يا مــهـون.......

يا مسافر بين ضلمه ونور يا مبحر ومعدى جسور
خد بالك أيام هطول وتروح بلدك يا غريب وتلاقى على البر حبيب مستنى يقولك سلامات..
يا لها من كلمات رائعه تتـرك أثراَ بالغ الروعه والعذوبه فى نفسى

و مـازالـت....تحـلـم....

أستيقظت من ثباتها مفزوعة على صوت المنبه, تناولت كوب النسكافية المعتاد فى الصباح, نظرات خاطفه من البلكون أبتسمت الدنيا فى عينيها, سرحت وهى تتمنى أن يتبدل بها المكان, لملمت كل ما تبقى لها, جرت مسرعه نحو سيارتها, عبرت المئات من الكيلومترات لكى تكون هناك,فى الطريق هتفت روحها لا شئ يهم ,صفعت الآحزان, ركلتها بقدميها,كسرت قيودها الواهية, وصلت إلى البحر ,إلى حيث هذا المكان الذى شهد يوماَ أجمل لحظات عمرها,تنفست الآمان.. تناثرت فوق وجنتيها دموع حانية, ربَت عليها البحر..أحتوتها أمواجه , أغمضت عينيها, أسدلت شعرها.. راحت فى إغفاءة عذبة ,ها قد تحققت أمنية الصباح وهى هنا.. جاء الحلم,جلست بجوار البحر,كان هادئ ...أسرعت تغمر وجهها بمياهه ..تلفقها نسيم البحر العابر,أنعش بداخلها ذكريات كانت هنا ..لمعت فى عينيها قطرات من الدموع,أمتزجت ألامها بوحدتها فى المكان..تردد فى أذنيها نفس الصوت الذى لطالما رافقها هنا,هو والبحر وصوت لآول أغنية جمعتهم معاَ,أرتسم إليها الماضى بكل مفرادته ,وكأنه عاد بهياَ من جديد...توهج القلب وأخذ يردد على مسامع أذنيها كل أحاديثه, أبتسامته الهادئه , غيرته الشديدة, كل شئ عنه ومنه...نظرت حولها تمنت لو أن تجد أثر لآى فرحة جمعتهم,تخيلت أول موعد لهما هنا,أغمضت عينيها وراحت تغنى بصوت خفيض,أغنية لشادية"أول لقانا كان هنا"..أتسعت أبتسامتها فرحت روحها تخيلته وهو قادم إليها ,همست تناديه لم يغب عن ذاكرتها حروف أسمه,دار فى خيالها حديث بينها وبينه..., تناديه فــ يلبى النداء ,كان مشتاقاً وغاضباَ..فرحت بأشواقه وتألمت من غضبه فتوارى غضبه خجلاَ وندماً لآنه تسبب فى ألمها, سامحته بدون اى تردد ولم تتذكر انه "يوم ما لم يسامحها" ..قال هو: كنت غاضباَ لتأخرك فكم أتيت هنا ولم أجدك هل وصلتك رسالتى.. همست "كان يجب عليك ان تختطفنى لا أن تنتظرنى",صاح أنتى محقة لا داعى لضياع لحظه اخرى فى عتاب.....كان حديث خيالياَ فهو لم يأتٍ ولم يقرأ يوما رسالتها التى أودعتها للبحر,غاب فى زحام الحياة , وغابت عنها أخباره ومضت هى وحيدة,يكفيها الذكريات لتجتر بها ماكان.... تسللت الدموع ثانية..تركتها, كانت الدموع فى انهمارها تمحو كل ما تبقى فى رصيد الذكريات,أحتمت بكبريائها حتى لا تنهار تحت وطأة اللافائدة ,واللاحلم ...بهدوء تركت الشط ,صعدت إلى سيارتها,سرت فى أوصالها برودة منعشة,سربت بعض من النضارة لروحها الجريحة...داوت الجروح ,منحتها العافية.زودتها بوميض من الأحلام,نظرت من نافذة سيارتها إلى السماء,رددت" كم هى واسعة وجميلة"السماء واسعة والكون رحيب ...فقط الاّلام التى تختصر الكون إلى أنفاق ضيقة ومظلمة ...السماء واسعة وصافية تماماً كأحلامها ...راديو سيارتها يشق بصوته سكون الطريق مردداً بصوت منير"لو بطلنا نحلم نموت...لو عاندنا نقدر نفوت"

وحيـــات عـنـيــك....

" وحيات عنيك وحبى ليك متخلنيش أبعد وأنا مشغول عليك "
هذا الكلمات كلما ترددت على مسامعى أشعر وكأننى فراشه تتراقص فى السماء ..لا أدرى عندما أسمع تلك الكلمات أشعر بفرحه تغمر قلبى .. يمكن لآنها قد ترددت على مسامعى منذ عامين فى الشتاء على البحر فى أسكندرية , وكلما عدت لنفس المكان فى الشتا فى أسكندرية وألتقيت بالبحر عاد لى نفس الآحساس ونفس الفرحه التى كانت تغمر قلبى بسعادة وأحساس لم أوصفه , حتى أننى منذ هذة اللحظه قد أرتبطت على ان أسمع ذلك المطرب ليس اعجاباَ بشخصه , لكن لآنه فقط ينقنلنى من عالمى لعالم أخر ويذكرنى بنفس الآحساس والحاله التى كنت اعيشها منذ عامين....أتذكر أمواج البحر أمامى والكورنيش والمارين عليه يخطفون من البحر نظرات حب وأنتعاشه,
فقد عدت الآن من الآسكندرية وودعت البحر  .. عدت ومعى الفرحه ونسايم البحر من هناك والآمل المتجدد ومعنى الحياة .. فكنت بحاجه للخروج من هذا الآحساس سريعاَ لآننى اكره الحزن بشدة وأحب الحياة ..
الآن انا على استعداد بالعودة لحياتى ومذكرتى وجامعتى وأصحابى ..وبداخلى امل قد يغير نظرتى للحياة .. ويرسم أمامى طريق النجاح والتفوق..

فضفضه مع نفسى* كلام غير مرتب لكن فيه ملامحى

أوقات كتير ببقا محتاجه من وقتى لحظة هدوء أكلم فيها نفسى واحاول انظر كويس فى مرايا نفسى ويدور بينا حديث ممكن يكون طويل وممكن يخلص من أول عتاب وأول لوم لكن الجميل هنا انى بعدهاأعصابى بترتاح جدا وبتسترخااكثر فى التفكير .. فى ناس كتير فى حياتنا بنقابلها على طول الحياة بتأثر فينا فقط لآننا كنا نرى فيهم أنفسنا دون تفكير مجرد نظرة تشرح ما تخفيه الصدور والقلوب وما تحمله من مشاعر حب أو كره ..نظرة فقط كانت قادرة على الجواب دون معرفه الآسئله..
وهناك ايضاَ ناس مبهمه غير مفهومه ليس لهم ملامح واضحه فى طريقه تفكيرهم ناس تتمتع بالغموض التام وما اكثر التوهان فى بحور هؤلاء الناس ..
وعندما نفقد كلاهمانبحث عن من يسمعنا ويشعر بنا دون رياء وخداع لا نجد امامنا سوى نفسنا ..صحيح انها فى بعض الآحيان بتكون قاسيه فى الحكم واللوم لكنها صادقه لا تنافق ولا تخدع مهما حاولنا ان نهرب من اجاباتها دائما.. لكنها لا تهرب مننا دائما ما تحدثنا وتلح علينا وتهمس لنا وتلومنا ولو كان حتى لوم مؤلم وقاسى ...
أحيانا كتير بنحاول نشوف الدنيا من بعيد لبعيد عشان منتجرحش ولا نتألم بنتفرج على الدنيا من خيالاتنا والكتب والروايات والقصص المفعمه بالاحاسيس والمشاعر التى نفتقدها فى حياتنا ليست المشكله فى هذة الكتب لكن المشكله فينا نحن نريد فقط الحياة دون ان تجرحنا تجاربهاوتعلمنا ما هو معنى الجرح...

نريد ان نخلق لنا فكر ونقول هذا نحن هذة صورتنا وأسلوبنا فى الحياة على الرغم من ان الفكر يخلق من تجارب الحياة ..ولكن دائما مبنحبش نصارح نفسنا بالحقيقه وبنفضل نهرب لحد ما الحياة تكون نسيتنا وأصبحنا من أطلالها..
مش حابه يكون دورى فى الحياة هو انى مجرد انسانه عايشه فيها لاء لازم كل انسان يعرف دوره فى حياة نفسه ..مش حابه اشوف الدنيا من بعيد .. عايزة لما اجى انظر فى مرايتى اشوف فى وجهى معنى الحياة أبتسامه بريئه وجه منور كنور القمر ..مش عايزة احلم ومحققش احلامى مش عايز احب ومتحبش ..انا عايزة اشوف الحياة واخوض تجاربها واتعلم منها معنى الحياة الحقيقى مش اللى فى الكتب والروايات ..جايز محققتش كل احلامى جايز الحياة محتاجة منى صبر واصرار لكن قبل تحقيق الآحلام وانتظارها محتاجه اعرف مين أنا وماذا اعنى لنفسى وللآخرين ..مش عايزة اعدى فى الحياة كعابر سبيل ..من حقى ومن طموحاتى انى اكون جزء مؤثر فى هذة الحياة ..
أينعم ان جهادى لوحدى فقط حتى اننى افتقد النصيحه من صديقه او قريبه لكن دائما ما اقول ان الوحدة ولو كانت قاسيه فهيا مفيدة وقادرة ان تخلق انسان ناجح معتمد على نفسه دون مساعدة اى انسان ..
صحيح ان اوقات كتير بنحتاج لكلمة طيبة ترسم جوانا ابتسامه تنور طريق الحياة .. لكن حتى وان لم نقابلها فتكفى لنا كلمه صدق بيننا وبين انفسنا بأننا ليس بحاجة لكلمات قد تبدوا غير صادقه .. فقد طال البحث عن الصدق فى زمن توجد فيه أزمه للصدق ..

إهداء إلى الغادر الحانى.......

البحر غضبان مبيضحكش أصل الحكاية مضحكش
البحر جرحه مبيدبلش وجرحنا ولا عمره دبل
................البحر عطشان للاحباب
بيدق باب ورا باب ورا باب
كاتب الحكايه كان كداب
صابنى الزهق وتعبت ملل
...............
متجماعين بجروح وجروحو
الجرح خايف انه يبوح
سطح قلبى بطل نوح
نوحك عملى فى روحى خلل
...............
إهداء إلى الغادر الحانى

الــــبـــحـــــــــر

﴿ادْخُلُوا مِصْرَ إِنْ شَاءَ اللَّهُ آمِنِينَ﴾

﴿ادْخُلُوا مِصْرَ إِنْ شَاءَ اللَّهُ آمِنِينَ﴾
يارب برحمتك نستغيث
اللهم أحم مصر وأحفظ أهلها
اللهم أضرب الظالمين بالظالمين

يارب أنك خير حافظ
ياااااااااااااااااااااااااااارب

أنصروا ثورة المختار..

عندما تمطر الآحزان فلابد من الرحيل قبل الغرق فيها ... ها قد عادت لنا ثورة 25 يناير الروح من جديد لكن ليبيا فى أمس الحاجة إليها الآن ..نحن العرب روح وجسداَ واحد فى قلب الوطن العربى, أين دعاة الوحدة العربية الشعب الليبى يباد بالكامل ويقصف بالطيران العسكرى ولا تصريح واحد عربى يدين القذافى وأعوانه , وتعتيم دولى على الوضع هناك والطاغية المختل وولده سيف الإسلام يهددون الشعب بالموت ,أفيقوا يا مسلمون هلموا من كل البلدان العربية , أبناء ليبيا ينادونكم أطفالها يصرخون متى ينتفض الدم العربى ,..متى تنتصرون للحق..
نريد من حكومتنا فى مصر ان تتحرك , تحرك فعلى لآنقاذهم فعندما ثورنا على حسنى مبارك الطاغية وأسقطناه لآنه قبل أن يظلمنا بفساده,أباد وقطع علاقتنا مع أخواننا فى الإسلام والعروبة , نريدها ثورة عربية لا مصرية ولا تونسية فقط .. نريدها ثورة على كل من أستبدوا بمقدرات الشعوب وأستماتوا على كراسيهم , أن القذافى المختل فى ليبيا لن يترك الشعب الليبيى إلا بعد أبادة جماعية فماذا تنتظرون ؟
أنا حزينه من يوم ما رأيت شهدائنا فى مصر يتساقطون واحداَ وراء الثانى وكل هذا بقرار من اللامبارك , والآن حزنى يتجدد كلما رأيت دماء الشهداء فى  ليبيا..
التى يتم التمثيل  بجثث شهدائها دون أدنى أحترام لحرمة الموتى , جميعناَ نناشد الرأى العام العربى أن يتخذ موقفاَ حيال ذلك ..... نصر الله ثورة المختار وثبت أحرار ليبيا .. ألا لعنه الله على الظالمين وحسبنا الله ونعم الوكيل ....
أرفعوا رايات الحرية يا شباب العرب والمسلمين 2011 ( يا له من عام عظيم ) قد أتى وحلت معه رياح الحرية فأبشروا بوطن عربي جديد صوته هو صوت الشعوب العربية وكرامته عنان السماء وأن النصر لصبر ساعه ... وعاشت ليبيا والموت للقذافى ..

أحمـــد عبد المــؤمــن....قصة قصيرة

أحمد عبد المؤمن...أسم ظل يتردد كثيراً فى باحات مترو عبد العزيز فهمى... أسم  تناقلته ألسنة طالبات مدرسة مصر الجديدة الثانوية لعدة سنوات.....حيث كان هو بطل قصص غرام كل فتاة منهن, أنا ورانيا وأسماء كان يجمعنا طريق واحد إلى مدرستنا بمصر الجديدة,كان أيضاً يجمعنا فصل دراسى واحد ومقعد واحد ,الغريب أننا أحببنا نفس الشاب....!

كان وسيماً...أنيقاً معجباً بحاله ...يوجه دوماً نظراته الدافئة لنا كل صباح ....كانت تلك النظرات تشتت أعيننا وتربك حالنا, فتدق القلوب الصغيرة.لتلجم بقوتها لساننا وكان كل منا لا يفضى بما داخله للاّخر كعادة كل الأصحاب .كان يصعد للمترو من نفس المحطة التى نصعد منها كل صباح .كنا نحن بالزى المدرسى المحبب إلينا الذى كنا نبتدع فى أناقته ليبدوأكثر جمالاً عن الاّخريات وفى أيدينا الحقيبة المدرسية,هى الأخرى كانت الأقرب لحقائب الخروج عن الدراسة ..أما هو فكان فى قمة الأناقة دائماً ممسك بكتب الجامعة هكذا كنا نعرف عنه من ما تناقلته فتيات من المدرسة يسكنا بجواره .طالب فى الفرقة الثالثة بكلية الهندسة,...ما كان أحد منا يغيب يوماً عن الدراسة"ليس أجتهاداً فى الدراسة"فقط لم نشأ أن نتخلف يوماً عن رحلة مترو عبد العزيز فهمى الذى يجمعنا سوياً,هكذا ظل حالنا طوال الصف الثانى الثانوى ,نظرات وأبتسامات منه ونظرات مختلسة يتملكها الخجل منا,حتى أقترب العام الدراسى من الإنتهاء.وكل منا لديها رصيد لا بأس منه من النظرات لتجتر به ذكرياتها أثناء الأجازة الصيفية ......,هذه الأجازة لم نتقابل أنا ورانيا وأسماء كثيراً,فقد سافرت كل منهما إلى أحد المصايف لتقضية الأجازة الصيفية..أما أنا فى هذه الأجازة أقتربت أكثر من أبنة خالتى دعاء التى تكبرنى بأعوام قليلة ,طالبة فى الفرقة الثانية بكلية التربية, فهى تسكن أيضاً بجوارنا وممن  يستقلون معنا مترو عبد العزيز فهمى,كنت عند لقائى بدعاء أجدها حزينة شاردة.وكل مرة كنت أسألها عن سبب حزنها كانت تتهرب منى ,حتى زرتها فى أحدى المرات لأجدها باكية وبعد إلحاح وإصرار منى و تكتم منها,تردد أسم أحمد عبد المؤمن على لسانها....كانت هى الاّخرى لا تعرف لمن نظراته,فهى وهو وعشرات من الطالبات يجمعهم مترو عبد العزيز فهمى صباح كل يوم,حيث يستقلونه من محطة الخليفة المأمون ليتجه بهم نحو محطة جامعة عين شمس فى منشية الصدر,.........فى العام الدراسى التالى ألتقينا أنا وأسماء ورانيا ومرة أخرى ضمنا شارع البارون العتيق حيث توجد مدرسة مصر الجديدة الثانوية للبنات, وكان هو كعادته التى لم يقطعها إلا فيما ندر يرسل نظراته التى أعتادنا عليها كما أعتادنا على حمل حقائبنا المدرسية وكتبنا وأقلامنا,لكن الجديد هذا العام أن رانيا فاجأتنا بأنها تحدثت معه وقال لها "صباح الخير " وسألها عنا....فى مساء هذا اليوم  ألتقيت بأبنة خالتى دعاء ووجدتها تبكى بشدة ,جذبتها ,ألححت عليها ,فإذا بها تخبرنى بأن أحمد عبد المؤمن عقد قرانه على طالبة بالفرقة الثانية بكلية التربية...أختلطت دموعى بدموعها وأحزانى بأحزانها.....تلك الأحزان الواهية التى أخذت تخفت وتتبدد مع كل فجر وإشراقة شمس.....
تخرجت دعاء وعملت بأحدى المدارس التابعة لحى مصر الجديدة,بعد سنوات طاردها أسم أحمد عبد المؤمن مرة أخرى,حيث كانت ألسنة المعلمين والمعلمات بالمدرسة تلوك بخبرقضية طلاق "أبلة نهى"من زوجها المهندس أحمد عبد المؤمن المريض بمرض مزمن بالقلب.........!!
أما أنا ورانيا وأسماء كل منا مضى فى طريقه ولم يعد يجمعنا مترو عبد العزيز فهمى...وكلما أستقليت المترو لمعت فى عينى دمعة أختلطت بأبتسامة حزينة على براءة أيام ثانوى,قلوب بريئة كانت النظرة وحدها عندهم هى كل معانى الحب

مـســاء الــنـسـيــان......

صعدت الجبال..
عبرت الآنهار..
تخطت الصخور والحواجز..
ذهبت إلى كل بلاد الدنيا..
سألت جميع خلق الله..
جمعت الآحجار.. الآنهار.. والآطيار.. وهمست لهم..
هرعت إلى الآطباء.. والحكماء .. حتى السحرة طرقت بابهم..
أخيراَ.. وجدت ما أرادت..
عثرت على ماء النسيان..
تجرعته مرة واحدة ..
تنهدت بعمق..
تنفست الراحة ..
ابتسمت...
نظرت إلى وجهها فى ماء البحيرة .. لتتأكد من ثبات الآبتسامة..
وجدت صورته أمامها..
ألقيت بزجاجة ماء النسيان..
صفقت دماؤها طربا وقالت: ألم أقل مرارا مثله لا ينسى أبدا...

يا نور جديد فى يوم سعيد...

اليوم هو الآثنين 14 فبراير 2011....
بحلول هذا اليوم اكون تميت بالتمام والكمال 23 سنة ..اصل انا من مواليد الشمعدان زى ما كان الناس اللى اكبر منى بيقولولى ..
14_2_1988 كان الميلاد.. والنهاردة بكمل من عمرى 23 سنة .. متهيائلى ان انا عمرى 3 سنين بس من غير العشرين , اصل انا بحسب عمرى على حسب وقت الفرح فيه .. وعشان نحسب صح يبقا انا عمرى 3 سنين عدد سنوات الفرح..بس ممكن نزود عليهم يوم ولا يومين من 2011 من 25 يناير لـ 11 فبراير .. اصل دى بالنسبالى أيام فرحت فيها برضه ومش اى فرحة ... دى فرحة شاركنى فيها كل المصريين..., عالينا الصوت وسمعنا كل العالم يعنى ايه مصرى حر وانزاح عننا الطاغيه وأعوانه... برضه عيد ميلادى السنة دى مختلف حاسة فيه ان انا كمان حد مختلف وبفكر بطريقة مختلفة غير كل السنين اللى فاتت ..صرت اكثر هدوءاَ وتعقلاًَ لكل الآمور .. صرت اكثر إيماَناً  بالحكمة التى تقول بأن" ليس كل ما يلمع ذهب" , لم يعد البريق المزيف يخطف بصرى لم أعد انخدع فيمن يدعون العقل والعلم ...,بعدوا عنى وفى بعدهم زال بريقهم أنكشف عنهم الغطاء صرت أضحك كثيراَ وانا اتذكرهم , اردد كيف لى اننى يوماَ قد غرنى وبهرنى أدعائهم للصدق والعقل والحكمة , الحمد لله مر هذا العام ومر معه كل ما ليس له قيمة ..
على المستوى الدراسى الحمد لله حققت ما كنت اصبو إليه... وعلى الصعيد العاطفى مازالت الآمور كما هى لا جديد, قلب لا ينبض, لا يزال ينتظر رسائل من حبيب مجهول, يبحث عنه فى قاموس الآسماء من حوله وهو متيقن انه موجود خلف ستار ما يحمل له كل مشاعر الحب, والدفء والحنان , تائه بين الناس ومكانه فى القلب محفوظ.
ربما تناثرت له بعض الصور المتقطعه أمام عينى لكنها كلها صور لشخصيات باهتة.
غاب عنها الوهج ليس بينهم حبيبى, فحبيبى شمسه لا تغيب.. ...
متفائلة جدا بهذا العام واشعر بأن طيف الحبيب يقترب منى ,حتماَ سأرحب بالمجهول الذى طال انتظاره ولكن أين هو وما موعد مجيئه, سؤال الآيام القادمة وحدها هى التى ستجيب عليها...؟؟
23 سنة لسة بحب البحر واسكندرية وقطتى أيويا وكلية الإعلام والفيس بوك واصحاب ثانوى وابتدائى وشارعنا وحدائق القبة عند بيت جدتى ومدونتى الجميلة وشهر 7 لما بنروح العجمى والآيام الجميلة اللى بنقضيها هناك ومترو الآنفاق اللى الناس فيه كلها عاملين زى الدنيا بكل حكايتها والرسم والآلوان , وزهرة البنفسج الجميلة , وكلمة صباح الخير يا حياة اللى بحب اكتبها الصبح على صفحتى فى الفيس بوك ,وعبد الفتاح الجرينى اللى بمووت فيه , وصوت حنان ماضى اللى بتغنى للبحر حبيبى , وترام اسكندرية وغزل البنات, والايس كريم اللى باكله فى الشتا بس , والرخمة اسماء صحبتى, وميدان التحرير اللى خلانى لآول مرة انزل مظاهرات واقول يسقط حسنى مبارك وكل شباب وبنات بلدى الآحرار... ويوم الجمعة 11فبراير لما نزلنا كلنا نحتفل برحيل مبارك وغنينا كلنا فى وسط الناس وكتبت على العلم أنا مصرية حره والمطرب أحمد سعد اللى بتلقائيتى أول ما شوفتة قولتلة عايزين بقى اغنية وطنية ضحك معايا وقالى انتى عسل .., وكوباية النسكافية فى الفجرية مع سماع عبد الوهاب.... , وبالمرة الرجل اللى كان واقف ورا عمر سليمان ههههههههههههههههههه اللى ضحكنى من كتر الضحك اللى اتكتب عليه فى الفيس بوك , وتعظيم سلام للشهداء اللى ضحوا عشانى وعشانكم اللى عمرنا ما هننساهم ابداَ ..
كنت هنسى بحرى واحب مكان فى الدنيا لقلبى , والقاعدة فى الحسين وقت المغربية ليها طعم تانى برضه ...
23 سنة ولسة بحب اتفرج على فيلم عجميستا اللى بياخدنى معاه لشوارع العجمى وشخصية (هيبه) اللى بشوف فيها نفسى .. لما بيقول" لسة بحلم يوم بمرسى ومركب وصبية لية حياتى شايفها سد مش مهمة لآى حد",...
23 سنة ولسة بحلم يا بكرة تيجى احلى واحلى ولسة بقطف ورد البنفسج كل ما اشوفه ولسة بضحك كل ما يجى الصبح وتزقزق عصافيره , لسة بجرى تحت المطر زى طفلة صغيرة تدور تدور وهى بتحلم ان المطر يغسلها من كل شئ سرق فى يوم ضحكتها ونقاء قلبها.....كل سنة وأنتى طيبة يا أيوش....

مجرد كلام ..........

كل المدونات ,وكل الآنترنت, وكل الفيس بوك, وكل الدنيا بقيت تتكلم فى السياسة وعن اعتصام التحرير, وأنا حاسة بحالة توهان بزهق من السياسة والكلام عنها زيادة عن اللزوم فتلاقينى أعمل إية اخرج برا مود السياسة  اللى موجود فى التليفزيون , وفى الفيس بوك , والشارع, وبين الآصحاب, حتى فى البيت ,
حتى ان اطفال اخويا طالعين نازلين يقولوا الشعب يريد إسقاط النظام وماكنوش بيقولوها نظام ( نزار ههههه ) تلاقيهم يقصدوا نزار قبانى هههههه حتى الآطفال بتنادى بأسقاط النظام ومبارك لسة قاعد على قلوبنا كلنا..
أروح انا لعالم تانى فية هدوء واستقرار أدور فية على لحظة تخرجنى خارج حالة الحزن الشديدة اللى بتجتاح قلبى وحياتى الآيام دى بسبب اللى بيحصل فى بلدى حبيبتى وعلى شهداء مصر الآبطال رحمهم الله واسكنهم فسيح جناته ..
كوباية نسكافية والهيدفون ونسمع للصبح كلثوميات وشادية الجميلة ....
..الحقيقة دة مبيبعدنيش عن قضية بلدى ومتابعتها بس الحالة النفسيه محتاجة اننا نخرج بيها لبر الآمان ولو الواحد استسلم للجو العام اللى عند الناس هيتعب حقيقى  ...
واروح اكلم صحابى فى التليفون اللاقيهم بيكلمونى عن البلد والمظاهرات .. صحيح الموضوع دة شاغل بالنا كلنا بس مش معقول كل حياتنا هتبقى عن اللى بيحصل فى مصر دة انا جالى اكتئاب بقالى اسبوع محبوسة فى بيتنا بعد الساعة 6 المغرب بقى ممنوع الخروج من البيت  أكيد فى مواضيع تانية فى حياتنا اهتمامات تانية فى حياتنا دراسة شغل حاجات كتير..  تسليتى الوحيدة دلوقتى القرأءة اروح اقرا قصص لنجلاء محفوظ اللى بحبها او يوسف السباعى ايوة هما دول الناس اللى بشوف فيهم عالمى وبشوف نفسى بين سطورهم ... مبحبش السياسة ومبكرهاش بس ليا وجهة نظرى اللى بقولها وقت اللزوم مش عمال على بطال افضل اتكلم لما ازهق زى الناس اللى فى الفيس بوك بقالى فترة بدخل الفيس ابص واقفلة تانى وكأنة مكان للنكد ..طبيعتى فرضت عليا انى احب التغيير زى فصول السنة  ومحبش اتكلم فى موضوع واحد بصفة دايمة .. التنوع فى الحياة برضه بيكسبها روح وسعادة ..
بليل اقعد مع نفسى وفى ايدى قصة اقراها وبسمع عبد الوهاب شادية ام كلثوم فيروز كمال حسنى او العبقرى محمد فوزى وممكن اسمع اغانى اطفال بتاعت زمان دى زى سوسة لعفاف راضى او اصحى يا دنيا والحاجات الجميلة دى اللى ترد الروح للآنسان وادندن مع الاغانى ههههههه صوتى حلو طبعاَ كنت بغنى فى المدرسة زمان ...
وفى ايدى كوباية نسكافية  وانسى الدنيا واريح بالى .. ويأذن الفجر عليا اقوم اصلى ..وبعدها اروح احلم .. ولو كان حلم حلو مش بصحى

ليلى مراد (صوت الحــب).....

ليلى مراد هى صوت الحب الجميل الآنسانة الوحيدة اللى لما بسمعها بحس الحب فى كلماتها صوتها الحالم الرقيق وتناغم الحانها ودفء صوتها وهى بتغنى بيدب فى اوصالى الحياة والحب ... ساعات الحياة بتجف ومبيبقاش له طعم ,بس محتاجة مننا شوية حب عشان نكمل ..ليلى بتدينى الاحساس بالحب فى عز الجفاء..
(إما أنا مهما جرى هفضل أصون عهد الهوى وإن غبت يوم ولا سنة هفضل أنا )
.ممكن أوى نقابل ناس فى حياتنا نحس معاهم بالحب والامان والآحتواء ومهما جرى منهم مبنفتكرش قسوتهم معانا قد ما بنفضل محتفظين بحبهم فى قلوبنا حتى لو اتغير زمانهم وراحلو وأتى زمن تانى هما مش موجودين فية لكن عهدنا بهواهم جوانا محفور وتارك علامة فى قلوبنا بتخلينا فاكرينهم دايما مهما جرى منهم وإن غابوا يوم ولا سنة هيفضلوا هما حبايبنا وهنفضل احنا بعهد حبهم فاكرين .... ولما بتقول
لا اللي صفا له حبيب باله .. هدي وارتاح
ولا اللي فاته نصيبه .. نامت في قلبه جراح
لما يخاصمني بأفرح وأصور .. فرحة لقاه لو يوم جاني
وإن جه صالحني أبكي وأفكر .. من خوفي ليخاصم تاني
وكأنها بتقولى ان اللى بيحب واللى مبيحبش الاثنين مش مرتاحين وان خصام الحبيب عذاب جميل عشان بنتصور فرحة وشوق لقاه وان جه صالحنا بنفكر ليخاصمنا ويفارق تانى ونتعذب بفراقة تانى قد إية قيمة الحب فى حياة الانسان بترقق من مشاعره ومن خوفه على احاسيس ومشاعر الطرف التانى أى ان كان حبيب اوصديق...
وبتقول كمان.........
انا قلبى دليلى قالى هتحبى دايماَ يحكيلى وبصدق قلبى, حبوبى معايا من قبل ما أشوفه قلبى دة مرايا مرسوم فيها طيفه شايفاه فى خيالى سماعاه بيقولى يا حياتى تعالى تعالى غنيلى تملى وقوليلى تملى الحب دة غنوة كلها انغام ,انغامها الحلوة احلى انغام ...
انا عن نفسى بصدق قلبى واحساسى وانا شايفه وسامعه الطيف الجميل اللى قلبى الشفاف بيرسمهولى فى احلامى وشايفه الدنيا اللى بتنتظرها اى بنت ..انا مش خيالية بس حقيقى انا بصدق قلبى اوى عشان شفاف زى المرايا اللى بنشوف فيها نفسنا وقلبى قالى هتحبى ,وبصدق قلبى ,انا قلبى دليلى .... ويااه بقى لما بتقول يا مين يقول لك...
يـا مين يقول لك ازاي حياتي وازاي باعيشها ...ويا مين يقول لي ازاي حياتك وازاي عايشها....وازاي حالك في الدنيا بـَعدي...وا زاي حالها ويـّاك في بـُعدي..
شاغل خيالك ايه ؟ ليلك نهارك ايه....يا مين يقول لي ويا مين يقول لك
وهنا بقى كأنها بتقول الكلام اللى على لسانى بس متوقف مش عارفة لية اوقات بنبقا عايزين نطمن على ناس قريبين مننا ,عايزين نعرف هل هما فرحانين ولا الحزن فى حياتهم وبنقول يا ترى مين يقولكم احنا قد إية حياتنا من غيركم عذاب  ويا ترى حالكم فى بعدنا إية فاكرنا ولا ناسينا بنيجى على بالكم ولا مش بنخطر فى البال  .. 

وتـعـيشى يا ضـحـكه مـصـر....

عندما تتوقف الدموع عندما تصمت الكلمات على الآلسنة لتكتب سطور الحزن
أنا حزينه جدا عليكى يا مصر حاسة فى يوم وليله ان بلدى اتسرقت منى مش هى دى مصر ولا هما دول ناسها, حاسة بأحباط قاتل من أخبارعن الناس اللى بتموت والناس اللى مصابه, حاسة انى مش قادرة اعمل شئ ليهم , كل ما بشوفهم صورهم وشكلهم فى التليفزيون ببكى وكأن أمى ماتت , انا حزينه على الشباب اللى ماتت, صحيح شاركتهم فى تظاهرهم وتضامنت معاهم لكن كل ما اسمع ان شاب مات أحس بالحزن الشديد جدا
وخصوصا الحصار اللى فرضوه علينا بقيت حاسة ان بيتنا سجن والبلد كلها سجن أكبر, مش فاهمه حاجة ومش عارفه أحنا رايحين على فين ومستقبلنا إيه..
كنت بشوف الضرب فى التليفزيون كأنى بتابع أخبار غزة الدموع تحجرت فى عينى وقلبى يفتر ألماَ
وكل ما اشوف وجه أوباما الخبيث وهو بيتكلم على بلدى قلبى يدمى وأصرخ واردد لماذا اصبحت مصر كلمه تلوك بها ألسنة الغرباء يتدخلون فى شئونها ,لبلدى السيادة الكاملة يتكلمون عن مصر ومصر للمصريين لا غير, واسرائيل تقول يجب الحفاظ على معاهد السلام معاهدة العار والخزى ,
كل شئ توقف فى مصر وبالتحديد القاهرة التى هى مسقط رأسى فقد تم تأجيل أمتحاناتى لآجل غير مسمى , والمواصلات توقفت بسبب حظر التجوال الذى كان يحاصرنا حتى مترو الآنفاق كان سداح مداح الكل يصعد دون ان يدفع ....
ويغلق من السادسة مساءاَ وتصمت الشوارع ويعم الظلام الآجواء...
وتخترق البلطجية الشوارع لترويع الآمنين فى البيوت, ويسهر الناس لحراسة بيوتهم وعائلتهم ....خوف دخل فى البيوت المصريه بسبب هروب المساجين من اقسام الشرطه ومن سجون مصر ودة اللى قالوا التليفزيون المصرى العميل,
وقد هرب الكثير وذلك بأمرمن النظام المصرى ومنهم هشام طلعت مصطفى ومحسن السكرى وهروبهم خارج مصر... فوضى عارمه كانت فى مصر , واللجان الشعبية اللى شكلها الناس فى  مصر وفى المنطقه اللى أنا ساكنه فيها مثلاَ كل خمسه متر لجنة شعبية لتفتيش المواطنين هل يعقل ان يصل بنا الحال لنفتش بهذا الشكل فى بلدنا,
وما يشتد غيظى منه هو اللجان الشعبية الليليه فى شارعنا مثلا الناس بتجمع نفسهم من الساعة الثامنة مساءاَ وينتهى المجلس على الساعة الثامنة صباحاَ حاجة تفرس...
لما تلاقيهم قاعدين بيقولو نكت وبيضحكوا ولا لما الشاى والقهوة تنزل من بيت احد منهم حتى يحلو السهر , اللى بيضايقنى اللى حصل دة هو سبب ان اللجان دى توجعلنا دماغنا من الرغى اللى مابيخلصش ابداَ وممكن تلاقيهم بيتكلموا فى حكايات ثانية خالص بعيدة عن اللى بيحصل فى البلد ...,ولا واحد فيهم يحكى انه كان بيساند  اخواته فى ميدان التحرير مثلاَ, الغريب او المضحك بقى ان ال إيه كل ما يعدى واحد فى الشارع كلهم يقوموا مرة واحدة وكأنهم لقوا جاسوس وهاتك يا اسئلة وحركات من دى , يارب يارب اللجان دى تتلغى جابولى أكتئاب منعونى من الدخول للبلكونه .. خصوصاَ وان من عادتى ان بعد صلاة الفجر احب اقف فى البلكونه ..ربنا يعدى الآيام دى على خير يارب, واللى بيصبرنى فى حزنى دة هو صمود الشباب الحر الباسل فى ميدان التحرير , ميدان الشهداء ... ميدان النصر بأذن الله
وأبكى وأنزف وأموت وتعيشى يا ضحكه مصر...
إما بقى عن الآنهزميين فدول عملاء للطاغيه مبارك مجرم أحداث 25 يناير,
التى سيسجلها التاريخ لكى يعلم ان المصرى قادر على صنع التاريخ بنفسه وقادر على الظلم بأذن الله ..دولة الظلم ساعة ودولة الحق إلى قيام الساعة ... ربنا يحميكى يا بلدى ويحمى شبابك وبناتك ونعيش فى بلدنا احرار منصورين رأسنا مرفوعه  بأذن الله ..اللهم انصر أم الدنيا مصر أعظم بلد وأحسن بلد وأطيب ناس... وأهلك الظالمين يااااااااااااااارب

زهرة البنفسج.....قصة قصيرة

همس لي قائلاً:أنتى أجمل من رأت عينى,وما أن قالها حتى أنتشيت سعادةً وخلتُ نفسى كالفراشة التى أطلقوا جناحيها للتو,فغدت تتراقص فرحةً بالسماء.....رددت: ولكنى لستُ بأجمل البنات..!! قال: ولكنك كل البنات فى نظرى.....
كلهم أنتى يا صغيرتى......أستكملنا سيرنا بمحاذاة النيل ..تتعالى ضحكاتنا ...تتهادى خطواتنا ,بالكاد نرى الناس من حولنا,حتى السيارات فى الطريق أضحت ككتل سحابية بيضاء...كل ما حولنا يبث لنا السعادة والصفاء.....تتلاقى أعيننا فأدير عينى خجلاً إلى الأرض,فنظراته المتتالية تجتاح عينى فتزيدها بريقاً.وتدفعها بأن تبوح بكل ما يسره قلبي .........يستقطع حديثنا بسؤال لطالما ردده هو:
ولكنى أخشى عليكٍ ياصغيرتى.....أخشى عليكٍ من همزاتهم,من نظراتهم وسخريتهم....هلا دريتى بما قد تلوك به ألسنة الناس عن فتاة صغيرة أحبت كهلاً مثلى؟؟......أقاطعه مرددة: أرجوك لا تقل كهلاً,كيف تكون كهلاً والفارق بيننا فقط خمسة عشرعاماً..!! لماذا تصر دوماً أن توصم نفسك بما ليس فيك,ثم أنا لا أبالى بما قد يقوله الاّخرين,يهمنى فقط أنت وليس أحد غيرك.....بردد: يا صغيرتى الرجل الكهل الذى أتحدث عنه هو ذاك الذى يقبع بداخلى,يسكن قلبى منذ سنوات عدة,قلبي الذى ظننت أنه فقد النبض والحياة,فاّثرت أن أظل ساكناً مثله,مستسلماً لما اّل إليه حالى فى غفلة من الزمن ...وما كنت أدرى أن تأتى أنتٍ إلى حياتى فتضيئ شموع الفرح بدواخلى ,وتوقظى بأبتسامتك الملائكية مشاعرظننتها قد أدبرت منذ زمن,بعثتى الدفء بأوصالى ,فنبض القلب المستكين...عاد وعدت أنا معه شاب من جديد...... فتحت معك باب أغلقته أمام من سبقوكى,أحبك يا صغيرتى,أحب أبتسامتك الشقية,أحبك فى كل حالاتك  قاطعته مرددة: وأنت أيضاً منحتنى الأهتمام والحنان,حفزتنى كى أواصل حياتى وأنا اشعربالدفء الذى لطالما أفتقدته,كلماتك أنارت ظلام أيامى...فهل تظن أننى قد أكترث يوماً لما قد يردده أناس لا يدرون شيئاً عما يختلج قلوبنا؟!!......أرجوك طمئن قلبك وعاود الأبتسام من جديد,دعنا نكمل حديثنا ....أستوقفته مرددة: لحظة سأقطف زهرة البنفسج تلك فكما تعلم  كم يسعدنى دوماً رؤيتها بين يدى......قطفت الزهرة وعُدت ولكنى لم أجده ,وجدت فقط ورقة صغيرة مكانه ...كتب عليه بخط يده
"صغيرتى أحبك ولكنى لن أستطع الأرتباط بك...نحن نعيش بين الناس ,وبهم نكون,تذكرينى بالخير,وسأذكرك كلما رأيت زهر البنفسج الحزين"........مضيت وحدى فى الطريق وقلبي يهتز ذبيحاً من فرط الاّلم,مرت الأيام ومازلتُ أردد مع نجاة الصغيرة كلمات نزار القبانى"متى ستعرف كم أهواك يا رجلاً أبيع من أجله الدنيا وما فيها" فى الجريدة اليوم خبراً صغيراً يقول: تهنئة قلبية للأنسة غادة الطالبة بكلية الحقوق لخطبتها للمحاسب أحمد النشوقاتى......كان هو وكانت هى فى مثل سنى...!! أبتسمت,ألقيت الجريدة فى الأرض دهست أقدامى التهنئة,أدرت وجهى للأمام.....أسقط من يدى زهرة البنفسج فلم يعد للحزن وجود........

فى ليلة شتوية أتيت للبحر.....

أتيت إليك هذة المرة أيها البحر لكى تشعر بى وبعد طول غياب لم أراك بأستقبالى مستعد ,متلهف على .... رأيتك صامت مثل البيت المهجور,لا يسكنه احد .
أتيت إليك مسرعة من قاهرة المُعز والحنين يملئ ضلوعى... لكنك انت هاجرت بامواجك من مرور أيامي,  كآخرين تشبهم ويشبهوك,فقد ظننتك  وحدك صديقى ,وحدك حبيبى ولو كنت أعلم انك ايضاَ مثلهم ما كنت أتيتك ولا تلهفت على رؤيتك ..... أهل أعتادت يا بحر ان تستقبل احبائك مثل ما قابلتنى؟ صامت لا موج لك..... هذا الشتاء كغير الشتاء الماضى..... يحمل معى من الدموع والآفراح, يحمل صقيع الشجن... قد لا تخلو غيوم الشتاء البارد من البرق والرعد مثلما لا يخلو قلبى من حنينى إليك دائماَ .. عندما أتيت لبلادك الحبيبة لم أرى ولم أسأل سوى عليك أنت وأسرعت بخطواتى متلهفة على رؤياك لكنك استقبلتنى كالغريبة,كالوحيدة فى برد الشتاء .... تجلب معها رياح دافئة تسرى فى الجسد المتوارى خلف أنغام الشتاء... أيها البحر فيك أودعت أسرارى, ولك وحدك أودعت كل أحلامى, أخفيت كل ألمى وصراخى عن كل البشر....
إلا أنت أطالعك على كل حياتى كالكتاب المفتوح لتقرأ فية كيفما تشاء ....وبعد كل هذا تستقبلنى بجفاء..!! كباقى الاخرين الذين هاجرونى وأعلنو وداعهم فى صمت وعلن... فى صدق ورياء...
فلم أتى إليك إلا لمحبتك ,وما دامت محبتى تجعلك صامت باهت اللون أوعدك لن أتى إليك ثانية حتى وإن أشتقت إلى......فلابد يا رفيقى ان تعلم  أن الحب منحه الحياة والجراح نقمة الحياة ..وقد أتيتك لآشكو لك ولم أجدك ... فأعتبرت إننى لم أتى لك من البداية ... وغادرت بلادك وفى قلبى أنين الحزن ...
 سيظل هذا الشتاء شاهد على الفراق......فعندما تنزل الآمطارأعدك لن أذكرك ولا تذكرنى..... يا من كنت واهمه بحبك وأمنحتك كل احساسى لكنى نسيت ان الآخرين يقولون عليك غادر .... فألآن صدقتهم وصدق ليّ وعدهم ...

فــــي الــصـــيف لازم نــــــــــضحــــــــــك

فى شهر يوليو الماضى وكعادتنا كل صيف سافرنا للعجمي ....صيف 2010
....السنة دى الجو فى القاهرة كان حااااااااااااااااااار جداً.....المهم بقا أن أيامنا فى العجمى بتبقا رااااااااائعة اللمة مع العيلة والضحك واللعب على الشاطئ بليل والبحر بلونه الأزرق الجميل جو تانى أصل انا مبحبش أشوف البحر مخنوق بكورنيش يمنعنى من التمتع بيه فى العجمى بقا انا والبحر ولا حد تالتنا.....المواقف اللى بتحصلنا هناك فى العجمى بتتحفر جوة الذاكرة لحد ما نسافر تانى وتتجدد الذكريات ...بس السنة دى كل المواقف اللى حصلت كانت مواقف كوميدية ههههههه والموقف اللى هحكى عنه ده بقا كل ما بفتكره بموووووووت من الضحك.....موقف زى سيناريو فيلم بين السما والأرض....الحكاية أن أحنا شقتنا فى الهانوفيل فى الدور السابع وطبعاً عشان ننزل ونطلع بنستخدم الأسانسير كان فى بقا يا معلم واد صغير حوالى 12 سنة كدة ساكن فى الدور السادس واد أخر رخامة معفرت هههههه ....المهم سارة وهاجر بنات أخواتى كانوا هما اللى دايما بينزلوا كتير والواد الرذيل ده أتخانق معاهم كتير سارة عندها 16 وهاجر 14 سنة وفى يوم كانوا طالعين فى الأسانسير والولد ده كان نازل منه واتخانقوا مع بعض والواد قالهم والله ما هسيبكم وهما طلعوا بالأسانسير والواد فضل  ماسك زر الأسانسير الرئيسي من تحت ويطلعهم وينزلهم ههههههههه وهما يترجوا فيه يسكت مش راضى ومن حظهم الكهربا قطعت فى العمارة ههههههه والواد جرى على البحر وهما فى الأسانسير ما بين الدور الرابع والخامس وفجاءة سمعنا صوت وصراخ جامد منهم والناس اللى فى العمارة كلها اتجمعت والكل كان بيضحك ههههههههه  عشان العيال وهما جوه الأسانسير مش مبطلين بكاء وسارة ألحقينا يا عمتو انا هموت فى الأسانسير بقا ما أغرقش فى البحر واموت فى الأسانسير مش هسيبه الرزل ابن الرزلة وهاجر بتقول الحقنى يا بابا مفيش أكسجين ويخبطوا فى باب الأسانسير وأبو عبد الله البواب مش عارف يحل المشكلة لأن الكهربا كانت فاصلة من العمومى ...بعدها بشوية لقينا واحد من المصيفين بيقولوا عليه مهندس جاى بيضحك ههههه طبعاً جاى بلبس البحرههههههههه ونزل مع البواب واخويا وشباب من العمارة والحمد لله خرجوهم بعد مرور حوالى نص ساعة وخرجوا مغمى عليهم ههههههههههههههههه وأول ما فاقوا طلبوا يضربوا الواد الرخم اللى أتسبب فى كدة..... مفاتش ساعة لقيناهم بيتخانقوا على السلم والواد اضرب قلم من سارة أصلها من وقتها قالت هنزل على السلم مش هركب أسانسير تانى هههههههههه.....

ومن يتهيب صعود الجبال يعش أبد الدهر بين الحفر.....

مبرررررررررررررررروك لتونس وعقبال مصر يااااااااارب اول خبر مفرح فى 2011 وان شاء الله الدور على مبارك....

وإن أمطرت فى بلاد العرب فأبشروا بها فى بلادنا ....اليوم تونس وغداَ مصر وأول الغيث قطرة....

حــــــــب الـــد نــيـــا وســـيـــب الـــدنيـــا تــــحـــب

هى ذكريات يتم التعبير عنها بشكل غير منتظم فقط لآنها راسخه بوجداننا تبهجنا احياناَ وتثير فينا الحزن احياناَ لكنها دوماَ ذكرياتنا نحن لحظاتنا الجميلة التى تمر سهواَ مع مرور الآيام من عمرنا وذكرياتنا فى الآسكندرية لا تمحوها الآحداث وتلاحقها لآننا دوماَ على وعد باللقاء منذ الصغر والصيف الماضى كان اكثر صيف ممتع  قضيته بها تقريباَ كل المواقف التى حدثت هناك كانت مضحكة وموقف اليوم يمزج بين الضحك والتفاؤل والبساطة بأختصار فن حب الحياة بكل ما فيها وكل تفاصيلها الرائعة والساذجة  كما يحلو لذوات  التكشيرة العريضة بالوجه والتعقيد تسميتها.... اسيبكم بقى مع تفاصيل التدوينة.... المكان: منطقة بحرى بالآسكندرية (قلعة قيتباى) الزمان: 7 يوليو2010 .......اليوم بيبتدى  فى الهانوفيل بمنظر جميل للبحر من البلكونة فى الدور السابع والراديو شغال على اذاعة باكوس ودى الإذاعة الخاصة باسكندرية واغنية معرفش مين اللى بيغنيها مبسمعهاش غير هناك وفى نفس الإذاعة ...الأغنية بتقول يا اسكندرية صباح الخير.. صباح الخير وقلوب مدوبها هواكى يا اسكندرية... قالت وقولنا وقالها الطير يا اسكندرية صباح الخير... اليوم كان معادنا نزور قرايبنا اللى فى المنشية اقترحت قبل ما نروحلهم اننا كلنا نقضى وقت جميل فى بحرى بستمتع جدا لما بكون هناك وخصوصا فى وقت الغروب الشمس وهى بدوب فى المية وبتختفى بتبقا رائعة ويا سلام بقى وانت قاعد جمب قلعة قيتباى وفى ايدك أيس كريم جيلاتى عزة حاجة تانية بجد احساس متحسهوش فى اى مكان فى الدنيا غير هناك وانت قاعد على الصخور امامك البحر والمنظر الجميل... الشمس غربت والليل ابتدى يشق سكون البحر وامواجه والناس ابتدت تزيد فى المكان الرائع دة... بنوتة صغيرة بتلعب بالبالون امامى وسلمى وحبيبة بنات اخويا مستمتعين بركوب البسكليتة الدراجة يعنى وهزار وضحك وسعادة حوالينا مننا ومن الناس وبائع الترمس بينادى وبنشترى ويخلص ونشترى .... وشباب كتير قاعدين كان فى منهم مجموعة معاهم جيتار وبيغنو اغانى جميلة لفتوا انتباه كل الموجودين بالمكان بصوتهم الرائع حبيبة وسلمى وهاجر وسارة واخويا كلهم التفوا حواليهم يحيوهم بالتصفيق الحار والآعجاب اما أنا اتحرجت جدا انى اكون وسط هذا الجمع فضلت ابص من بعيد وانا بردد معاهم اللى بيغنوه كنت حاسة بفرحة جميلة مليه المكان حواليا الناس رغم الظروف والمعاناه اللى فى المعيشة والحياة مازالوا يملكون القدرة على الضحك والآبتسام من القلب لا ادرى هل هم يبحثون عن اى شئ يخرجهم من معاناتهم ام ان الجميع هنا فى الآسكندرية سعداء كما اعتادت ان اراهم حب لكل معانى الحياة وبساطتها ... بجانبى كان يجلس رجل عجوز يشارك الشباب بالغناء اختلطت اصوات الموجودين بالمكان حتى اننى لم استطع ان اميز صوت من يغنى الشباب ام كبار السن ولا الآطفال وكعادة الوقت الجميل ان يمر بسرعة اختفوا الشباب اصحاب الجيتار وعاد السكون والكلام الجانبى للموجودين بالمكان حتى أنا عدت ثانية إلى الصخرة التى كنت اجلس عليها بجوار البحر تخيلت بعد هذا الموقف لو ان المحبطين وباعثى فقد الآمل فى الحياة اختفوا من الوجود واستبدلنهم باصحاب السعادة ومروجى الفرح والبهجة بحياتنا ستكون لدنيانا شكل اروع بكل تأكيد.... اكثر ما اكره فى هذة الحياة هم الآشخاص العابسون ذوات التكشيرة اصحاب رقم 111 على وجوهم ههههههه الذين اذا  قابلتهم يوماَ انقلبت بهجتك إلى تعاسة لا يملكون القدرة على رؤية مواضع الجمال فى تلك الحياة يبثون كأبتهم وفشلهم فى المحيطين كفانا الله شرهم....الحياة ابسط من كل ذلك تحتاج فقط إلى قلب راضى بأمر ربه ومطيع له ... قلب محب لكل تفاصيل الحياة ...قلب يملك برأءة الآطفال فى التسامح والآقبال على الحياة..... نفس راضيه حتى فى احلك الظروف فقط الرضا بالمقسوم مفتاح السعادة... كل سعادة....و زى ما الصبوحه الجميلة بتغنى غنى زيها وقول حب الدنيا وحب الدنيا وسيب الدنيا تحب وان مقدرتش ابعد عنها وسيبها للى يحب .... حد يبات عطشان والمية بتجرى تحت ايده لازم ما فى عنده نظر.... حد يلاقى الشمس قصاده ويمشى يدارى عنيه ما فى عنده بعد نظر.... يا ناس يا هوووه الحب لية بتعقدوه..... الحب لية بتفلسفوه يا ناس يا هوووه..... هااا محتاجين ايه تانى عشان تحبوا الدنيا...... الشافعى قال ما لحوادث الدنيا بقاء... حب الدنيا ...الدنيا هتحبك خليك مؤمن قوى حتى يحين مع ربك اللقاء ...ابتسم فى وجه اللى يقابلك دة الآبتسامة فى وجه اخيك صدقة .... اختار كلماتك بعناية لما تتحدث لحد ممكن كلمة صغيرة متبقاش لها قيمة عندك تجرح اللى قدامك..... صحيح التدوينة دى لآصحاب الضحكة الرايقة ممنوع دخول اصحاب التكشيرة وكلمة مفيش فايدة.... يا سلام يا اسكندرية هفضل اكتب عنك لآخر يوم من عمرى

المتنبى ....

أهذا جَزاءُ الصّدْقِ إنْ كنتُ صادقاً......   ....أهذا جَزاءُ الكِذبِ إنْ كنتُ كاذِبَا.
وَإنْ كانَ ذَنْبي كلَّ ذَنْبٍ......       ....... فإنّهُ مَحا الذّنْبَ كلَّ المَحوِ مَن جاءَ تائِبَا .

ابتسم للحياة......

لا شيء يضيع ملكات الشخص ومزاياه كتشاؤمه في الحياة، ولا شيء يبعث الأمل، ويقرب من النجاح ويُنَمِّي الملكات،ويبعث على العمل النافع لصاحبه وللناس، كالابتسام للحياة.
ولا قيمة للبسمة الظاهرة إلا إذا كانت منبعثةً عن نفس باسمةٍ، وتفكير باسمٍ، وكل شيء في الطبيعة جميلٌ باسمٌ منسجمٌ، وإنما يأتي العبوس مما يعتري طبيعة الإنسان من شذوذ، فالزهر باسم، والغابات باسمة، والبحار، والأنهار، والسماء، والنجوم، والطيور كلها باسمة، وكان الإنسان بطبعه باسماً لولا ما يعرض له من طمع، وشر، وأنانية تجعله عابساً؛ فكان بذلك نشازاً في الطبيعة المنسجمة.
هناك نفوس تستطيع أن تخلق من كل شيء شقاءً، ونفوس تستطيع أن تخلق من كل شيء سعادة.
ليس يعبس النفس والوجه كاليأس؛ فإن أردت الابتسام فحارب اليأس. إن الفرصة سانحة لك وللناس، والنجاحَ مفتوحٌ بابُه لك وللناس؛ فَعَوِّد عقلك تَفَتُّحَ الأمل، وتوقُّعَ الخير في المستقبل.




موضوع منقول للافادة إليكم باقى الموضوع ...
دة لينك الموضوع..
http://elazayem.com/new(37).htm