضــمته أمـــانينــا.....

ســأبعث لــه أغــانينا الــقــديمــة تداعـــبه ...تـــواســيه..

فـــإن غــاب الهـــوى عنــا غـــداً فــى الـــذكــرى تـــلاقــينا....

لـــن أنــــسى أننــا كـــنا شـــعاع أضــاء يـــومــــاَ وأحــــترق.

لــــن أنـــسى  يــومـــاً ....أستـــاذى عـــصفور من غــادر عشـــه وأفـــترق.....

إعَــلم يــا بحــر أن قـــصتي الأولى ســيذكرهــا هو ويشــتاق...

وســــأبعث لـــه هـــمســاتي.....تـــسأله عن الـــماضي...

تـــحدثه عــن البــسمة....عن الفـــرحة.....

عـــن حـــلم طـــفلةٍ صغيــرة ضـــاعت أحـــلامــها وتــبددت...

عصفــورها قــد غــرق
Aya

ضحكة مريم ...

دى مريم ناصر بنت أخويا أحدث مولود فى العائلة اتولدت فى شهر نوفمبر اللى فات انا اللى اخترت لها اسمها بحبها جدااااا اجمل حاجه بتميزها ضحكتها الجميلة دى مش زى كل الاطفال اللى فى سنها اللى دايما بيعيطوا مريم دايما بتضحك وهادية المشكلة انى خايفة تطلع لادغة كمان زى حبيبة اختها مريم أمل جديد فى الحياة ربنا يخليها ليا وبعدين لاهلها :)

طموح

أنا بحس إن أنت غنى على قد أحلامك 

رســـالة من صاحبتى

وصلتنى رسالة من صديقتى العزيزة على قلبى من يومين قررت أحتفظ بيها هنا وأكتبها هنا فى المدونة أصلها مش مجرد رسالة دى كلمات بتتنفس ود وحب من إنسانة عزيزة على قلبى,, وحشتنى و وحشنى أيامى وضحكنا مع بعض ..
 السلام عليكم ورحمة الله ,,,
" أيوش وحشتينى جدا يعنى وحشتينى دى بعدد سكان مصر بلدنا بعدد حروف كلمة وحشتينى بعدد كل ضحكة ضحكناها مع بعض وكل صورة أترسمت فى ذكرى أيامنا اللى فاتت وحشانى يا أية .."

مدونة ولا كل المدونات :)

قعدت اقرأ التدوينات اللى فاتت كلها واقرا تعليقات لى ولآصحابي المدونين وردودي عليهم حسيت اني كنت بنى ادمه مختلفة عن البني ادمه اللي بتقرا دلوقتي وقت ما كتبت كل تدوينه فى مدونتى حبيبتى كنت بكتب بأحساس توقيت اللى اتكتبت فيها التدوينه لكن لما برجع دلوقتى اقراها بحس بشعور مختلف تماما عن اللى كان موجود, وقتها بكتشف انى تغيرت يمكن حاجات كتير اتغيرت هى كمان واسباب كتبتى للتدوينه كمان مبقتش موجودة لكن التدوينه  لسه موجودة ؟ واصبحت مجرد ذكرى فى مدونة اسمها حواديت بنوته مصرية, وهكذا هى المدونات " ذكريات" انا فاكرة اول تدوينه كتبتها ومن احب التدوينات لى على الرغم ان اسلوبها كان بسيط لا يقارن بأسلوبى فى الكتابه دلوقتى ...
"التاكسى..والسائق.. العجوز.. وأغنية .. ام كلثوم  .". كتير بدخل مدونات اللاقى اصحابها  اخر تدوينه ليهم من سنه او سنتين او  ثلاث او اربع سنين , افضل اقرا فيها بلاقيهم تركو لينا حاجات جميلة اوى رغم انهم انقطعوا عن الكتابه خلاص  تركو مدوناتهم ذكرى  لينا احنا .. انا عارفه ان احلى حاجة  بحبها فى الانترنت هى مدونتى انا سجلت هنا حاجات كتير بحبها   انقطعت فترة من التدوين وبعدين رجعت اكتب تانى بس برضة مش بنفس درجة احساسى بحب الكتابه والتدوين بتاع زمان فى حاجات اتغيرت وغيرتنى معرفش ليه .. بحب اوى حواديت بنوتة مصرية  لكن يا ترى ممكن تتحول لمجرد ذكرى زى باقى المدونات اللى اصحابها انقطعوا عن الكتابه  فيها ؟  .

أبو كف رقيق و صغير

أهو أنا البنت اللى لسه بتتفرج على بكار حلقة حلقة كل يوم و مش بمل خالص بالعكس لذيذ جدا إنك تستمتع بكل الحاجات اللى بتسعدك مع إن غيرك لما يعرف إنك كده و لسه بتحب الحاجات دى يتريق بقى و يقولك ايه الطفولة دى ..ماشى أنا طفلة و بحب بكار ..حتى أسألوه..أصل أنا و هو زى بعض ده حتى بيحب الرسم زى...ولمض كمان زى ..
بكار...بكار ..بكار ..يا بو كف رقيق و صغير و عيون فنان محتار..من قلبه و روحه مصرى و النيل جواه بيسرى ...أصحابه كتير كتير أده و قدهم و موسيقى نشيد بلادى بتجرى فى دمهم...

البحر بيخطفنى من تانى بتوحشنى

البحر بيخطفنى يحكيلى ويغنى ينهار يا ولاد...! إيه اللى حصل إزاى يمر سنه مسمعش الآغنيه دى !!!! إية يا أيوش ولا حتى بقيتى تكتبى عن إسكندرية, إيه اللى حصل بقى .. فاكرة والله فاكرة دا أنا عملت المدونة عشان أكتب عن الآيام اللى بزور فيها إسكندرية كل سنه .. التمشيه على البحر وقت الصبحيه وغزل البنات والشمس وهى بدوب فى المية وقت الغروب وصوت حنان ماضى وهى بتقول حبيبى قالى اتمنى انا قولت بيت ع البحر, الله ريحة اليود وحشتنى, يا سلام اهى اسكندرية دى أحلى بلد فى الدنيا وحشتنى أوووى,

و كــان و كــان و كـــان...

المرة دى مش هكتب حواديت مش علشان الحواديت خلصت ولا إنى مابقتش بعرف أكتب قصص زى الآول .. المرة دى هكتب قصة حقيقية بطلتها أنا 

" أية" صاحبة المدونة اللى بتألف أفكار الحواديت اللى بتتكتب هنا .. من سنة بالتمام بالتحديد فى بداية 2012 من يناير كدا وقت ما كتبت  تدوينة" عادى" الوقت دا كانت فى حاجات غريبه بتجد على حياتى البسيطة الهادية اللى كلها مرح إختصرت كل اللى كان بيحصل وقتها وبيغير فيا فى تدوينة " عادى" .... كنت وقتها بذاكر لإمتحانات الترم, الشتا اللذيذ والمذاكرة والنسكافيه والمطر اللى نزل عليا فى أول يوم ليا فى الإمتحانات وعشانه كتبت التدوينه دى " افتقاد" كانت الحياة جميلة وهاديه فكرة إنك تكون متسامح مع الحياة بتتعامل معاها ومع الآشخاص اللى فيها ببراءة وطيبة وانت مش متخيل ان اللون الرمادى موجود وان فى ناس ممكن تخدعك أو تكدب عليك أنا ماكنتش بفكر كدا, أنا كنت أية اللى دايما بتضحك بقلبها الرقيق اللى بيشوف كل الناس ملايكه مع ان الملايكة مش بتعيش على الآرض,بعدها بفترة تطورت فيها الظروف المحيطه والمتغيرات ووجود بعض الآشخاص شكلو حياتى اليومية بداية من صديقتى يمنى اللى معايا فى كلية الإعلام وصديقاتى البنات على الفيس بوك سارة وياسمين وأسماء والرغى وحكاوى البنات, لما سافرت يمنى للسعودية تركت فراغ كبير, أنا ماليش أصحاب كتير من وقت ما أصحاب ثانوى كل حد أختار طريق دراسى مختلف عن التانى وبقيت لوحدى أتعودت على كدا من 2005 أنا كمان كل أخواتى أكبر منى يعنى مفيش نقطة تواصل ممكن تجمعنا ,2012 بقى كانت سنه عجيبه فى حياتى فى وسط كل اللى حكيته دا انا شوفت نور جميل كان بيحيط بيا بيوعدنى بكل الفرح والآمنيات الجميلة اللى ممكن تتمناها بنت فى سنى " الحب , الفرح,السعادة, الآهتمام" كنت حاسه كأنى فى حلم بيتهيائلى إنها دنيا محال كان طبيعى وقتها ان تدويناتى هنا فى المدونة تكون كلها بتضحك كانت كلها للنور دا , دونت لحظات جميلة  أو زى ما تقولوا كدا أنا كنت وقتها شايفها كدا,على فكرة أنا سهل أوى إنك تبسطنى و تقدر أوى تضحك عليا و تاكل بقلبى حلاوة بكلمة عادية أو ضحكة أو حتى إبتسامة بسيطة أقل شئ ممكن يرضينى ويسعدنى لكن تعرفوا دى كانت سذاجة وطيبة زيادة عن اللزوم منى , المهم نكمل الكلام ...كنت كل يوم بنتظر فيها مجيء النور لحياتى و أنا زى الطفلة اللى بتنتظر العيد, و الفستان الجديد,سندريلا ,سنووايت ,كل بطلات الحواديت الجميلة اللى بحبها كنت أنا....لما أقترب شهر رمضان الكريم بالتحديد فى أواخر يوليو 2012 كان وقتها حان دخول النور الجميل اللى شفته فى الخيال لحياتى الواقعية وقربت الفرحه من قلبى وفرحت أوى زيادة عن اللزوم وفى لحظة الفرح دى يتقلب النور ظلام وأكتشف إنى كنت بشوف كل حاجة بس بعيون عميا لا ترى مقدرتش أفرق بين النور والظلام ,بين الكدب و الصدق ..بس الصراحة أنا كان بيجيلى هاجس بكدا كان قلبى شفاف وكنت بفهم وبقدر أفرق وتدوينة.. 

" أبيض" تشهد بكدا بس وقتها النور كان تغلغل وجوده فخيبت ظنونى وقولت بلاش سوء ظن يا أية ,طبعا على قدر إيمانك بوفاء الآشياء والآشخاص على قدر صدمتك لو ثبت العكس,وقتها بيناتبك شعور بالخوف و الإنعزال و دا بالضبط اللى حصل معايا,كنت عايزة أبعد عن كل الناس إلا ربنا هو اللى لجأت له,فقدان الثقة فى البشر شئ صعب إنك تتحمله ,إحساس الخذلان و الوحدة يزيد أكثر مما كان حتى لو كان كل الناس حواليك,دموعك فى السجود هى اللى وحدها بتغسل قلبك و بتطبطب عليك ,دعاء فى العشر الأواخر من رمضان من صحبة طيبة فى مسجد بتدعى ليك إن ربنا يصطفيك,و إنك بقدرة الله و بفضله و بدعوة مستجابة أتحول أنا لــ" أية" تانية خالص غير التى كتبت هنا منذ سنة,أنا الأن أدركت قيمة حياتى فى رحاب الله و أدركت خطئى و علمت يا ربى إن كل حب لغير الله ينهار و أشفقت على كل من جهل ذلك,فى الجانب الإخر أبصرنى الله بما لم أتوقعه عن ذاك النور الذى ظننته خيراً فى يوما ما بل و تماديت فى حزنى على فقدانه,رأيت شبحاً يجول من ظلام لظلام يستبيح كل ما لا يرضى الله و نظرت لنفسى فوجدتنى على طاعة و مع صحبة صالحة أأتنس بها,الأن صرت أنا حاملة لكتاب الله القراءن أحفظه و أدرس علم التفسير و أسأل الله الثبات و أن لا يفتنى فى دينى,رضيت يا ربى ....و أدركت حكمتك ,ما حرمك إلا ليتفضل عليك ...و لقد أبتليتنى فصبرت فأصطفيتنى ..و إن قدر لىّ الله أن يحدث ذلك ثانيةً على أنا أكون على ما فيه أنا من سعادة و طاعة, لتمنيت أن يحدث مرة أخرى... 

أما و اليوم وقد برأت إلى الله مما قد سلف ,جئت لأدون عن تلك الأيام لا لتنظير و لا لأى شئ سوى إنى ما رأيت صدقاً إلا بين طيات مدونتى فأثرت أن أدون للعبرة عن كل ما كان يقول الأمام الشافعى رحمه الله..

يريد المرء أن يعطى مناه.. ويأبى الله إلا ما أراد 

يقول المرء فائدتي ومالي .. وتقوى الله أفضل ما استفاد

أنا والمدونة وحواديتنا

.........
حواديت بنوته مصرية : أزيك يا آية عامله إيه
آية: وحشتينى يا مدونتى معلش بقى غبت كتير عنك
حواديت بنوته مصرية: ولا يهمك يا أيوش ما أنا عارفه انتى كدا زى الاطفال لما تفرحى بحاجه جديدة تاخدك منى ببقى بضحك عليكى من بعيد واقول راجعه راجعه
آية : هاهاهاهاهاهاها ضحكات شريرة متقطعه يا بنت الآيه عرفانى وحفظانى
حواديت بنوته مصرية : اهلا يا ستى هه إيه جديدك
آية: إستنى بقى عندى حدوته هتعجبك
حواديت بنوتة مصرية : شوقتينى يا توته أكتبى أكتبى
آية: المرة الجايه يا جميل أنا مش فاضيه دلوقتى سلام مؤقت
حواديت بنوتة مصرية : سلامونتى يا أيوياا هستناكى ..

قلوب كأفئدة الطير

 .. هناك قلوب كأفئدة الطير ..
عن أبي هريرة عن النبي صلى الله عليه وسلم قال:" يدخل الجنة أقوام أفئدتهم مثل أفئدة الطير"أخرجه مسلم
-قوله صلى الله عليه وسلم: يدخل الجنة أقوام أفئدتهم مثل أفئدة الطير... قيل مثلها في رقتها وضعفها....
 هناك علاقة ، بين الرقة و الإيمان والحكمة،ولهذه الرقة النابعة من الإيمان سمات كثيرة
-سرعة التأثر وسرعان ما تذرف العين.
-سرعة الاستجابة للحق.
-سرعة الاتعاظ والتذكير ، وكره الظلم بشدة.
- مراعاة مشاعر الغير واحترامها والاجتهاد في التلطف والحذر في أن يمسها بسوء.
-التفاعل مع من حوله والاهتمام بمشاعرهم فرحا وحزنا.
- التفكير في الآخرين، فإذا عجز عن مد يد العون، فلا أقل من أن يحمل همهم في قلبه وعقله.
وهذه الصفات العامة التي يتسم بها أصحاب القلوب الرقيقة ، والتي هي كأفئدة الطير،لها ضوابط مهيمنة،ومن أبرزها:
-لين من غير ضعف ، وقوة من غير عنف ،أي هيبة أو حزم من غير شدة... ثقة بالنفس من غير غرور أو تكبر.
-أن يحب ويبغض ويعطي ويمنع لله... ردود أفعاله ينبغي أن تكون متزنة دون إفراط أو تفريط... وفقا للضوابط الشرعية.

أحسب نفسى وأياكم من هذه القلوب 

إليك أنت ....

يا صديقى لن أخشى المواجهة إليك أنت يا صديقى سأرحب بنقدك وتوجيهك
... لآننى أثق فيك وأعرف إنك تهتم بأمرى .

لأنك تواجهنى بالحقيقة فى إطار من الحب والتقدير والأحترام لأنك تصون كرامتى وتحرص على إنسانيتى.

ولا تشعر بإنك أكثر ذكاء منى أو أهمية لأنك تقبلنى مهما كان خطئى أو تقصيرى أو وجهة نظرى فإختلافى معك لا يعنى إنك ترفضنى .

وعدم إتفاقى معك ليس معناه أن تهاجمنى وعدم رضائك عن أمر ما لا يجعلك عدوى لأنك تحبنى كنفسك وتود بنيانى ولا تهدف إلى تحطيم ثقتى أو هدم معنوياتى لأنك تواجهنى  بحب و وداعة وفى وضوح وحزم .

فى الوقت نفسه تحبنى لأنى أنا أنت كلانا يمثل للآخر نفس القيمة من الحب والتقدير لآنك تواجهنى لتوجهنى لكى أتغير إلى الآفضل .

وليس لتديننى أو لتحكم على أو لأنك تهوى مجرد الإصطدام بى أو العناد معى
  لأنك تعرف إننى لن أستطع أن أكون نسخة منك.

لأنك لم تتكلم عنى مع غيرى من ورائى و إنما كنت شجاع فواجهتنى لأن هدفك دائماً هو أن تربحنى وتفوز بصداقتى .

ولا تفكر أبداً فى أن تخسرنى أو تتخلى عنى لأنك كنت الأقرب لىّ وقت ما جرحنى الآخرين كنت وحدك الملاذ.. الصديق.. والحبيب .

لأنك تشجعنى على أن أكون نفسى وأتحدى ظروفى وأبدأ من جديد لآنك تخاف على وتسرع لتنبهنى إلى أى خطر يسئ إلى.

أو يهدد سلامتى فمن أجل كل ذلك أهلاَ بالمواجهه يا صديقى تواجهنى أو أواجهك
طالما كنت صديقى سواء أكنت أخى ...أو أبى... أو زوجى... أو زميلى.. أو قارئى .....

....

يا رب كلما واجهت نفسى أدركت إننى ضعيف أحتاج إلى قوة منك ألتمس غفرانك نفسى عليله تحتاج إلى شفائك روحى مضطربه أطلب سلامك يا رب

أخر حروف الروح .... أول حروف الحب والحرية

عمره ما فكر إنه ياخد باله من الكلمة اللى بيشوفها كل يوم الصبح وهو نازل للكليه, عادى كان شايفها كلمة عاديه مكتوبة من زمان فى سلم العمارة اللى ساكن فيها ,مفتكرش إنه سأل حد مرة عن الكلمة دى. مين اللى كتباها ؟ وأمتى اتكتبت ؟ ..
 بس مؤكد انها اتكتبت من قبل ما هو يتولد ,لسه فاكر أول ما أتعلم القرايه وأبتدا يتهجى حروف الكلمة دى كان فرحان إنه أخيراُ عرف يقرا الكلمة دى .. كان حريص ان محدش من الاطفال اللى ساكنين معاه فى العمارة وبيلعبو معاه وهما صغيرين محدش منهم يقرب من الكلمة دى .... وقتها تقريباً كان يدوب يتهجى الحروف ويقرا... لكن مفهمش معناها لما كبر شوية نسى الكلمه ومبقاش ياخد باله من وجودها ....الدراسة فى كليه عمليه شئ مرهق لذهنه ,إنشغاله بالحياة العملية خلاه ينسى كل التفاصيل الصغيرة اللى حواليه حتى الكلمة اللى كان دايما بيمنى نفسه إنه يفهمها ويعرف معناها لما يكبر بقى يشوفها شئ عادى.....

الحياة العمليه حولته لآلة بتحاول تسبق الوقت عشان تقتنص احلام و خطوات أكتر فى الحياة ,بس احيانا واحنا بنسرع الخطى بننسى قلوبنا البريئة .... كان دايما بيشوفها كل يوم فى المترو كانت معاه فى نفس الجامعة من وسط البنات الكتير اللى كانوا بيقفوا على محطة المترو كان بيلمحها ....عنيها الهاديه وملامحها البريئة كانت جزء من الحاجات اللى اتعود يشوفها كل يوم .. فكر كتير انه يكلمها خصوصا لما خد باله إنها كمان فى مرة من المرات أطالت النظر إليه فى أبتسامه رقيقة... كتير من الاوقات كان بيبقى متأكد إنها بتقوله بعنيها كلام كتير .. وقتها كان بيبقى فرحان بأختلاسها النظرات إليه كان بيشعر ان البنت البريئة دى هى الوردة اللى بتهديهاله الحياة فى صباح كل يوم... كان دايما بيخاف من إنه يفكر يكلمها رغم انه كان متأكد ان الخطوة دى كانت هتسعدها إلا ان انانيته وحبه لذاته ....وخوف من الحب اللى ممكن يعطله عن خطاه وأحلامه خلاه يبعد ويقسى على قلبه... قرر انه يبتعد عن النظر إليها كان بيلمحها بتدور بعنيها عليه فى وسط الطلبة الموجودين فى محطة المترو كانت كل يوم الوردة الرقيقة بتدبل يوم عن يوم لحد ما أنتهت الدراسة ... وأبتدت الحياة .. كانت خطواته وقتها وصلته لمحطة الآرتباط والزواج لآول مرة من فترة كبيرة بتخطر على باله البنت من تانى أصله وقتها أفتكر انه لازم يتجوز عن حب !! قرر انه يصحى الصبح زى أيام الدراسة ويقف فى نفس محطة المترو ينتظرها ربما يراها هكذا خيل له عقله طال الآنتظار يوماً فيومان فـــ أسبوع يكرر فعلته لعلها تجئ إلى أن فقد الآمل تماما بحث حوله لم يجد أى أثر لحب وطئ قلبه سواها ... تذكر كم كان قاسياً ,عاد إلى بيته لمح الكلمة على سلم العمارة وكأنه يراها لآول مرة "أخر حروف الرو(ح )أول حروف الحب والحرية ".. الكلمة كانت
" الحب "
لمعت فى عينيه دمعه حزينه أحاط بكلتا يديه الكلمة الآن أدرك قيمة وجود تلك الكلمة بحياته .. كثيراً ما نسرع الخطى فى حياتنا وندهس قلوب بريئة لم يكن لها ذنب سوى انها أحبتنا ...
Aya

حنين

أمى وحشتنى بجد, والله وحشتنى ....... الله يرحمك يا أعز الناس يا أمى

كلاكيت مشهد (1) تانى مرة

• 1

صدقنى يا صاحبى أنا لا أهتم بالسياسة ولا أفهمها، ولا أهتم كثيرًا بكل هذا الجدل الدائر.. فى رأيى أنه لا بد لنار الإعلام المضطرمة ليل نهار من حطب.. من جثث تلقى فيها لتظل مشتعلة. فى بداية الثورة كانت الأمور واضحة جدًا والأسود والأبيض واضحين.. نحن وهُم.. نحن الأخيار أبطال الفيلم وهم الأشرار. هناك مشهد إجبارى فى النهاية لو لم يأت فلسوف ينصرف المشاهد ساخطًا.. يجب أن نلقّنهم درسًا وننتصر. لا تسمح بموت البطل أبوس إيدك. ليس هذا فيلمًا لجودار تموت فيه البطلة فى أول الفيلم. المشاهد المصرى لم يعتد هذا

• 2

مع الوقت اختلط الأسود والأبيض وصارت هناك منطقة رمادية مبهمة، وصار الكل يتهم الكل بأى شىء، وظهر عكاشة ليقول كلامًا عجيبًا، والأغرب أن تكتشف أن هناك مَن يصغون له، والأعجب أنهم يصدقون

• 3

صدقنى يا صاحبى، لست مهتمًا بتضارب الأخبار والجهل الواضح لدى كثيرين. من قبل سمعنا مَن ينصح مرسى بالتنازل ليدخل حمدين صباحى الانتخابات ضد شفيق.. وعرفنا أن هذا كلام فارغ وأن تنازل مرسى يعنى فوز شفيق. هكذا تكتشف أن أهم شىء يميز رجال السياسة والخبراء الاستراتيجيين هو أنهم فى جهل مطبق. اليوم جاء مَن يؤكد أن إقالة النائب العام تمت ثم تم نقله سفيرًا فى الفاتيكان، وبعدها قال النائب إن هذه الأخبار خطأ تمامًا وليس من حق أحد أن يقيله. كالعادة لا أحد يعرف أى شىء وكل الأخبار خطأ.. ربما كان النائب العام يؤدى عمله جيدًا كما يرى البعض، لكن من المؤكد أن قضاة التحقيق لا يؤدون شيئًا على الإطلاق.. والدليل أن مرتكب كل جريمة يخرج بريئًا. هل تذكرون الحكم العجيب على مبارك والعادلى؟ هل قام مبارك بقتل المتظاهرين وحده؟ أى أنه حمل بندقية قناصة واعتلى سطح الجامعة الأمريكية؟ لو كان هذا قد تم فأنا موافق على الحكم وعلى تبرئة كل الضباط الآخرين

• 4

صدقنى يا صاحبى، أنا لا أطمع فى الحكم ولا أحلم بمقاعد فى مجلس الشعب، وليست لدىَّ خلافات أيديولوجية جسيمة مع أى طرف.. فقط أحلم بالطرف الذى يضع مصلحة مصر فوق مصلحته الشخصية، ولا يكذب ويزيّف الحقيقة
صدقنى يا صاحبى، أنا أريد حقك كاملًا، لكنى لست مستعدًا لبيع لحمك فى السوق والمتاجرة بك دون أن أهتم بك كما يفعل آخرون. يضايقنى أن بطل الفيلم مات فى وقت مبكر ولم ينتقم له أحد.. فيلم زبالة على رأى تهامى بك

........ مما أعجبنى من مقال ( صدقنى يا صاحبى)
للدكتور أحمد خالد توفيق ...

 إِنَّ رَبِّي لَطِيفٌ لِّمَا يَشَاء إِنَّهُ هُوَ الْعَلِيمُ الْحَكِيمُ ...

لعبة الحب والجواز

الآنسان بطبعه ملول يقنع نفسه ان قادر يضحك ويظهر للجميع ضحكته وفى الاخر يمل حتى من الضحك او انه يشترى احدث موبايل ويبقا فرحان به جدا واول ما يطلع الاحدث منه يرميه ويمل منه او لما يخطب يبقا فرحان انه بقى عريس او بقيت عروسة ومع الوقت  ومع كتر الكلام المعسول ومع كل الانبهار اللى كانوا فيه يبتدوا يزهقوا ويملو من بعضهم ويبتدوا يكتشفوا انهم مينفعوش لبعض او واحد يروح يتجوز لفكرة الجواز فقط مش مهم بقى الحب ولا التفاهم المهم انها جميلة وطيبة وهتعيش ويقول لنفسه خلاص يا ناس هبقا عريس وبكرة اجيب كام عيل ويتقالى يا بابا وابقا راجل متجوز وليا واحدة تجهزلى العشا لما ارجع وتقولى يا سي السيد واكون زى كل الناس اتجوزت وحققت اللى محققهوش حد هههه مع ان دا الروتين اللى بيعملوه كل الناس وفجأة يمل من كل شئ من الزوجة ومن البيت ومن العيال ويرجع يقول فى شئ ناقص فى حياتى ويشتم ويجيب العيب على الجواز اللى كان هيموت عليه ويمل كعادة بعض الناس .. وواحدة تانية خارجة من قصة حب فاشلة.. فاشلة وعايشة دور الضحية والكلام دا والحب والمشاعر ومع اول واحد يتقدم توافق علطول ال ايه عشان تداوى جرحها طيب وانتى يا بنتى ما تفكرى يا هبله كل شئ بينتهى وبترجع الايام تعيد نفسها وهــ تملى لو مخترتيش صح وهى البعيدة مش شايفه غير القلب ابن ال ..... وتتجوز وبكدا هى داوت جرحها عشان تكتشف بعد كدا انها اتسجنت لما مفكرتش ان الجواز شئ عادى جاى جاى لكن عمرنا وشبابنا مش هيتعوض لو بقى مع شخص ميشبهناش وفى الاخر تمل من حياتها وجايز ترضى تستحمل وترضا بالمقسوم وتفضل طول عمرها عايشة باحساسها اللى مجاش برضاها وهى مش فاهمة ان الجواز دا روح بتسكن الى روح الطمئنينه والحب هما اساس الجواز مش الماديات والمسميات والعلاقات والكلام الكبير دا ..عشان منرجعش لنفس الدائرة المغلقة الملل...!!
هى فكرة الزواج نفسها هى اتنين بيكملوا بعض فى كل شئ بيعيشوا حياة منسجمه كل يوم فيها جديد.... بيبقا قوام الحياة بينهم الحب والتفاهم والصدق والوفاء حتى مشاكلهم بيحلوها مع بعض بدون ملل منها وكل الحاجات دى بتتبنى فى فترة الخطوبه نفسها كل طرف وقتها بيفهم طبع الطرف الاخر, بيحب ايه... بيكره ايه ...ايه اللى يسعده ..من هنا بتتبدد طاقة الملل اللى ممكن تتولد جوانا بعد الزواج ..الزواج دا عامل زى الشجرة اللى محتاجه مننا اننا نرويها دايما عشان تعيش متموتش ولا يقتلها روتين الايام والملل ..
أنا بكره الملل :) والناس المملين اللى ممكن تقبل تعيش حياتها بعد الزواج لمجرد انها حياة وبتتعاش أنا انسانه كلى حيوية وحب للحياة بكل مفرادتها ... 

You'll Never Walk Alone"

When you walk through a storm hold your head up high
And don't be afraid of the dark
At the end of a storm is a golden sky
And the sweet silver song of a lark

Walk on through the wind
Walk on through the rain
Though your dreams be tossed and blown

Walk on, walk on with a hope in your heart
And you'll never walk alone
You'll never, ever walk alone

Walk on, walk on with a hope in your heart
And you'll never walk alone
You'll never, ever walk alone

و هى عامله ايه دلوقت...!

من وقت ما يمنى صاحبتى رجعت من السفر بعد العيد وأنا وهى كل يوم نتفق انى هروح لها ونخرج وكدا.. وكل يوم تحصل حاجه تخلينا نأجل.. صباح الكسل يعنى, وحشتنى بنت الآيـه ....ماكنتش شفتها من شهر فبراير من وقت ما سافرت.. صحيح كنا كل يوم بنتكلم ع الميل لكنى كنت مفتقده وجودها أصل يمنى دى كوكتيل سعادة بالنسبالى من وقت ما اتعرفنا ببعض وبقينا صحاب أتعلقنا ببعض أوى , والله يا بت يا يمنى انتى اكتر حد أسعدنى فى العيد اللى فات لما اتصلتى بيا وانتى بتعملى العُمره وقولتيلى أنا قدام الكعبة يا أية وبدعيلك لما شفت أسمك عالتليفون وانتى بتتصلى بكيت من الفرحه ....
من يومين كدا صحيت الصبح بدرى على تليفون يمنى وهى بتتصل لاقيتها بتقولى أية أنا هجيلك البيت وهقضى اليوم كله عندك... يا سلام.. يا سلام ع المفاجأت الحلوة...
يمنى جتلى بعد الضهر هى و نيهال,أول ما شافتنى صرخت فى وشى مين دى؟
 لاقيتها بتقولى بت يا آيه إنتى خسيتى كده إزاى, أفتكرتنى لسه مقضياها رجيم وكده ,نفسية وحياتك يا يمنى مش أكتر....
قضينا أحلى وقت مع بعض فى البيت مكنتش حاسه بالوقت ,طول اليوم ضحك وتهييس ولعب و تنطيط و رغى رغى ,بنات بقا و اتلموا مع بعض, يعنى نسمع أحلى كلام......
نزلت بعد اليوم الجامد دا عشان اوصل يمنى ونيهال وقولنا نتمشى شوية عندنا .. الجو كان جميل جداا كنا ماشين فى الشارع احنا التلاته ماسكين فى إيد بعض زى الاطفال الصغيرين وهما راجعين من المدرسة... أحلى حاجة بجد لما تقضى وقت مع حد بتحبه وبيحبك مبتبقاش حاسس بالوقت معاهم وكلامكم مش بيخلص .. فضلنا ماشين لحد ما رجلينا وجعتنا قررنا نقف عند اول محل عصير قصب يقابلنا ..
فى محل العصير كانت شغالة الاغنية دى " وهى عاملة ايه دلوقت ومين هون عليها الوقت" انا سرحت بخيالى مع كلمات الاغنية ,معرفش عمرو دياب بالنسبالى حالة بيفصلنى بصوته وكلمات اغانيه عن العالم اللى حواليا انا حتى مسمعتش صوت نيهال وهى بتقولى "ايه يا أية سرحتى فى ايه ؟"مش هتشربى العصير قولتلها سامعه يا نيهال الاغنية..! شوفتى عمرو بيقول ايه " اكيد ساكتة ولا بتحكى ولا بتشكى ولا بتبكى عارفها تبقا مجروحه ومظلومة ولا تبين ولو نزلت دموع منها بيبقا الجرح مش هّين "....
لقيت نيهال بتقولى أية انتى رومانسية وحساسه جدا , رديت وقولتلها عارفه يا نيهال فكرة إنك تنتهى من حياة حد والحد دا ميفكرش يطمن عليكى بعدها بتبقا مؤلمة اكتر من الفراق نفسه ... لكن عمرو هنا بيقول معنى رقيق جدا ..إزاى وهو جارحها وبعيد عنها بيتمنى يطمن عليها بيقول لنفسه يا ترى "هى عامله ايه دلوقت" .. لسه فاكر كل تفاصيل حياتها منسهاش وحاسس قد ايه هو جرحها وظلمها ... عرفتى ليه انا سرحت عنكم ؟

بـــلا وجـــع دمــــاغ..

زى ما انا قولتلك يا صديقتي و زى ما انتي فكرتينى من يومين بالجُملة دى " بلا وجع دماغ"

الواحد نفسه تبقى علاقته بس مع الناس اللى بيحبهم و بيحبوه فعلاً

ولا مجال لأهدارمشاعر و أعصاب الواحد مع ناس ميستاهلوش...

أنتي لما قولتلك أنا الجملة دى ساعتها أكيد كنتي مجروحة جامد و مضايقة منى

بس إنتي لما فكرتينى بيها حسيت إنها بتنطبق على أى وقت...

الواحد بيضيع وقت كتير فى التفكير فى ناس مش قادر يحدد هو أيه بالنسبالهم

فيه ناس منهم يكونوا كويسين فعلاً والواحد بيبقى بيحاول يقرب منهم بس زى ماتقول كده محصلش نصيب و الواحد مقدرش يحجز مكان فى قلبهم...

بس فعلاً الواحد محتاج يحدد علاقته بحاجات كتير علشان يقدر يبدأ على نضافة

مفيش أجمل من إنك بتكون بتحب و تكون واثق من إنه بيحبك...ولا آيه؟

أنا مكرهش حاجة قد فكرة الكتابة عن الأخرين السيئين و إن الواحد يبين نفسه فى شكل الشخص الطاهر النضيف...

و نظام إن الواحد يكتب إن الدنيا مليانة ناس سيئة و معندهمش أحاسيس و إنه مش قادريلقى حد يقدر عواطفه الملتهبة...ولا حبه الكبير

والكلام ده كله

و أنا مش عامله المدونة دى علشان أصفى فيها حسابات مع ناس أو أعمل أى نوع من الأسقاطات على أحد أو تكون ساحة لنشر الغسيل اللى مش ولا بُد..أنا هنا بكون نفسى " آيه" اللى بتحب الحواديت ..تكتبها و تحكيها..

و مهما الواحد إتعرض لأستفزازات بيحاول يحافظ على منطقة نضيفة فى حياته من غير قرف ولا وجع دماغ حتى ولو كانت مجرد مدونة...

..يا مسهل الحال يارب...

نتيجة إعلام بتطلع دلوقتى..
فى واحد بياخد بأيدها....
وهى طالعه ع السلم...
ينوبك ثواب ....:)

يارب النتيجة تطلع بقى ....

عبد الوهاب بيضحك

أنا مفيش حاجة عندى فى الدنيا تساوى ضحكة طفل, بحب الآطفال جدا وبحبهم أكتر لما بيضحكوا بحس ان قلبى هينط من الفرحة لما بسمع ضحكتهم البريئة اللى كلها شقاوة.....
والنهاردة وأنا فى عيادة الدكتور كان موجود عبد الوهاب ..
عبد الوهاب دا بقى ولد زى القمر عنده حوالى سنة كان مع مامته فى العيادة قلبوظ خالص وزى القمر وضحكته بقى أجمل ضحكة شوفتها .. الولد دا بقى شقى خالص كل ما مامته تقعده جنبها على الكرسى ينزل ويمشى فى العيادة ويبص للناس ويضحك... وفضلت مامته تجيبه وتقعده وتزعق فيه وهو برضه يضحك لحد ما جه جنبى قولتله تعالى هنا بقى انت مزهق ماما وعامل إزعاج فى العيادة ليه وبمجرد ما شلته من الآرض وأخدته بين ايديا لقيته سكت وبقى هادى خالص وحط رأسه على كتفى الناس كلها اللى كانت فى العيادة كانت منتبهه للولد وأستغربو..
 الولد حسسنى كأنى أمه ومبقاش عايز ينزل من بين ايديا أنا كمان حسيت براحة عجيبه وهو بين ايديا وراسه على كتفى كأن عبد الوهاب الطفل الصغير الجميل حس بأنى محتاجه لحظة حنان من حد برئ زيه... عبد الوهاب طبطب على قلبى بجد ..

توته...توته..خلصــت الحدوتة..

1

دايماً بتنحصر حواديتها على الولد اللى بتحكيله الحواديت

الولد اللى بتعرف تفتح قلبها معاه من غير ما تحس ويدخل جوه قلبها ويشوف ألوان الحب جواها

ويحط الأبيض جوه أوى و الأخضر ع الوش و الرمادى حيسيبه فى مكانه فى النص

وحياخد الأسود معاه بره قلبها البرئ

ويرجع يدخل لقلبها من تانى من غير ما تحس

حيفتح الباب بالراحة بمفتاح من المليون مفتاح اللى هى مسلمهومله

و يحط الأبيض مع الأبيض جوه أوى

و قبل ما يطلع من قلبها حتسمعه و هو بيهمس ويقولها يسلم قلبك...بحبك

2

مليون مرة بتكتب حواديت عن الولد اللى كانت بتكلمه و أزاى كانت نفسها تتكلم 

و تقوله عاللى فى قلبها و مبتعرفش...

 وتفتكر كم مليون مرة وهى بتحاول تخلى لسانها ينقل اللى جواها و مبتقدرش..

اللى كان دايماً على لسانها بس إنها تقوله هى الدنيا ممكن تقف عند اللحظة اللى اتقابلنا فيها

الدنيا و همومها بس هى اللى قدرت تحط نفسها فى النص ما بين الأتنين

و تفصل ما بينها و ما بينه...الدنيا وقت ما جمعتهم فرقتهم 

,يعنى غريبة لحظة اللقا هى نفسها لحظة الفراق.. 

و عشان كده هى لما شافت الفرحة و الحب فى عينيه المرادى وهو ماشى جنبها و مبيتكلمش ,

عينيه نفذت جوه قلبها الأبيض ..نسيت أنها وسط الناس ...مشفتش غير عينيه 

محستش بأى أنانية فى إنه بيحرمها من الناس اللى بتحبهم و بيحبوها

 قد ما كانت واثقه إنها حتتبسط و هى جوه قلبه

الأكتئاب اللى عندها الأيام دى ده بس علشان هى بتحن أوى لصوته و واحشها ضحكته

 و نفسها تسمعه وهو بيناديها بأسمها...

3

النهاردة و بكل شجاعة جَمعت أى حاجة ممكن تفكرها بيه

القصاقيص و الأفكار و الأحلام و الألوان و الأفلام و الكتب

 و المزيكا اللى بيحبها وكانوا بيسمعوها مع بعض

كله كله جمعتهم و حطتهم فى سلة واحدة وولعت فيهم

كانت حاسه دلوقتى إنها عملت القرار المناسب و حست إنها قوية كفاية

حطت دماغها على المخدة و حاولت تنام

خمس دقايق و لسة مش عارفة تنام

عشر دقايق و برضوه مش جايلها نوم

بعد ربع ساعة جابت صورته بصتلها شوية و مقدرتش تمنع نفسها إنها تبتسم , حطت راسها عالمخدة و راحت فى النوم

4

النهاردة وقبل ما تنام إتصلت بيه رد عليها راحت متكلمه بسرعة على قد ما تقدر علشان متترددش ولا ثانية قالت له أنا إمبارح مسحت نمرتك و صورتك و أى حاجة ممكن تفكرنى بيك بس إكتشفت إنى نسيت إنى أمسح نمرتك من على السيم كارد بس معلش حسألك سؤال سريع , إمبارح حسيت بأى حاجة حسيت بأى فقد , حسيت إن حد كان بيحبك أوى شالك من حياته..

رد عليها بإندهاش و هو متاخد: بصراحة لأ بس ليه......مستنتش لحد ما يكمل كلامه قفلت المكالمة  مسحت نمرته من عالسيم كارد و قدرت تنام و بالها خالى...مفكرتش تبص لصورته..

5

النهاردة فتحت مدونتها و كتبت له الكلام ده ..: متستغربش لو صحيت الصبح و لقيت إسمك مرسوم فوق فى السما و على ورق الشجر و على جدران البيوت

و متستغربش برضو لو لقيته على أسفلت الشوارع و على إزاز المحلات

انا أصلك بعد ما خلصت الحدوتة و بعد ما المسافات ما بينا زادت..و بعد ما حياتك بقيت لحد غيرى 

 إشتقت إنى أحكيك...كان نفسى تسمع الحدوته ..

و بعد ما البشر زهقوا من سماع حكايتى بقيت بحكى للهوا  و الجماد و البحر

فمتستغربش لو عديت فى يوم جنب البحر و لقيته  بيناديلك بأسمك أو حتى عاتبك

 ...أصل أنا حكتله عنك 

عارف قولتله آيه....؟؟

 قولتله إنى كنت فاكرة قلبى قد البحر و السما قادر يشيل الدنيا كلها جواه

حواديت شايلاها فى قلبى و قلبى كان مستخبى جوه قلبك

 علشان كده لما أموت حواديتى حتعيش جوه قلبك 

ساعتها ممكن تشوف كل شئ عنى

وقتها حتعرف أد آيه أنا كنت بحبك ,

تفتكر إنك ممكن تحب حد لدرجة إنك تعرف تفاصيل عن حياته
 عمره ما حكاها لحد..!!

وش بيضحك .. وش حزين

وش بيضحك وش حزين.... كل الناس اللى بقابلها الايام دى صحابى وقرايبى وكدا يعنى .. بيقوللى : مالك ؟؟ مش فاهمة السؤال دا بقيت بسمعه كتير كدا ليه .. رغم ان وشى بيبقا مبتسم وانا بكلمهم أزاى بيملكوا القدرة على انهم ينفذو جوا قلبى ويشوفه الوش الحزين دا ويسألونى مالك ؟
أنا عارفه ان دايماً اللى بيظهر على وشنا هو انعكاس لحالتك النفسيه لكن الحقيقة انا حالتى دلوقتى زى عنوان التدوينه دى وش بيضحك وش حزين ..
الظاهر الايام اللى فاتت كنت أتسرقت من كل الناس اللى حواليا وكل الحاجات اللى بحبها فمكنتش بسمع السؤال دا رغم ان الوش اللى كان بيضحك وقتها كان بيضحك من جوا جوا قلبه..فى الغالب لما يكون وشك بيضحك بتبقا متوقع انهم يسألوك عن سر سعادتك والكلام بتاع الصحاب دا أيوة يا عم الله يسهلو كدا يعنى ولما يكون وشك حزين وقتها لما يسألوك مالك بيبقا دا شئ عادى لكن لما تكون وشك بيضحك ويسألوك مالك يبقا لازم هنا تقف شوية وتفكر مع نفسك وقتها بس هتكتشف انك فقدت القدرة على اصطناع الابتسام...